استانادا «25 جىلدىڭ 25 حيت ءانى» اتتى كونسەرت ءوتتى

ەل تاۋەلسىزدىگىنىڭ 25 جىلدىعىنا وراي استانادا «25 جىلدىڭ 25 حيت ءانى» اتتى كونسەرت ءوتتى. شيرەك عاسىر ىشىندە مادەنيەت سالاسىندا جەتكەن جەتىستىكتەرىمىز سارالانىپ، قازاقستاندىق ەسترادا جۇلدىزدارىنىڭ تانىمال اندەرى ورىندالدى. ن. ونەربايەۆتىڭ «اناشىم» ، ءو. التايەۆتىڭ «اق ساۋلەم» ، بايتەرەك توبىنىڭ «سەن» ، ق. نۇرتاستىڭ «بايقا» اندەرى، سونداي اق «مۋزارت» توبى، «وردا» توبى، ت. زابيروۆا، ن. ەسقاليەۆا، ت. اسار، ب. قورعان، ج. سەيفۋللين، ا. كەرىمبەكوۆا، د. تاڭاتاروۆ، د. احماديەۆا، ءقىدىرالى مەن قاراقات، ايشا مەن بۇركىت سىندى ءبىرقاتار انشىلەر ونەر كورسەتتى.

1991-2016 -جىلدار ارالىعىندا حيتكە اينالعان اندەر – ەل تاۋەلسىزدىگىنىڭ جەمىسى، تۇعىرى مىقتى قازاق دەگەن حالىقتىڭ باعا جەتپەس بايلىعى. تۋعان ەلىمىزدىڭ كوك بايراعىن الەمگە تانىتقان يبراگيم ەسكەندىردىڭ «كوك تۋدىڭ جەلبىرەگەنى» جاستىق جىگەردى، رۋحتى وياتاتىن، ناعىز پاتريوتتىق سەزىمدى بەينەلەگەن 2011 -جىلدىڭ ۇزدىك ءانى بولاتىن. مىنە، وسىنداي تاريح قويناۋىنا ەنگەن جىرلار، كورەرمەن ءۇشىن ءارى ىستىق، ءارى وتكەن كۇنگە ساياحات جاساۋمەن تەڭ.

«ەلىمىزدىڭ ءجۇرىپ وتكەن جولى، قالىپتاسۋى مەن دامۋىندا ءداستۇرلى ونەرىمىز، ونىڭ ىشىندە ءان سالاسى حالىققا ەتەنە جاقىن. حالىق كوڭىلىنىڭ حوشىن ىزدەگەندە ءان تىڭداعىسى كەلەدى، ءتىپتى ءان شىرقاپ تا جىبەرەدى. قوعامنىڭ قاي سالاسىن الىپ قاراساق تا دامۋ بار، جەتكەن جەتىستىگىمىز بار. ءبىزدىڭ ماقساتىمىز – 25 جىلدىڭ ەڭ ۇزدىك، جۇرتتىڭ جۇرەگىنەن جول تاپقان، ەلدىڭ اۋزىندا جۇرگەن اندەردى حالىققا ساحنادان كورسەتۋ. ءبىر جاعى مەرەكەلىك كونتسەرت بولسا، تاعى دا ءاننىڭ، ونەردىڭ، مادەنيەتتىڭ ناسيحاتى» ، – دەيدى ق ر ەڭبەك سىڭىرگەن مادەنيەت قايراتكەرى، ءانشى نۇرلان ونەربايەۆ.

ايمان مۇقىشەۆا

«ەگەمەن قازاقستان»