“الماس قىلىش” جايلى ايتارىم..

15977560_1806089966331322_4460640417588618779_n
وسىندا ەكىنىڭ ءبىرى «الماس قىلىشتى» تۇسىرگەندەردىڭ ارتىنان قۋىپ ءجۇرىپ، قۇمالاعىن ءتۇسىرىپ، ودان قي ۇيەمىن دەپ ءۇستى- باسى سادىرا- سادىرا بوپ جاتىر عوي.

15895386_1806089962997989_7629356116042880998_n
سونشالىق رەپەتسىز ءراسۋا تۇسىرگەنى نەسى دەپ شىرت تۇكىرىپ، بۇل ءفيلمدى قانداي شارتپەن دە كورمەسپىن دەپ شەشكەنمىن. ءسويتىپ، كەشە كوردىم. قۇداي- اۋ، سونشا قارا اسپاندى توندىرگەندەرىڭدى بولايىن – جاپ- جاقسى فيلم بۇل!
تاريحي دالدىگىمەن تاڭ قالدىرماسا دا، كولا ارالاس قانىمىزدا جۇرگەن قازاق دەگەن تۇيىرشىكتەردى تىتىركەندىرەر تۇسى از ەمەس. اسىرەسە، كەرەي مەن جانىبەكتىڭ، قاسىم مەن بۇرىندىقتىڭ اعايىنشىلىق اراسىن، باۋىرلىق سەرتىن ادەمى اشىپ بەرگەن. قاسىم مەن شاح مۇحاممەدتىڭ انالارىنىڭ الدىنا بەرگەن ۋادەلەرىن قانداي قيىن جاعداي بولماسىن ساقتاعانىنىڭ ءوزى نە تۇرادى؟ قيلى زامانداعى تەكەمەت استى قۋلىق، تەكتىلىك پەن ساتقىندىق، جاۋدىڭ كوزىنە جاۋتاڭداعان ءماجبۇر كۇي، الاڭ كوڭىلدى سەزدىرتە الدى. ءبىز سارقىنشاعىن سۋۆەنيردەي ساقتاپ جۇرگەن قازاقى بولمىستىڭ ەرگە جاراسار، قىز- قاتىنعا لايىق ءپىشىنىن كوز الدىمىزدا ەكى ساعات ۇستاپ تۇردى. شوكىمدەي قازاقتىڭ تابانىنا شوڭگە بوپ كىرگەننەن باستاپ شۇيدەسىنە شوقپار بولىپ تيەتىن شاش جەتپەس ماسەلە شيراتادى، بار شە.. . وسىنىڭ ءبارى ايتۋعا وڭاي بولعانمەن، ءسىز يلانارداي اتموسفەرانى جاساۋ يتتىرلىك ەكەنىن بىلەسىز.
جانىبەكتى سومداعان ەركەبۇلان دايىروۆ وسى وبرازىمەن جەكە رەيتينگىمدە وتاندىق اكتەرلار بىرىنشىلىگىنەن بەرىك ايتجانوۆتى بۋلدوزەرمەن ىسىردى. موينىنا العان جاۋاپكەرشىلىگىنىڭ سالماعىنا مويىمايتىن قايسار سۇلتاننىڭ تىزەسىنە تىزەڭ ءتيىپ وتىرعانداي ەنەرگەتيكا ەكراننىڭ ار جاعىنان تەبەدى- ەي. ءشايبانيدىڭ رولىندەگى دوسحان جولجاقسىنوۆتىڭ شاڭقىلداعان داۋىسى قانداي، ايشۆاريانىڭ ايگىلى «ۋمراو جاانداعى» كەيپىنە جەتەعابىل قالعان قارلىعاش مۇحامەدجانوۆانىڭ الپەتى قانداي.. . باسقا اكتەرلىك قۇرامنان دا كوتەرەمىن كورمەدىم. فيلمدە بىرنەشە ۇرىس ساحناسى بولعانمەن، ءىرىسى – بىرەۋ. ارينە، تايۆاننىڭ «كەمپىرقوساق باتىرلارىنداعى» ساحنالاردى اڭساعانمەن، ءبىزدى بالاسىن ارقاسىنا تاڭىپ الىپ، جەبەسىن جاۋعا جاۋدىرعان باتىر انالاردىڭ وبرازى- اق تويدىردى. تالاسبەك اسەمقۇلوۆ جازىپ كەتكەن جاۋگەرشىلىكتە باستىرما جەپ، ساپسەم سۋ بولماعاندا اتتىڭ جالىن قاناتىپ جىبەرىپ، قانىن ءىشۋ دەگەن تاسىلدەردى دە كورسەتۋگە بولار ما ەدى، كەلەسىسىنەن كۇتەمىز ەندى.
توقەتەرى، كوڭىلدەن شىقتى. تىم جۇرەككە تيەتىندەي پافوس تا بايقامادىم. ايتپاقشى، ءقازىر كينوتەاتردا كورسەتىپ جاتقان ورىستىڭ «ۆيكينگىنە» دە بارعانمىن. «الماس قىلىشتىڭ» ورىسشا بالاماسى. ونىنشى عاسىردا ەجەلگى ءرۋستى ەن جايلاعان ءۇش كىنازدىڭ اراسىنداعى الاۋىزدىق، اقىرى سونىڭ بىرەۋىنىڭ العاش پراۆوسلاۆيەنى قابىلداۋى جايلى. سول فيلمگە قانشا ميلليون دوللار سالدى، قانشا جارنامالاپ باقتى، ءبىراق ءىش كەپتىرەر بىلامىق بولىپ شىقتى.
كورشىمىزدە «ۆيكينگتە» تاريحي شىندىق بۇرمالاندى دەپ كينوتەاترلاردان كورسەتپەۋ تۋرالى ينتەرنەت- پەتيتسياعا قول جيناپ جاتىر. بىلەرىم، «الماس قىلىش» «ۆيكينگتەن» الدەقايدا جۇمىر شىققان. ارينە، سىزدەر تىزگەن كەمشىلىكتىڭ ءبارى بار كارتينادا. قوبىلاندىنىڭ اتى نەگە ءجيى اۋىسادى، ەكى عاسىر كەيىن تۋاتىن قازتۋعان جىراۋ مۇندا قالاي ءجۇر دەگەن سىناي بەرەمىز عوي، سىناڭدار. مەن مىنا جەردەن كامشات جولدىبايەۆانىڭ سومداۋىنداعى اققوزىنى قابىلداي المادىم دەپ سىنايىن، مىسالى. بىلمەدىم، كامشات اق كيمەشەكتىڭ استىندا قارا لاتەكستە جاتقانداي، كەرەۋەتىنەن اتىپ تۇرىپ، «بىرگە! بۇكىل الەم ورانسىن باقىتتتى ءبىر كۇيگە» دەپ بيلەپ كەتەتىندەي قورقىپ وتىردىم)
ونى قويشى، ماعان ەرەكشە ۇنايتىن مەل گيبسوننىڭ «باتىل جۇرەك» ءفيلمى تولىپ تۇرعان قاتەلىك قوي، قاراساڭىز. ۋيليام ۋوللەس پەن جاساعى جاۋىن شوشىتۋ ءۇشىن بەتىنە جاسىل بوياۋ جاقتى، ءيا؟ بۇل ءداستۇر شوتلاندتاردىكى ەمەس، ەجەلگى كەلتتەردىكى. كەلتتەر جىندىشاتىس بولعان با بىردەڭە، جاۋىنا تىر جالاڭاش شاپقان عوي) ون ءۇشىنشى عاسىردا ونى ەشكىم قولدانبادى. سول فيلمدە شوتلاندتاردىڭ ءبارى الگى يۋبكاسىندا شاۋىپ جۇرەدى، ءبىراق ول وقيعا بولعان زاماننان كەمى 200 جىلدان كەيىن قولدانىسقا ەنىپ ەدى. وسىلاي قاتەسىن شاشتان بيت سىققانداي شىرتىلداتا بەرۋگە بولادى.
ەندى وسى اركىمنىڭ سىنىن ارىگە قويىپ، ءسال مەملەكەتي كوزدى سىعىرايتىپ قاراساق، كەسەك دۇنيە كورىنەدى «قىلىشتان» . ءفيلمنىڭ سوڭىنداعى كەرەيدى اق كيىزگە كوتەرىپ، حان كوتەرگەن ساتتەگى جۇرتتىڭ «الاش!» ، «الاش!» دەپ ۇرانداعان ءساتى call to action ەمەي، نەمەنە؟ ءدال وسى فيلمگە كەلگەندە مانيكيۋر جاساۋعا (تىرناق استىنان كىر ىزدەۋ) دىم ىنتام جوق. كەشە ادامنىڭ قاراسى قالىڭ بولعان- دى سەانستا. سوڭىنان ءبارى قول شاپالاقتادى. ءدال جانىمدا ەدىرەڭدەگەن ءتورت جىگىت ءار ساحناعا پريكول ۇستاپ، جىنىما تيىڭكىرەپ وتىرعان. ءفيلمنىڭ ۋاقىتى سىرعىعان سايىن سوزدەرى ازايىپ، سوڭىنان «ە، نورمالنىي فيلم، نورمالنىي» دەپ قاۋقىلداسىپ شىقتى. بىزگە كەرەك ءفيلمنىڭ باعاسى وسىلاي بەرىلەدى ەمەس پە؟
مارعۇلان اقان (Margulan Aqan) جازباقشى، «سەن كىمسىڭ ەي، شىڭعىس ۇرپاعىنىڭ الدىن بوگەيتىن» دەگەن كەرەيدىڭ ءسوزى، ويراتتىڭ كەۋدەسىنە تىرەلگەن قامشىنىڭ سۇستى بەينەسى.. . ءبارى ەسىمدە.
تاريحىمىزدى وزىمىزگە شەتەلدىك اكتەرسىز تانىستىراتىن فيلمگە جالعىز بارايىق، وتباسىمىزبەن بارايىق، ۇجىم بولىپ بارايىق!
بارا الماساڭىز دا، وسى ءفيلمنىڭ داقپىرتىن جاساپ، جارناماسىن جەتىستىرىپ جىبەرەيىك!
سەنەن اياعانىمدى يت جەسىن دەگەندەي، كۇندە مۇنداي كينو تۇسىرىلە بەرمەيدى، كورىڭىزدەر!
وركەن كەنجەبەك، بلوگەر

2 پىكىر

  • بۇل كىينونىڭ تولىعىن قىتاي رەسپوبىليكاسىنداعىلار كورىپ بولمادى مەكەن دەپ ويلايىم دەگەنمەن سىندارلى باعا بەرۋ ۇشىندە تاريق عىلىمىن مەڭگەرگەن ادام بولۋىمىز كەرەك ال مەنىڭ ايتارىم كورىنىسىندە بولاتىن سىياقتى سول كورىنستىڭ وزىندە كينونىڭ تولىعى دەپ تالاي الدادىعوي قازاقتىڭ قايسى بىر تاريىقي كينوسى بولسىن سايسكەرلىگىن وتە از كورسەتەدى مىسالى سپارتاكتىڭ ومىرى جاۋگەرشىلىك سوعىسپەن ءوتتى كينوسى سونى بەينەلەپ بەرەدى بىراقتا قازاق مەمىلەكەتىنىڭ قۇرىلۋىن باياندايتىن بولعانسوڭ ارقايسىمىز كەڭ ويلانىپ جاۋاپ بەرەيىك قازاق مەمىلەكەتىنىڭ قۇرىلۋى وڭايعا تۇسپەگەنى سىياقتى كينوسىدا وڭاي جاسالا سالماسىن مەن ۇشىن كەلدەن باتىر قۇرالايدىڭ ۋاقيعاسى بۇكىل قازاق سول تۇستاعى بۇكىل قازاق ءومىرىن بەينەلەي الادى دەپ ويلايىم شىركىن اقشام بولعاندا وسى ۋاقىيعانى اينى ءوزى كۇيىنشە جارىققا شىعارار ەدىم