ۇلاربەك نۇرعالىم ۇلى. ۇنسىزدىكتىڭ داۋىسى

ءيا، بۇدان ىلگەرى ىلكى ءداۋىر،
كىسىلىكتىڭ كوتەرىپ قۇلپىن اۋىر،
تاۋ بىلسە دە، جاۋ بىلمەس سىرىن، مۇڭىن،
كوشىپ- قونىپ جۇرەتىن تىلسىم اۋىل.

تۇسىنىكتى قىز ءۇشىن، ۇل ءۇشىن دە،
ول اۋىلدىڭ بولاتىن ءۇنى – ىشىندە.
ونەگەلى ءسوز قالدى ولگەنىنەن،
ءتىس جارماعان سەكىلدى ەد، تىرىسىندە.

ءوزى شىعىپ، كۇن سىندى باتاتۇعىن،
ءوزى ىستەلىپ بار تىرلىك جاتاتۇعىن.
ماقتاۋ ەستىپ كورمەگەن ەشكىم وندا،
باسبارماقتىڭ باسىنان اساتۇعىن.

قيسىعىڭدى تۇزەۋگە قۇرعان تەزدى،
قاريا دەپ بىلگەيسىڭ قىران كوزدى.
موينىنا قوياتىن،
تەنتەگىنىڭ
ەتىگىنىڭ باسىندا تۇرعان ءسوزدى.

ءۇنسىز ۇعىپ ءقادىرىن ادال جاردىڭ،
ءۇنسىز الىپ قاقپاسىن قامالداردىڭ.
تاپ- تۇيناقتاي تىرلىگى دوڭگەلەيتىن،
اۋىزىنان قولى وزعان ادامداردىڭ.

عاشىق جىگىت ۇدەتىپ كۇندە اڭسارىن،
جۇرەگىندە بۇلقىنتار جىر كاۋسارىن.
جۇرەك ءسوزى كەستەلى ورامالدا،
ءۇنسىز قالعان اۋىلىندا قىز قالقانىڭ.

ءۇنسىز ءتۇننىڭ سەزبەسە مىسىن ءالى،
بۇلعاق ۇكى بويجەتكەن ۇشىنادى.
الجىعان يت اۋلاقتا الباتى ۇرسە،
قىز جەڭگەسى قىرىنان قىسىلادى.

بىزگە سىرى بولمايدى- اۋ وڭاي ءمالىم،
جانمەن ۇعىپ سەزەسىڭ سولاي ءبارىن.
جولعا ءسىڭىپ جوق بولدى سول ءبىر اۋىل،
تاۋعا سىيلاپ كەتتى دە سول ايبارىن.

قۇرمەتىڭ بار تۇگەنگە، پالەنگە دە،
ءبىراق ونى ايتپا دا، دالەلدەمە.
ساعىنىشى – مىسالى، ءۇنسىز، ءتىلسىز،
الدە قايدان جەتكەن ءبىر سالەمدەمە.

جوعالعالى سول اۋىل ءتىل ۇزارىپ،
سويلەيدى اركىم مىنبەدەن قۇزىر الىپ.
سودان بەرى نە مىقتىڭ سول « بيىكتەن» ،
ەستىمەسە ماقتاۋ ءسوز كۇنى عارىپ.

سونداي ءومىر وتۋدە، سونداي دا ءومىر،
قۇرعاپ بىتكەن قۇر سوزدەن تاڭداي نە ءبىر.
جۇزدەسكەندە ايتىلعان ماداعىڭدى،
توپ ورتاعا سالماساڭ تولماي كوڭىل. . .

اسپانىندا بۇلتى جوق تەڭگەدەي دە،
نوسەرلەتكەن قارايسىڭ جەلبەگەيگە.
جوتكىرىنىپ ءسوز الام جۇرت الدىندا،
تاۋعا قاراپ قويام دا مەن دە كەيدە. . .

سول اۋىلدىڭ ءقادىرىن جەتە بىلسە،
ءۇنسىز ۇعىپ ءبىر- ءبىرىن كەشە بىلسە.
تۇسەر ەدىك مىنبەدەن،
جوعالعان جۇرت
تاۋداي بيىك تاعىنا كوتەرىلسە. . .

“قازاق ادەبيەتى” گازەتىنەن

15683164_1816059215308792_848148993_n

1 پىكىر