ۇلىقبەك ەسداۋلەتتىڭ ەڭ تاڭداۋلى جيناعى جارىق كوردى

15894700_10208339406583789_2231412318578317667_n

بۇل تۋرالى اقىن ءوزىنىڭ فەيسبۋك الەۋمەتتىك جەلى پاراقشاسىندار جاريالادى.
“سامىرسىن” اتتى جيناعىم جارىق كوردى.. .” دەيدى ول.

” وتكەن جىلدىڭ سوڭىندا “ولجاس كىتاپحاناسى” باسپاسىنان تاڭداۋلى ولەڭدەرىمنىڭ قويىن قالتاعا سيارداي جيناقى جيناعى شىقتى. ءومىر بويعى جازعان جىرلارىمدى ىرىكتەپ، سۇرىپتاپ، شاعىن ءبىر تومدىق جۇقالتاڭ كىتاپ ەتىپ قۇراستىرىپ بەرگەن – سارابدال ساراپشى، ايماڭداي اقىن، تالعامى بيىك تارلان تالانت تالعات ەشەن ۇلى باۋىرىما شىن جۇرەكتەن ريزاشىلىق بىلدىرەمىن! پورترەتىمدى دە تاڭداعان ءوزى.

سول جيناقتان ءار جىلداردا جازىلعان بىرنەشە ولەڭ ۇسىنىپ وتىرمىن. ” دەپ تومەندەگى ولەڭىن جاريالادى.

* * *
ءبىر ولەڭدى قانىممەن،
ءبىر ولەڭدى – كوز جاسىممەن جازدىم،
كۇيىپ- جانعان جانىممەن،
ىشىمدەگى بالقىعان قورعاسىنمەن جازدىم.
جانارتاۋى اتقىلاي بەرگەسىن،
الاسۇرعان جۇرەگىمدى قازدىم.

پەشەنەمنىڭ پەردەسىن
جۇلسام دەگەن تىلەگىمدى جازدىم.
قازاعىمنىڭ قايعىسىن بولىسسەم،
قاسىرەتىن كومىسسەم دەدىم.
ۇلتىمنىڭ ۋىزىن ۇرپاققا ۇرتتاتىپ،
ۋ مەن ءزارىن بولە ىشسەم دەدىم.
جازدىم.. . جازدىم.. .

* * *
وتامالى ويىلعان قىس ءوتتى مە؟
بەس توعىستىڭ بەت جۋارى جەتتى مە؟
قىردا قىزىر قامشىسى ويناپ كوك تىلە،
وركەش بۇلتتار ورلەۋىتكە شوكتى مە؟

ماڭدايدا – كۇن، تاباندا – توڭ، دالا – سىز،
بەسقوناق تا باستان ءوتتى- اۋ اناسىز.. .
جەتىم كوڭىل قوڭىلتاقسي بەرەدى،
بۇل زاماندا جۇرەك بار ما جاراسىز؟

يت شۋاققا يتىنەدى يتمۇرىن.. .
قۋ جانىمدى شوققا سالىپ ءۇيتتى كىم؟
كوتەرە الماي كەيبىرەۋدىڭ يتتىگىن،
كوڭىلىمدە جۇگىرەدى يت قىرىن.

ۇيىق سۋ بوپ ويدىم- ويدىم كورپەشىك،
ۇيەزدەيدى ۇيەڭكى ءۇنسىز سەل كەشىپ.
كەۋدەمدەگى سىزداۋىقپەن تىلدەسەر،
كەڭسايداعى قاراۋىتقان تومپەشىك.. .

بالبال جىرى

ءومىر،
ساعان
كەلدىم — كەتتىم،
سوندا نەنى تىندىردىم؟ —
زەرىن تەرىپ زەڭگىر كوكتىڭ،
بوتانانى تۇندىردىم.

ءومىر،
ساعان
باردىم — قايتتىم،
تاڭعى شىقتى مەكەندەپ،
قۇدايىما قايعىڭدى ايتتىم،
قۇلاق تۇرەر مە ەكەن دەپ.

شىققىر كوزدى
اشتىم — جۇمدىم،
شولدىم بيىك، تومەندى,
تىلىن جۇتقان تاس تۇنجىرمىن،
سويلەتپەڭدەر، مەنى ەندى!

ءجانتاسىلىم

قۇم باسىپ دالانى
ءىز بىتكەن جىمداسىپ بارادى،
وپاسىز مىناۋ جالعانعا
كىم عاشىق بولادى؟

ءسال توقتالىڭدارشى،
كوزىم تۇك كورمەي قالدى،
اڭعالاعىنا قادالعان
وقتى الىڭدارشى،
ەڭسەمدى كوتەرەيىن،
ەي، اسپان،
توبەمنەن توقپاعىڭدى الشى،
دۇنيە نەگە قاراڭعى،
وت جاعىڭدارشى؟ !.

بۇل جاقتا ەبەلەكتەر كوپ،
سايتان كوبەلەكتەر جوق،
مەنى تىرىدەي كومگەن بە، نەمەنە،
بارامىن كەرەمەت تەرلەپ؟ ..

سىر ساقتا، ۇلىم،
(ءبىر ءسات تانىدىم) ،
ايىرماشىلىعىن مەن ايتسام
ەنە مەن جەردىڭ قۇرساقتارىنىڭ،
مىنا جەل قايدان اكەلدى,
ءيىسىن گۇل شوقتارىنىڭ؟

سۋىرىڭدارشى وقتى،
اجىراتىڭدارشى توكتى.. .

پۇشايمان

ءبىتىپتى دەيمىن تۇسىمدە قوس قانات ماعان،
قوس توپشىم بار دا قولىم جوق،
قوستان اتتانام.. .
قاتار دا قاتار قاپتاعان قاۋىرسىنىمدى
كەرەگەدەي عىپ جايام دا دوسقا ماقتانام.

ءۇزىلىپ بىرەۋ قارايدى،
ءسۇزىلىپ بىرەۋ،
قىزعانىپ بىرەۋ قارايدى،
قىزىعىپ بىرەۋ.
اسپانداپ ۇشىپ، بيىكتەن قۇيىلىپ ءتۇسىپ،
جارقىلداپ وتكەن جاسىننان قىز ۇمىتتىلەۋ.

قارا ەرتىس دەدىك، سارىسۋ، اقجايىق دەدىك،
قالىقتاپ ۇشىپ، الەمدى قاق جارىپ كەلىپ،
قيادان شالىپ، قاراعىم، قاتارلاس قوندىم،
قيۋى كەلدى دۇنيە جاپ- جارىق بولىپ.

باستاعى باعىڭ كورسەتسە تۇرلاۋسىز قالىپ،
وينايدى- اۋ تاعدىر جاراڭا ىڭعاي تۇز جاعىپ.
قولدارىم قايدا ءوزىڭدى قاپسىرا قۇشار؟ !
قور بولدىم قاناتتارىمنان ىڭعايسىزدانىپ!

جاپ- جارىق زالدا
جاپپاي ءبي، تىنباي قىزعان ءان،
بيلەيىكشى دەپ، بۇرىلىپ ىمدايسىڭ ماعان.
قۇشاقتاپ سەنى بيلەر ەم،
قۇشار ەم تاس قىپ،
اتاڭا نالەت قاناتتان ىڭعايسىزدانام!

ەپوسقا ەلىكتەۋ

سۇيگەنىڭ قانداي دەيسىڭ سەن:

كۇندى كور دە – ءوزىن كور،
ءتۇندى كور دە – كوزىن كور.
ايدى كور دە – قاسىن كور،
ءداريانى كور دە شاشىن كور.
اي مەن جۇلدىز، كۇن – ءبارى
ءجىپ ەسە الماس جولىنا.
پەريزات، حوردىڭ قىزدارى
سۋ قۇيا الماس قولىنا!
مۇنتاز مىنەز، شىراق وي،
تالشىبىقتاي تۇلا بوي.
بالاۋىزداي بال ەرىن،
بۇل قىزدى سۇيمەۋ كۇنا عوي؟ !.

.. .سۇيگەنىڭ قانداي دەيسىڭ سەن!