بۇگىن ەلباسى قازاق كوشىنە جول اشقان كۇن

20161118104612

 بۇگىن قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ الىستاعى اعايىننىڭ ەلگە كەلۋىنە مۇمكىندىك جاساپ، «قازاق كوشىنە» جول اشقان كۇن.

بيىل ەل تاۋەلسىزدىگى مەن ەلباسى تيەگىن اعىتقان ۇلى كوشكە – 25 جىل تولىپ وتىر. 1991-جىلى 18- قاراشادا قازاق ك س ر جوعارعى كەڭەسىنىڭ شەشىمىنە سايكەس رەسپۋبليكانىڭ مينيسترلەر كابينەتى «اۋىلدىق جەرلەردە جۇمىس ىستەۋگە تىلەك ءبىلدىرۋشى بايىرعى ۇلت ادامدارىنىڭ باسقا رەسپۋبليكالاردان جانە شەت ەلدەردەن قازاق ك س ر- ىنا كوشىپ كەلۋى ءتارتىبى مەن شارتتارى تۋرالى» قاۋلى قابىلدادى، دەپ حابارلايدى قازاقپارات.

20 تارماقتان تۇراتىن ول قاۋلىدا باسقا رەسپۋبليكالاردان جانە شەتەلدەردەن قازاقستاننىڭ اۋىلدى جەرلەرىنە جۇمىس ىستەۋگە تىلەك ءبىلدىرۋشى بايىرعى ۇلت ادامدارىن قازاق ك س ر- ىنە قالاي اكەلۋدىڭ تەتىكتەرى مەن جولدارى، اۋىلدى جەرگە كوشىپ كەلگەن سوڭ ولاردى قۇجاتتاندىرۋ، سونداي-اق الەۋمەتتىك، دارىگەرلىك، ءبىلىم بەرۋ، تۇرعىن ءۇي، جاڭا ورتاعا بەيىمدەۋ سىندى تولىپ جاتقان ماسەلەلەر بويىنشا جەڭىلدىكتەر مەن كومەكتەر ۇسىنۋ ەگجەي-تەگجەيلى قاراستىرىلعان.

مىسالى، قاۋلىنىڭ 5-تارماعىندا «حالىق دەپۋتاتتارى جەرگىلىكتى كەڭەستەرىنىڭ اتقارۋ كوميتەتتەرىنە، اگروونەركاسىپ كەشەنىنىڭ كاسىپورىندارى مەن ۇيىمدارىنا باسقا رەسپۋبليكالاردان جانە شەتەلدەردەن قونىس اۋدارعان بايىرعى ۇلت ادامدارىن تۇرعىن-جايمەن قامتاماسىز ەتۋ ماقساتىندا جەكەلەگەن ازاماتتاردىڭ رەسپۋبليكادان كەتۋى ناتيجەسىندە بوساعان ۇيلەردى نەمەسە پاتەرلەردى ساتىپ الۋ ۇسىنىلسىن» دەلىنگەن.

سودان بەرگى شيرەك عاسىر ۋاقىتتا اتاجۇرتقا ورالعان قانداستارىمىزدىڭ سانى 1 ميلليوننان استى. بۇل، ارينە، ەلباسى نۇرسۇلتان ءابىش ۇلىنىڭ ەڭ جەمىستى ساياساتى دەسەك قاتەلەسپەيمىز. ويتكەنى، كەز-كەلگەن مەملەكەت ءۇشىن باستى قۇندىلىق – حالىق. اتا زاڭىمىزدا دا مەملەكەتتىڭ ەڭ باستى بايلىعى – حالىق، ءاربىر ازامات ەكەنى تايعا تاڭبا باسقانداي جازىلعان.

قۇدايعا شۇكىر، بۇل كۇندە قازاق ۇلتىنىڭ ۇلەسى 70 پايىزعا جاقىنداپ وتىر. بۇل ەلىمىزدىڭ تۇتاستىعى مەن قاۋىپسىزدىگىن بەكەمدەۋدە، بەرەكە-بىرلىگىن نىعايتۋدا ەرەكشە ءرول اتقاراتىنى بەلگىلى.

ايتا كەتەرلىگى، وسىنداي اتاۋلى كۇنگە وراي جاقىندا اقىن اۋىت مۇحيبەك ۇلى ۇكىمەتكە «قازاقستان رەسپۋبليكاسىنداعى مەرەكەلەر تۋرالى» 2001-جىلعى 13- جەلتوقسانداعى 267№-2 زاڭنىڭ 3-بابىنا تولىقتىرۋ ەنگىزىپ، 18- قاراشانى «ۇلتتىق كوشى-قون كۇنى» ەتىپ بەكىتۋ» تۋرالى باستاما كوتەرگەن بولاتىن.

بۇعان دەيىن بۇل كۇن اتاۋسىز ءوتىلىپ كەلگەن ەدى. سونىمەن قاتار، بيىل قازاق تاريحىنا التىن ارىپپەن جازىلۋعا ءتيىس وسى مەرەيلى مەرەكەنى ەلگە ورالعان اعايىن بۇگىن 18- قاراشادا الماتىداعى ستۋدەنتتەر سارايىندا «كوش جانە كوشباسشى» اتتى مەرەكەلىك كونتسەرتپەن ايرىقشا اتاپ وتپەك. شاراعا ق ر اقپارات جانە كوممۋنيكاتسيالار ءمينيسترى داۋرەن ابايەۆ قاتىسپاق.

كەشتە «كوش جانە كوشباسشى» اتتى دەرەكتى فيلم كورسەتىلەدى جانە ەلگە ورالىپ جەتىستىككە جەتكەن قانداستارىمىزدىڭ قازىرگى ءومىرى تۋرالى بەينەسيۋجەت ۇسىنىلماق.

سونىمەن بىرگە قازاقستاننىڭ ەسترادا جۇلدىزدارى ونەر كورسەتەدى دەپ كۇتىلۋدە. تاۋەلسىز قازاقستان ءۇشىن سول «ازاماتتىق قۇجاتتاندىرۋ تۋرالى» 711№ قاۋلى شىعارىلعان 18- قاراشا وتە ماڭىزدى تاريحي كۇن دەپ ەسەپتەلۋى ءتيىس. ويتكەنى، بەس قۇرلىققا تارىداي شاشىراپ كەتكەن قانداستارىمىزدىڭ باسىنىڭ ءوز وتانىندا بىرىگۋى وسى كۇننەن باستالدى.

سونداي-اق، بۇل قاۋلىنىڭ 1997-جىلى 13- جەلتوقساندا تۇڭعىش رەت قازاق تىلىندە قابىلدانعان، 2011-جىلى 22- شىلدەدە، 2013-جىل 15- جەلتوقساندا جانە 2015-جىلى 24- قاراشادا پارلامەنتتە ءۇش رەت وزگەرىستەر مەن تولىقتىرۋلار ەنگىزىلىپ، قازىر قولدانىستاعى «حالىقتىڭ كوشى-قونى تۋرالى» زاڭدى تۇزۋگە ءتۇپ نەگىز بولعانىن دا ايتا كەتۋىمىز كەرەك.

اۆتور: ريزابەك نۇسىپبەك ۇلى

قازاقپارات

2 پىكىر