قىتاي سۋرەتشىلەرى — استانادا

era_1793-318x219

بوياۋدىڭ قۇدىرەتىن ءتۇسىنۋ ءۇشىن ناعىز سۋرەتشىنىڭ كارتيناسىن كورۋ كەرەك. بوياۋ ارقىلى تابيعاتتىڭ سىرىن، ادام بولمىسىن، ءومىردىڭ ءمانىن تۇسىندىرۋگە ۇمتىلاتىن سۋرەتشىلەر بوياۋدى ءارقاشان ورىندى قولدانادى. بۇگىنگى كورمەدە ءدال سونداي تاماشا تۋىندىلاردىڭ كۋاگەرى بولدىق. قىتاي مەملەكەتىنىڭ اتاقتى سۋرەتشىلەرى گۋان حونچەن مەن شاو پۋ «جىبەك جولى ەكونوميكالىق بەلدەۋى» اتتى جەكە كورمەلەرىن وتكىزدى. كورمە ەلورداداعى قازاقستان قارۋلى كۇشتەرىنىڭ اسكەري- تاريحي مۋزەيىندە اشىلدى.

era_1761

الدىمەن گۋان حونچەن تۋرالى بىرەر ءسوز. ونىڭ كارتينالارى امەريكا مەن ەۋروپانىڭ، سونداي- اق، شىعىس ازيانىڭ ءبىرقاتار ەلدەرىنىڭ مۋزەي، گالەرەيالارىندا، جەكەلەگەن كوللەكتسيونەرلەردىڭ قولىندا ساقتاۋلى. سۋرەتشى بۇگىندە شەن يان ۋنيۆەرسيتەتىنىڭ پروفەسسورى. تابيعاتپەن ەتەنە سىرلاساتىن ونەر يەسىنىڭ كۇز بەن كوكتەمگە دەگەن قۇشتارلىعى ەرەكشە. كۇزدە سالىنعان اق قايىڭى بولەك سىر ايتسا، كوكتەمدە بەينەلەنگەن اق قايىڭدارى باسقاشا اسەر قالدىرادى. قايىڭ ەمەس، قۇددى ادامدار سياقتى سىر ايتىسادى، مۇڭايادى، كۇلىمسىرەيدى. گۇل اشقان ورىك اعاشتارى، سىڭسىعان ورمان- توعايلار، ەگىندىك دالاسى، اۋىلداعى ۇيلەر، جايىلىپ جۇرگەن سيىرلار مۇنىڭ ءبارى سۋرەتشىنىڭ جەكە قولتاڭباسىمەن قانىق بوياۋمەن بەينەلەنگەن.

era_1776

ال، قىتايدىڭ ۇلكەن اقىنى، اتاقتى سۋرەتشىسى شاو پۋ كارتينالارىنا ءتان ەرەكشەلىك – كۇڭگىرت بوياۋدىڭ باسىمدىعىندا. سۋرەتشى جان جالعىزدىعىن، ادامنىڭ مىناۋ ۇلكەن كەڭىستىكتە كىشكەنتاي عانا نۇكتە ەكەنىن ۇتىمدى بەينەلەيدى. ونىڭ نەگىزگى وبەكتىسى – تاۋ- تاستار، وزەن- سۋلار. اسپان مەن جەردى تۇتاستىرا الادى.

قىتايدىڭ قوس سۋرەتشىسىنىڭ كورمەسى قازاقستان قارۋلى كۇشتەرىنىڭ اسكەري- مۋزەيى مەن «مۇرات جولى» مادەني- قوعامدىق بىرلەستىگىنىڭ ۇيىمداستىرۋىمەن ءوتتى.

era_1719
ايگۇل سەيىلوۆا
فوتو: ەرلان وماروۆ