«ديماشتىڭ بلوگىنا ءۇش كۇندە جارتى ميلليوننان اسا ادام تىركەلدى»

قىتاي ورتالىق تەلەارناسىنىڭ (CCTV) ينتەرنەتتە اقپارات تاراتۋ ورتالىعىنىڭ قازاقشا ءبولىمى رەداكتورى ىبىراي دۇيسەن ۇلىنىڭ ديماش قۇدايبەرگەننىڭ «ءانشى» باعدارلاماسىنا قاتىسۋى توڭىرەگىندەگى اڭگىمەسى.

ديماش باسىندا سونشا ەلەنگەن جوق

21 -قاڭتار، ۋاقىت تۇنگى 22:30. «حۋنان» تەلەارناسىنداعى ء«انشى» باعدارلاماسىن ميلليونداعان كورەرمەنى اسىعا كۇتىپ وتىر. ويتكەنى، بۇل قازىرگى قىتاي جاستارىنىڭ ەرەكشە ىقىلاسىنا بولەنگەن بىردەن-ءبىر باعدارلاما دەسە دە بولعانداي. قازاقستان ەلىنىڭ ۇكىلەپ قوسقان ءۇمىتى ديماشتىڭ كەلىپ قاتىسۋى ءبىزدى ءتىپتى دە تىقىرشىتتى.

بۇل باعدارلاما 2013 -جىلى باستالعان. قىتايشادان تىكەلەي اۋدارعاندا «مەن ءبىر ءانشىمىن» دەپ اتالاتىن. بيىل اتى «ءانشى» دەپ وزگەرتىلدى. بيىل بەسىنشى ماۋسىمى. باعدارلاما ەرەكشەلىگى – كىل تانىمال انشىلەردىڭ قاتىساتىنى. اۋەسقوي انشىلەر بۇل باعدارلامانىڭ بوساعاسىنان سىعالاي المايدى.

حابار ءتۇسىرىلىمى باستالىپ، كۇنى كەشە تاراتىلعانعا دەيىن «انشىگە» قاتىساتىن ءاربىر ءانشىنىڭ جارنامالارى كۇن سايىن جىبەرىلىپ جاتتى. ديماشتان وزگە انشىلەر ەل ىشىندە ابدەن تانىمال بولعان، اسا مول جانكۇيەرلەر جيناپ ۇلگەرگەنى بەلگىلى. سوندىقتان كوپ ساندى كورەرمەن ديماشتان وزگە انشىلەردى اسىعا كۇتتى. ال ديماشتىڭ جارناماسى ونىڭ كەلبەتتى جىگىت ەكەنىن ايعاقتايتىن ءبىردى- ەكىلى فوتوسى بولماسا، سونشا كەرەمەت كورسەتىلگەن جوق. سوندىقتان العاشىندا ديماشتىڭ جانكۇيەرلەرى تۇگەلدەي وسىنداعى قازاقتار بولعانى انىق. ال ميللياردتان اساتىن قىتايداي الىپ ەلدىڭ الدىندا، جالعىزدىڭ ءۇنى شىقپاس دەگەندەي، ءبىزدىڭ از عانا قازاق جانكۇيەر بولىپ جارىتار ما؟ دەگەنمەن، ديماشتىڭ تالانتى مەن تالابىنا، «ءانشى» باعدارلاماسى باستالا سالىپ قىتايدىڭ ءان كەڭىستىگىندە عاجايىپ «جارىلىس» جاسايتىنىنا وسى از عانا جانكۇيەرلەر ءشۇباسىز سەنگەندەي. وعان باعدارلاما شىقپاس بۇرىن جازىلعان پىكىرلەر دە دالەل جانە باعدارلاما ءتۇسىرىلۋ بارىسىندا سولاردىڭ اراسىندا قاراڭداپ جۇرگەن جانكۇيەرلەر رەتىندە دە انىق ايتا الامىز.

سونىمەن ديماشتىڭ قىتايداعى قانداس باۋىرى، ءوزى دە ءار ەلدە وتكەن ءتۇرلى ءان بايقاۋلارىندا قازاقتىڭ اتىن اسقاقتاتىپ جۇرگەن ارايدىڭ جاقسىلاپ تانىستىرۋىمەن ساحناعا كوتەرىلگەن ديماش فرانسۋز تىلىندەگى الەمدەگى وتە كۇردەلى ءاندى قاي دەڭگەيدە ايتقانىنا وزدەرىڭىز كۋاسىزدەر. ونىڭ ساحناداعى كورسەتكەن ونەرىن «ءانشى» باعدارلاماسىنىڭ الەۋمەتتىك جەلىدەگى تەكسەرۋ ناتيجەسىندە «ديماشتى تەك بويى بيىك، كەلبەتتى جىگىت ەكەن» دەپ ويلاپ ەدىم، ا دەپ اۋىز اشقان ساتىندە-اق، ونىڭ الدىندا تىزەرلەۋگە شاق قالدىم» دەپ پىكىر ايتۋشىلار جانە وسى پىكىردى قوستاۋشىلار ميلليونداپ سانالادى دەۋگە بولادى.

ديماش ەكى بىرىنشىلىككە قاتار قول جەتكىزدى

ديماش تەك كورەرمەن مەن تىڭدارماندى عانا ەمەس، كاسىبي مامانداردى دا تاڭعالدىردى. باعدارلامانىڭ سوڭىنداعى بيلەت تاستاۋ (داۋىس بەرۋ) راسىمىندە ديماش ەكى ءتۇرلى بىرىنشىلىككە قول جەتكىزدى. باعدارلاماعا قاتىسقان انشىلەردىڭ ءوزارا بيلەت تاستاۋىندا ديماش پەن گونكونگتىق دۋ ليشا ءبىرىنشى بولدى. بۇل دەگەنىمىز وسى ءبىرىنشى بولعاندار كەلەسى كەزەكتى باعدارلامادا نەشىنشى رەت ءان ايتىپ شىعاتىنىن ءوزى بەلگىلەي الاتىن قۇقىعىن دا الادى دەگەن ءسوز. وسى ارادا ايتا كەتەرلىك ءبىر جايت – ديماشتىڭ نە ءۇشىن ءبىرىنشى كەزەڭدە العاش ساحناعا كوتەرىلگەنى. جارىستىڭ الدىندا «ءانشى» باعدارلاماسى جانكۇيەرلەردىڭ قايسى ءانشىنى قانشالىقتى كۇتەتىنىن تەكسەرگەن. ناتيجەسىندە لين ي- لياندى كورۋدى قالايتىنداردىڭ سانى ەڭ كوپ بولعانى سەبەپتى ول ەڭ سوڭىنان ساحناعا شىقتى. ياعني، ءانشىنى ساحنادان كورۋدى قالايتىنداردىڭ سانى بويىنشا رەتكە تۇرعىزعاندا، جانكۇيەرى ەڭ كوبى سوڭىنان، ەڭ ازى الدىمەن شىعاتىنى تۇسىنىكتى عوي. ديماش جانكۇيەرى ەڭ از بولعانى سەبەپتى، ەڭ ءبىرىنشى ساحناعا كوتەرىلدى. ال ناق ءتۇسىرىلىم الاڭىنداعى 500 تىڭدارماننىڭ بيلەت تاستاۋى ناتيجەسىندە ديماش ءبىرىنشى ورىندى، لين ي- ليان ەكىنشى ورىندى، دۋ ليشا ءۇشىنشى ورىندى يەلەندى.

ميكروبلوگىنا مينۋت سايىن مىڭداعان ادام تىركەلىپ جاتتى

3

«ءانشى» باعدارلاماسىنا قاتىسا سالىپ ديماش شينلاڭ الەۋمەتتىك جەلىسىنەن ءوز بلوگىن اشقان بولاتىن. باعدارلامانىڭ جارناماسى بەرىلە باستاعاندا ديماشتىڭ ميكروبلوگىنا تىركەلگەن جانكۇيەرلەر سانى وتىز مىڭعا دەيىن عانا كوتەرىلدى. مۇنىڭ 90 پايىزى قازاق ەكەنى بەلگىلى. ال «ءانشى» باعدارلاماسى بەرىلە سالىپ كوپ وتپەي ديماش تۋرالى اقپاراتتاردىڭ كورىلىمى ەل ىشىندەگى ەڭ ۇلكەن سايتتاردا الدىڭعى ورىنعا شىقتى. ديماش تۋرالى اقپاراتتار جانە ونى ىزدەۋشىلەردىڭ سانى تۇتاس قىتاي كەڭىستىگىن شارلاپ كەتتى دەۋگە بولادى. تۋرا سول ساتتەن باستاپ ديماشتىڭ ميكروبلوگىنا تىركەلۋشىلەر مينۋت سايىن مىڭنان ارتتى. باعدارلاما باستالار الدىندا 30 مىڭ عانا ەدى، بۇگىن قاراعانىمدا (23 قاڭتار 22:24) 542 817-گە جەتىپتى. تۋرا قازاق ەرتەگىلەرىندەگى ساعات سايىن وسەتىن باتىرلار ەسكە تۇسەدى مۇندايدا.

كاسىبي ماماندار تاڭداي قاقتى

«ءانشى» ساحناسى ءاندى ورىنداۋ بارىسىندا بۇرىنعى ورىندالعان نۇسقالارمەن ۇقسامايتىن، ءاننىڭ باسقاشا قىرى مەن ءانشىنىڭ مۇمكىندىگىن بارىنشا اشاتىن ءتۇرلى نۇسقالاردى سىناپ كورەدى. وسىلايشا مۋزىكا ماماندارى ديماش ورىندايتىن فرانسۋز ءانىنىڭ ەڭ العاشقى وزگەرتىلگەن نۇسقاسىن ۇسىنادى. سونداي-اق، ديماشتان پىكىر العاندا ونىڭ الپەتىنەن الاڭداۋ بايقالدى. مۇنى تەلەديدار الدىندا وتىرعان كورەرمەننىڭ ءبارى كوردى. بۇل تۋرالى مۋزىكا مامانى: «باعدارلامانى ءالى دە جەتە ءتۇسىنۋىڭ كەرەك، ساعان قاجەتى تىڭدارمان ءانىڭدى ءۇنسىز، جۇرەكپەن تىڭداۋى عانا ەمەس، اۋەلى سول جۇرەگى جارىلارداي، ورنىنان تۇرىپ ايقايلاپ كەتەردەي دارەجەگە جەتۋگە تالپىنۋ كەرەك، سوندا عانا سەنىڭ يە بولاتىن ۇپايىڭ باسقا انشىلەردەن ۇستەم تۇرا الادى» دەپ ءتۇسىندىرىپ جاتقانىن دا ەستىدىك.

ەڭ سوڭعى ناتيجەنى جاريالايتىن شاقتا دا «ءانشى» باعدارلاماسىنىڭ رەجيسسەرى ديماشتىڭ باعدارلاماعا كەلگەن العاشقى كۇننەن ساحناعا شىققانعا دەيىنگى ارالىقتاعى ماشاقاتتى جاتتىعۋى مەن كوڭىل-كۇيىندەگى تولقىنىستاردىڭ قانشالىقتى كۇردەلى بولعاندىعىن جانە باعدارلاما ءۇشىن اسا مۇقيات دايىندالعانىن جاپ-جاس ءانشىنىڭ جانكۇيەرلەرى الدىندا جاۋاپكەرشىلىكتى سونشالىقتى بيىك دەڭگەيدە سەزىنەتىندىگىن ەرەكشە ريزالىقپەن ايتىپ ءوتتى.

كەلەسى كەزەڭ…

باعدارلامانىڭ ەرەجەسى بويىنشا ءار اپتادا ءبىر قاتىسۋشى شىعىپ قالىپ، ورنىنا جاڭا ۇمىتكەر قوسىلىپ وتىرادى. كەلەسى كەزەڭنەن باستاپ ديماش وزگە تانىمال انشىلەردىڭ تانىمال اندەرىن ورىنداۋى كەرەك. قىتايشا ءان ايتۋ مۇمكىندىگىن دە جوققا شىعارۋعا بولمايدى. وسىدان ءبىراز بۇرىن ديماش حان حۇڭنىڭ «تاڭ اتتى» ءانىن اسا شەبەرلىكپەن ورىنداعانىن بىلەمىز. ءقازىر «ءانشى» باعدارلاماسىنىڭ ەكىنشى كەزەڭى ءتۇسىرىلىپ بولدى، ديماشتىڭ قايسى ءاندى ورىنداعانى جانە نەشىنشى ورىندى يەلەنگەنى ازىرگە قۇپيا. دەگەنمەن، بەيرەسمي اقپارلارعا قاراعاندا، ديماش ۆيتاس «وپەراسىن» ورىندادى جانە ءبىرىنشى ورىنعا يە بولدى دەگەن سوزدەر بار. بۇيىرسا بۇل «جۇمباقتىڭ» شەشىمىنە الداعى سەنبى كۇنى كۋا بولامىز.

جازىپ العان ۇلاربەك نۇرعالىم ۇلى،
«ەگەمەن قازاقستان»

1 پىكىر

  • كەرەمەت…ديماش كازاقتىڭ ماقتانىشى…تىل كوزدەن ساقتاسىن!!!امان بولسا تالاي اسۋلاردان سۇرنبەي ءاساتىنىننا !!!اللاحىم جار!!!!