بەرىمباي ىسقاق ۇلى. جايلاۋدا

جايلاۋدا

وتەدى كۇندەر سىرعاقتاپ،
قايران كەز جۇرگەن بۇلعاقتاپ.
قىمىزعا بارساڭ قيىلىپ،
كۇتەدى ءار ءۇي سىرماق ساپ.

ۇزاق كۇن اۋىل قىدىرىپ،
ءان شىرقاپ، قىمىز ءسىمىرىپ.
باباڭنىڭ كەشكە ءيىسىن،
قايتاسىڭ بويعا ءسىڭىرىپ.

جايلاۋعا دەم اپ، كەلىپ ەم،
سىيلادى ەل ورىن تورىنەن.
سالتى ەكەن، جومارت، ءمارت ەكەن،
كۇندە توي، كۇندە سەرۋەن.

كۇندە توي، قىزىق قۇتتى كۇن،
اۋاسى ءشاربات جۇت، كۇنىم!
شاپقاندا قانات بىتىرەر
ارعىماق اتى مىقتىنىڭ.

كۇندە توي، كۇندە قىدىرىس،
جان تەربەر اسەم قۇبىلىس.
كوڭىلدى جەلپىپ تاستايدى،
جازداعى جايساڭ ءۇزىلىس.

اق قار مەن كوك مۇز ورانعان،
قورىقپايدى ولار بوراننان.
قورقادى قورقاۋ ءبورى مەن،
ەكى اياق قاسقىر ادامنان.

قارا كۇش قايرات باسىم- اق،
ادامى قىردىڭ اسىل- اق.
ەلىمدى تۇتاس ءجۇر ەكەن،
از عانا مالشى اسىراپ.

قىرانى قىردا ساڭقىلداپ،
سەرگيدى كەشكە ءان تىڭداپ.
ادامى ءبىزدىڭ اۋىلدىڭ
اق كوڭىل، ادال، اڭقىلداق.

جاندىرعان جاقسى ەلەستى وي،
جاتىرقار جاندار ەمەس قوي.
اۋىلدىڭ ءاربىر ادامى-
شەتىنەن ىلعي كەڭەسقوي.

جايلاۋعا جازداي بارعالى،
ىڭعايلاپ تاستاپ شارۋانى.
اق باتا تىلەپ الدىڭدا،
تۇرادى ءبىر- ءبىر باعلانى.

وتەدى كۇندەر تىزبەكتەپ،
نەسىبە بەرىپ بىزگە وكتەپ.
قۇستارداي قايتىپ بارامىن،
جەرۇيىعىمدى ىزدەپ كەپ.

10c62d0d-c51e-46ec-800e-9f708e232418

 

26fbda96-0b2e-4255-a260-58c63715631f

94dae63f-e5e8-4b1e-b2f4-0897eaa72aba

37cb7195-b062-45f9-ae6a-aad4a51d14fb

013c3b24-998c-4d87-a762-198c2fce0438

 

79900b80-4d80-480d-9136-b98abbad4212

1657119d-e97c-420c-a20f-43aad3641cb9

a2f059376ae29806520a9b7a36e3f938

بەرىمباي ىسقاق ۇلى – قازاقتىڭ ارقالى اقىنى. قازاقستان جازۋشىلار وداعىنىڭ مۇشەسى. قالامگەر ءسوز ونەرىمەن قاتار دارىندى سازگەر، ۇلاعاتتى پەداگوگ. بەرىمباي ىسقاق ۇلى 1943 -جىلى 24 -ماۋسىمدا موڭعولياداعى بايان- ولگەي ايماعى قىزىلقايىڭ اۋىلى ماڭىنداعى قىزىلتوبە دەگەن جەرىندە دۇنيەگە كەلگەن.
بالالىق شاعى قىزىلقايىڭ اۋىلىندا وتەدى.

1959 -جىلى قىزىلقايىڭ اۋىلدىق ورتا مەكتەپتى، 1963 -جىلى ارحانعاي ايماقتىق مۇعالىمدەر تەحنيكۋمىن، 1972 -جىلى ۋلانباتىر قالاسىندا مۇعالىمدەر ينستيتۋتىن ورىس ءتىلى ادەبيەتىنىڭ ءمۇعالىمى ماماندىعىمەن بىتىرگەن.

1963-1967 -جىلدارى قىزىلقايىڭ اۋىلىندا باستاۋىش سىنىپ ءمۇعالىمى،

1972-1974 -جىلدارى

ولگەي قالاسىندا 8 جىلدىق ورتا مەكتەپ ديرەكتورى، 1974-1978 -جىلدارى 1-10 -جىلدىق مەكتەپتە ۇستاز، 1978-1979 -جىلدارى ۋكراينا ەلىندە كاسىپتىك- تەحنيكالىق ۋچيليشەدە اۋدارماشى، ۇستاز بولىپ ەلىنە ورالىپ,1979-2003-جىلعا دەيىن ۇستازدىق قىزمەتىن ابىرويمەن اتقارىپ زەينەتكە شىققان.

اقىن 2005 -جىلى تاريحي اتامەكەنى – قازاقستانعا قونىس اۋدارىپ، استاناعا ۋىعىن شانشىعان. بەرىمباي ىسقاق ۇلى 1992 -جىلى I دۇنيەجۇزىلىك قازاقتار قۇرىلتايىنا قاتىسىپ، اقىندار ءمۇشايراسىنان باس جۇلدە جەڭىپ الىپ، ماراپاتتالعان.

2002 -جىلى II دۇنيەجۇزىلىك قازاقتار قۇرىلتايىنا ەكىنشى مارتە قاتىسىپ، اقىندار ءمۇشايراسىنان 1 ورىن يەلەنگەن.

بەرىمباي ىسقاق ۇلىنىڭ 20 شاقتى اۆتورلىق اندەردىڭ اۆتورى. اقىن 2010 -جىلى 2 -ناۋرىزدا استانا قالاسىندا دۇنيەدەن ءوتتى. سول جىلى «سەزىم سەلى» اتتى جىر جيناعى جارىق كورگەن.

بەرىمباي ىسقاق ۇلىنىڭ ەڭبەگىن موڭعوليا مەملەكەتى جوعارى باعالاپ، «ەڭبەك قىزىل تۋ» ، «التىن جۇلدىز» وردەندەرىمەن، تاعى باسقا مەدالدارىمەن ماراپاتتاعان.

ارتىندا 7 بالاسى قالدى. بالالارى استانا قالاسىندا ءار سالادا جەمىستى ەڭبەك ەتۋدە.