«ەگەمەن» سۋرەتشىسى حالىقارالىق بايقاۋدا جەڭىمپاز بولدى (سۋرەت)

010
كەشە عانا ساۋلەتشىلەر مەن سۋرەتشىلەردىڭ وتانى سانالاتىن يتاليادان «ەگەمەن قازاقستان» گازەتىنىڭ رەداكسياسىنا ءسۇيىنشى حابار كەلدى. اقجولتاي اقپارات «ەگەمەننىڭ» سۋرەتشىسى ايداربەك عازيز ۇلىنىڭ يۋنەسكو، بەيبىتشىلىك پەن ەركىندىكتى قولداۋدىڭ حالىقارالىق ايەلدەر ليگاسى، يۋنيسەف-ءتىڭ ۇلتتىق ۇيلەستىرۋ بيۋروسىنىڭ جەرگىلىكتى ۇيىمدارىنىڭ قولداۋىمەن ۇيىمداستىرىلعان «بەيبىتشىلىكتى قولداۋ – تولەرانتتىلىقتى قولداۋ» اتتى حالىقارالىق بايقاۋدا ءبىرىنشى ورىندى جەڭىپ العاندىعىن جەتكىزدى.

يتاليانىڭ سپيليمبەرگو قالاسىندا وتكىزىلگەن حالىقارالىق بايقاۋ 6 اتالىم، ياعني «بالاباقشا مەن باستاۋىش مەكتەپ» ، «ورتا مەكتەپ» ، «ەكىنشى ورتا مەكتەپ» ، «مۋلتفيلم» ، «سۋرەتشى» ، «ساتيرالىق جانە يۋمورلىق سۋرەتتەر ءۇشىن ارنايى سىيلىق» اتالىمدارى بويىنشا ۇيىمداستىرىلعان. ايداربەك عازيز ۇلى «سۋرەتشى» اتالىمى بويىنشا جەڭىمپاز اتاندى. بەس اتالىمعا ستۋدەنتتەر مەن جاستاردىڭ جۇمىستارى قابىلدانسا، ال «سۋرەتشى» اتالىمىندا الەمنىڭ تۇكپىر- تۇكپىرىنەن كاسىبي سۋرەتشىلەر باعىن سىناپتى.

قازىلار القاسىنىڭ ساپىندا تانىمال سۋرەتشى نانە زاۆاگنو، سۋرەت سىنشىسى انگەلو بەرتاني سىندى قىلقالامنىڭ قۇدىرەتىن تەرەڭ تۇسىنەتىن تۇلعالار بار.

سۋرەت شىركىندى باعالاۋ ءۇشىن ءتىل ءبىلۋدىڭ قاجەتى شامالى عوي. يتاليالىقتاردىڭ قازاق سۋرەتشىسىنىڭ كاسىبي شەبەرلىگىن جوعارى باعالاۋى دا سوندىقتان بولار. «ەگەمەندىك» سۋرەتشىنىڭ قولتاڭباسى وسىلايشا ميكەلاندجەلو سىندى ۇلى تۇلعانى دۇنيەگە اكەلگەن ەلدىڭ مارعاسقالارى تاراپىنان جوعارى باعالانۋىمەن قاتار، قازاق سۋرەت ونەرىنىڭ دە ءورىسى اسقاق ەكەندىگىن كۇللى دۇنيەگە ايگىلەدى. بەيبىتشىلىكتى قازاق حالقى قاي دەڭگەيدە تۇسىنەتىندىگىن، باعالايتىندىعىن جەتكىزدى. الاشتىڭ ابىرويىن يتاليادا اسپانداتقان ارىپتەسىمىزگە الداعى ۋاقىتتا دا شىعارماشىلىق تابىس تىلەيمىز.

عابيت ىسكەندەر ۇلى،
«ەگەمەن قازاقستان»

aidarbek-tolerance-4

kogershin-1-kopiya