ورالدا تەرمەشىلەر بايقاۋى ءوتتى

20161117233328-318x219

ع. قۇرمانعاليەۆ اتىنداعى وبلىستىق فيلارمونيا زالىندا بەلگىلى ءانشى- تەرمەشىلەر، مۇحيت مەرالى ۇلى اتىنداعى رەسپۋبليكالىق بايقاۋدىڭ ەكى مارتە باس جۇلدەگەرى جاقسىلىق سارسەنعاليەۆ، قازاقستاننىڭ ەڭبەك سىڭىرگەن ارتىستەرى قالامقاس وراشيەۆا مەن قالامپىر راحيموۆانى ەسكە الۋعا ارنالعان «تەرمەلەتىپ جىرلايىن» اتتى رەسپۋبليكالىق تەرمەشىلەر بايقاۋى مارەگە جەتتى، دەپ حابارلايدى قازاقپارات.

ع. قۇرمانعاليەۆ اتىنداعى وبلىستىق فيلارمونيانىڭ بەلدى ءسوليسى، قازاقستاننىڭ ەڭبەك سىڭىرگەن ءارتىسى ساۋلە تاۋدايەۆا باستاعان قازىلار القاسىنىڭ شەشىمىمەن باس جۇلدە (300 مىڭ تەڭگە) باتىسقازاقستاندىق فارحات ورازوۆقا بەرىلدى. ماڭعىستاۋلىق وسپان قۇلسىماقوۆقا جاقسىلىق سارسەنعاليەۆ اتىنداعى ءبىرىنشى سىيلىق (150 مىڭ تەڭگە) تابىس ەتىلدى. قىزىلوردالىق مارات سۇگىرباي مەن استانالىق باقداۋلەت تولىبەك ۇلى سايكەسىنشە قالامپىر راحيموۆا جانە قالامقاس وراشيەۆا اتىنداعى ەكىنشى ورىن (100 مىڭ تەڭگەدەن) يەگەرى اتاندى. ماڭعىستاۋلىق ماناش ادىلبايەۆ جيەمبەت بارتوعاش ۇلى اتىنداعى، اتىراۋلىق نۇرداۋلەت احمەديار ماراباي قۇلجاباي ۇلى اتىنداعى، بقو- نىڭ اقجايىق اۋدانىنان كەلگەن ارداق ومار سارتاي كوشكىنشى ۇلى اتىنداعى ءۇشىنشى جۇلدەنى (75 مىڭ تەڭگەدەن) ەنشىلەدى. سونداي- اق جىر سايىسىنا قاتىسۋشىلاردىڭ ءبىر توبى ديپلومانت اتانسا، قالعاندارىنا العىسحاتتار تاپسىرىلدى.

گالا- كونسەرتتە ساحنا تورىندە جۇلدەگەرلەرمەن قاتار ەلگە تانىمال ءانشى- تەرمەشىلەر، ماڭعىستاۋ جىرشىلىق مەكتەبىنىڭ وكىلى اماندىق كومەكوۆ، قازاقستاننىڭ ەڭبەك سىڭىرگەن ءارتىسى قاپاش ق ۇلىش، مادەنيەت قايراتكەرى گۇلمايدان سۇندەتوۆالار دا ءوز ونەرلەرىن كورسەتتى.

ەسكە سالا كەتەيىك، باتىسقازاقستاندىق جىرشى فارحات ورازوۆ ءۇشىن بيىلعى جىل ءساتتى بولىپ وتىر. ول وسىنىڭ الدىندا باشقۇرتستان استاناسى ۋفا قالاسىندا 23-24 قازاندا وتكەن بۇكىلرەسەيلىك جىرشىلار (سەسەندەر) فەستيۆالىنەن كۇمىس جۇلدەگەر اتانىپ كەلگەن ەدى.