ءبىز «جوعالعان بۋىنبىز»

88d99519bb3a0b76ab9c9efef30f75b4

ادىلبەك ىبىرايىم ۇلى، قازاقستان جاستار وداعى مەن حالىقارالىق «الاش» ادەبي سىيلىقتارىنىڭ لاۋرەاتى، اقىن- جازۋشى:

– ءسىزدىڭ ادەبيەتتەگى وسال تۇسىڭىز نە؟

– مەنىڭ ەڭ وسال تۇسىم، قاتارلاستارىمنىڭ تىم ازدىعى. ستۋدەنت كەزىمىزدە ىركەس- تىركەس ءبىر شوعىر بولىپ جۇرەتىن سياقتى ەدىك. سولاردىڭ ءبارى تاعدىردىڭ تاۋقىمەتىمەن قالامىن تاستاپ كەتتى.

– بوكسشىلار سپورتتىق عۇمىرىنداعى مانسابىن اياقتاعاندا «بوكس قولعابىن شەگەگە ءىلدى» دەگەن تەرمين بار.. .

– ءدال سولاي. مەنىڭ قۇرداستارىم ۇلكەن جولدىڭ باسىنا كەرەمەت شىعارماشىلىق الەۋەت، اقىندىعىمەن شىعىپ تۇرىپ، جازۋدى جالعاستىرمادى. سەبەبى، بىزدەر ءىرىپ- شىرىگەن كەڭەستىك ءداۋىردىڭ ەڭ سوڭعى جىلدارىندا وقۋ ءبىتىرىپ، ومىرگە قادام باستىق. بىرەۋدى بىرەۋ بىلمەيتىن، تاڭەرتەڭگى اقىلىڭ تۇسكە اس بولىپ جارىمايتىن زامان، تالاي جارقىن بولاشاقتى ءسوندىرىپ، تالاي تاعدىردى تۋ- تالاقاي ەتتى.

«جۇيرىك قوساعىمەن شابادى» دەگەن حالقىمىزدا كەرەمەت ءسوز بار. ماسەلەن، اكىم اعانىڭ (تارازي) قاتارىن قاراڭىزشى. سايىن، قاليحان، ءابىش، بەك، قابدەش، ءشاربانۋ، اقان، رامازان سياقتى قالامگەرلەر قاتار كەلدى. ولار ءبىر- ءبىرىن وقىدى. ءبىر- بىرىنە ۇستاز بولا ءبىلدى. ءسويتىپ، بىرەۋى بويلاپ وسپەي، قاۋلاپ ءوستى، قاتار دامىدى. ولار جونىندە ورنىقتى قوعامدىق پىكىر قالىپتاستى. اقىرى، كەلە- كەلە بۇل توپ ادەبيەتتىڭ ءبىر ءداۋىرىن جاسادى.

مىنە، مەنىڭ وسالدىعىم، «اسپاندا ۇشقان التى قازداي» ادەبيەت ايدىنىندا التى – جەتى قۇرداس ات قۇلاعىن تەڭ ۇستاپ جۇرە المادىق.

– ءسىزدىڭ قۇرداستارىڭىز كىمدەر؟

– اۋباكىر سمايىلوۆ، بولات قورعانبەكوۆ، بەرىك بەيسەن ۇلى، انار ءىلياسوۆا، سەيسەن ۇلىقبەكوۆ، قۇلتاس دوستانوۆ، بەيبىت وسپانوۆ، ورىنباسار سامالىقوۆ تاعى دا باسقالار.. . ءبىز – «جوعالعان بۋىنبىز» .

«جوعالعان بۋىن» دەگەن تەرمين ە. حەمينگۋەيدىڭ تۇسىندا ادەبيەتكە ەنىپ، ادەبي نورماداعى ۇعىم رەتىندە قالىپتاستى. ەندى، قازىرگى قازاق ادەبيەتىندە دە «جوعالعان بۋىن» تۋرالى ايتىلۋى ءتيىس سياقتى.

– «جوعالعان بۋىن» تەرمينىنىڭ تاريحى تۋرالى ايتىپ بەرسەڭىز.

– 1925 -جىلدىڭ جازىندا ە. حەمينگۋەي «فيەستا» دەپ الدىن- الا اتاپ، ايدار تاعىپ قويعان جاڭا رومانىن جازۋعا كىرىسەدى. ول كەزدە جازۋشى يسپانيادا تۇراتىن ەدى. كەيىن كەلە يسپان تىلىندەگى اتاۋدان باس تارتىپ، رومانىن «جوعالعان ۇرپاق» تىركەسىمەن اتاۋ تۋرالى توقتامعا كەلدى.

ءبىراق ە. حەمينگۋەي «فيەستا» دەگەن بۇرىنعى اتاۋىنا قايتىپ ورالىپ، تاقىرىپقا «تاعى دا كۇن شىعادى …» دەگەن سويلەمدى قوسادى. «جوعالعان ۇرپاق» ءسوز تىركەسىن ەپيگراف تۇرىندە ورنالاستىرىپ، وعان تومەندەگىدەي تۇسىنىكتەمە بەرەدى.

«بىردە امەريكالىق جازۋشى گەرترۋدا ستاين ەۋروپانى ءوزىنىڭ ەسكى «فورد» اۆتوكولىگىمەن ساياحاتتاپ جۇرگەن شاعىندا بولار- بولماس كادىكتەن ماشيناسى بۇزىلىپ قالادى. ءبىرىنشى جاھان سوعىسىنا قاتىسۋشى جاس جوندەۋشى ونى دەر كەزىندە جوندەي الماي، گەرترۋدانىڭ شاعىمىنان كەيىن گاراج قوجاسى وعان: «سەندەردىڭ بارلىقتارىڭ دا – جوعالعان بۋىن، جوق بولعان ادامسىڭدار» دەگەن عايباتتاۋ ءسوزدى ايتادى. جازۋشى ايەل وسى ءسوزدى كوڭىل تۇكپىرىندە بەرىك ساقتاپ، ە. حەمينگۋەيمەن ارادا ورىن العان داۋ- داماي ۇستىندە «سوعىستا بولعان بارشا جاستار، تاپ سول جوندەۋشى سياقتىسىڭدار» دەگەندى لىق ەتكىزەدى دە، ءوز تاراپىنان: «سەندەر – جوعالعان ۇرپاقسىڭدار. ەشتەڭەنى قۇرمەتتەمەيسىڭدەر، بارلىقتارىڭ سالىنىپ ءىشىپ كەتكەنسىڭدەر …» دەگەندى قوسادى» .

«فيەستا» رومانى اسەرىنىڭ الاپات بولعانى سونداي «جوعالعان ۇرپاق» نەمەسە «جوعالعان بۋىن» تەرمينى جالقى ەسىمگە اينالىپ شىعا كەلدى. ءارى، الەمدىك ادەبيەت پەن ادەبيەتتانۋ ⅩⅩعاسىردىڭ 20-30- جىلدارى پايدا بولعان تۇتاس تاقىرىپتىق باعىتتى وسى اتاۋمەن اتاپ، ايدار تاقتى.

– ال ءسىز پروزا مەن پوەزيانى قاتار الىپ ءجۇرىپ كەلەسىز. حالىق اندەرىندە «اقىنعا قارا سوزدەن ولەڭ وڭاي» دەگەن ءۋاج بار. ءسىز ءۇشىن قايسىسى جەڭىل؟

– بىزدە ولەڭ جازاتىندار كوپ. ولەڭدى قينالماي جازاتىندار تىپتەن كوپ. سەبەبى، بۇل – ءسوز كيەسى الدىنداعى ادامزاتتىق پوزيتسيانىڭ السىرەگەندىگىن كورسەتەدى.

شىنايى جازۋشىلىقپەن اينالىسقان ادامعا قاي سالانىڭ دا اۋىرتپاشىلىعى جەتەدى. الايدا، قارا ءسوز ونەرىنىڭ جولى اۋىر دەپ ويلايمىن. وعان تاباندىلىق، جۇيەلىلىك، ىزدەنىس كەرەك، اسىرەسە، وڭاشا وتىرىپ وي قورىتۋ كەزەڭى ۇزدىك- سوزدىق سوزىلىپ ءجۇرىپ الادى. ال، ءبىر ولەڭ ءبىر كۇندە تۋا بەرۋى مۇمكىن.

جاڭا داۋىردەگى پروزاشىلاردىڭ قاتارى سيرەپ تۇرعانى دا سوندىقتان.

– ولاردىڭ قاتارىن ارتتىرۋ ءۇشىن نە ىستەۋ كەرەك، جولى قالاي؟

– بىزدە نە كوپ، ءمۇشايرا كوپ. بىرەۋ اكەسىنە اس بەرسە دە، كوكپار بەرە سالعانداي ءمۇشايرا ۇيىمداستىراتىن بولىپتى. سول ءمۇشايرالاردا ونشاقتى اقىنعا سىي- سياپات تابىستالادى. وسى كورىنىس ۇردىسكە اينالدى. سودان ولەڭ قۇراۋشىلاردىڭ سانى جاۋىننان كەيىنگى ساڭىراۋقۇلاقتاي قاپتاپ كەلەدى.

مۇنداي امال ءبىر جاعىنان جاقسى، داڭعازا مەن دۇرمەكتىڭ اراسىنان ايتۋلى دارىندىلار شىعادى. ءدال وسىنداي شارانى پروزاعا قاتىستى دا ۇيىمداستىرۋ كەرەك. ەسىڭىزدە بولسا، ⅩⅩ عاسىردىڭ باسىندا تۇڭعىش رومان بايقاۋىندا سۇلتانماحمۇت تورايعىردىڭ «قامار سۇلۋى» مەن تايىر جومارتبايدىڭ «قىز كورەلىك» رومانى ۇزدىك دەپ تانىلعان. جۇلدە قورى 2000 سوم بولعان. ول قازىرگى اقشامەن ەسەپتەگەندە 33 ميلليون تەڭگە شاماسىندا ەكەن.

ماسەلە ونىڭ قارجىسىندا ەمەس، شارا رەتىندە جۇيەلى تۇردە ۇردىسكە اينالسا، قالامگەرلەر اراسىندا ۇمتىلىس بايقالار ەدى. جاس جازۋشىلاردىڭ شوعىرى قالىپتاسار ەدى.

سوندىقتان، ء«مۇشايرا» دەگەندەي پروزا ءۇشىن «قارا ءسوز» دەگەن سىقىلدى كونكۋرستىڭ ءتۇرىن ويلاپ تابۋ كەرەك ءتارىزدى.

– بۇگىنگى قازاق ادەبيەتىندە تاۋەلسىزدىكتىڭ مازمۇنى مەن مۇراتى قالاي سيپاتتالۋدا دەپ ويلايسىز؟

– تاۋەلسىزدىك، ارينە، وي بوستاندىعىن الىپ كەلدى. سوندىقتان بوستان بەينەدەگى جەكەلەگەن كورىنىستەر، وقشاۋ ويلار ۇشىراسادى. ايتكەنمەن، تۇتاستاي «بەس جىلدىقتىڭ بالعاسىن سولقىلداتىپ سوققان» سوتسياليستىك ەڭبەككەرلەردىڭ بەينەسىن سومداپ كەتكەندەي، جاپپاي جاڭاشىلدىق ءال- اۋقاتتى جازۋ ءورىس الا قويعان جوق. قالامگەرلەر ەڭبەك ادامىنان گورى الەۋمەتتىك توپتاردى قۋالاپ كەتكەن سياقتى. ماسەلەن سوتتالعان، قاڭعىباس، پسيحولوگيالىق ناۋقاس، وزگە نانىم- سەنىمنىڭ بوداۋىندا كەتكەندەر، اتوم قۇرباندارى سياقتى تاقىرىپتاردى قوزعاپ ءجۇر. ال، نارىقتىق قاتىناستاعى حالىقتىق پسيحولوگيانى گەرولد بەلگەردىڭ «تۇيىقسۋ» رومانىنان، الىبەك اسقاردىڭ ء«ور التاي، مەن قايتەيىن بيىگىڭدى» سياقتى حيكاياتتاردان كورۋگە بولادى. وسى شىعارمالاردا بۇگىنگى كۇننىڭ مازمۇنى بار. سونىمەن قاتار، تاۋەلسىزدىك مۇراتى جاسىرىن تۇرىندە ۇسىنىلادى.

اۋەلدەن ەپيكالىق ۇستانىمعا بەيىم پوەزيادا تاۋەلسىزدىك مۇراتى ايقىن، رۋحى اسقاق سومدالادى. ولەڭنىڭ جولى بولعىشتىعى دا وسىدان دەپ ويلايمىن.. . جالپى، ۇلتتىق مىنەزدى سيپاتتايتىن تاقىرىپتاردى قالامگەرلەر تابا الماي جۇرسە كەرەك.

– ادەبيەتتىڭ وقىلۋىنا جول اشاتىن كىلتيپاننىڭ كىلتى نەدە؟ ءسىزدىڭ پايىمىڭىز قالاي؟

– ناسيحات. ادەبيەتتىڭ جاپپاي كۇندەلىكتى تۇرمىستان ورىن الۋى – ادەبيەت تۋرالى ءسوزدىڭ ايتىلۋىنان دەپ ەسەپتەيمىن. ءبىر رومان جارىق كورسە، ول تۋرالى تالداۋ ەكى روماننىڭ كولەمىندەي بولۋى ءتيىس. سول كەزدە جۇرت نازار اۋدارا باستايدى. سونىڭ ناتيجەسىندە كىتاپ وقۋ مادەنيەتى قالىپتاسۋى ابدەن مۇمكىن.

– تاۋەلسىزدىكتىڭ باياندى بولۋى ەكونوميكاعا نەگىزدەلە مە؟

– جوق. ماڭگىلىك ەلگە اينالۋدىڭ التىن قازىعى – ۇلتتىق مۇراتتا جاتىر. ەكونوميكاسى بالەندەي الدىڭعى شەپتەن ورىن المايتىن يزرايل قانداي قۋاتتى مەملەكەت. حالقى ءۇش مىڭ جىلدان استام بوسىپ جۇرسە دە يەرۋساليمدى (قازاقشاسى «ىرگەتاسىن ءسالىم قالاعان» ) بايتاق جۇرتقا اينالدىردى. ونىمەن الەم ساناسادى. وسىنشا قاجىردىڭ ءبارى ۇلتتىق مۇراتتا جاتىر. ال، ۇلتتىق مۇرات ادەبيەتكە نەگىزدەلەدى. ياعني، ءسوز. ءسوز كيەسى اپارمايتىن بيىك جوق.

– ءبىراق ولاردىڭ ادەبيەتى الەمدە ايگىلى ەمەس قوي.

– قۇپيا ادەبيەتتەردىڭ ءبارى سولارعا تيەسىلى. ونى وقىمايتىن ءجويىت جوق. ءارى، ادەبيەت مىندەتتى تۇردە ادامزات وركەنيەتىنە ءمالىم بولۋى شارت ەمەس. وڭىرگە ارنالىپ جازىلاتىن، ءدىندى ۋاعىزدايتىن، ۇلتقا باعىتتالعان ادەبيەت بار. ءبىزدىڭ بەت الىسىمىز – تۇتاسشىلدىقتى ۇستانعان مەملەكەتشىل باعىتتاعى ۇلتتىق ادەبيەت بولۋى ءتيىس.

– ياعني، بەلگىلى ءبىر شىعارمانىڭ اتى نەمەسە اۆتورى اتالعاندا ونىڭ ارتىندا ۇلتتىڭ اتاۋى تۇرۋى ءتيىس قوي. مىسالعا، ليەۆ تولستوي.. .

– ءدال سولاي. وكىنىشكە قاراي، بودان ۇلت بولۋىمىزدىڭ كەسىرىنەن سونداي دەڭگەيگە جەتە المادىق. الدا بولمىسىمىزدى جوعالتپاي، بۇتىندىگىمىزدە بولساق، بۇل ولقىلىقتىڭ ورنى تولار.. .

قازىرگى ۋاقىتتا، «استانا» ۆەلوكومانداسى دەسە، بىردەن الەم جۇرتىنىڭ كوز الدىنا قازاقستان ەلەستەيدى. كەلەشەكتە مۇنداي فيزيكالىق وقشاۋلىقتار ەمەس، ينتەللەكتۋالدىق قۇندىلىقتار ارقىلى قازاقستاندى الەم حالقى تانۋى ءتيىس دەپ ويلايمىن.

– اڭگىمەڭىزگە راقمەت.
سۇحباتتاسقان بەرىك بەيسەن ۇلى

ەسكەرتە كەتەيىك، قازاقستان جازۋشىلار وداعىندا 2016 -جىلدىڭ 4- قاراشا كۇنى ساعات 16.00-دە بەلگىلى اقىن، جازۋشى، حالىقارالىق «الاش» ادەبي سىيلىعىنىڭ لاۋرەاتى ادىلبەك ىبىرايىم ۇلىنىڭ «قۇس جولىنداعى جىر» اتتى شىعارماشىلىق كەشى وتەدى. وسىعان وراي، قالامگەردىڭ ءبىر توپ ولەڭدەرىن ۇسىنىپ وتىرمىز.

***

بۋرابايداعى كۇز

وقجەتپەس سول قالپىندا شانشىلادى،
بۇتاقتان شىقتىڭ كوزى تامشىلادى.
كۇزدى ءبىز «كۇز» دەپ قانا ءجۇر ەكەمىز،
بوياۋدان قيلى- قيلى ءان شىعادى.
جاپىراق سارى، قىزىل
سالبىراعان،
ايناكول جاپ- جاسىل بوپ البىراعان.
كوگى ءالى وڭا قويماي قۇراق تا تۇر،
نە دەگەن قاتال ەدى تاعدىر وعان؟ ..
كوز سالساڭ كوكەيدە مۇڭ اۋەلەگەن،
تۋعانمەن كۇبىر قاعىپ اۋەلى ولەڭ.
نالىنە سان رەڭنىڭ مالىنام دا،
ماسايىپ، ماۋجىرايمىن ماۋەگە مەن.
«اۋپىلدەك» – ايناكولدىڭ قوسالقى اتى،
قازاقتاي تالاسۋعا وسال قاقى.
قامىسى اۋپىلدەكتىڭ جەر قاپتىرار،
كۇن كەشسەڭ ءجۇردىم- باردىم بوساڭ، قاپى.. .
جاعاسى اۋپىلدەكتىڭ كەرىم دە سال،
ازايىپ قالعانداي ما شەرىم دە ءسال.
كوتەرىپ اساي- مۇسەي جۇرەر شەبەر،
مىنا ءبىر عالاماتتى ەرىنبە، سال.. .
عاجايىپ اقىلىڭدى الاتىنداي،
يراننىڭ ءۇربى بىلتە ماناتىنداي.
نە دەگەن قانىق بوياۋ قىزىل.. . جاسىل.. .
كوڭىلدە كەتپەستەي بوپ قالاتىنداي.. .

اق ساۋلە نەتكەن سيقىرلى ەڭ.. .

Mەن سەنى سۇيگەم،
جانىممەن سۇيگەم، جارىق كۇن!
مۇقاعالي
ءوزىڭدى ءسۇيدىم، ولەردەي ءسۇيدىم اق شاپاق،
قۇيىلسا اق نۇر، كەلەدى بالكىم جاقسى اتاق.
ارايعا باتىپ، اق ساۋلە ساعان شومىلىپ،
داندايسىپ كەتىپ.. . تىرلىككە باردىق جات.. . شاتاق.. .
شاپاققا شومساڭ شادىمان قىزىق تىنعان با؟
تۇسەرىڭ بىلمەي قوس قۇلاش لاھات- زىندانعا.
.. .پەندەلەر جايناپ ءجۇرسىن دەپ مىناۋ پانيدە،
بىزدەرگە بولا جاراتقان شىركىن كۇندى اللا.
جارىققا قاراي جانىمدى سالىپ ۇمتىلدىم،
جىلۋىن سەزدىم ءبىر اۋىز ايتقان جىلت ءۇننىڭ.
بولاشاق سەنى ەتەم دەپ جارقىن نەعۇرلىم،
اينالىپ كەتتىك قۇلىنا وزبىر قۇلقىننىڭ.
اق شاپاق قانداي ارايلى ەڭ جانە ارمان ەڭ،
ءاپپاق بوپ ءجۇرۋ ساۋلەگە شومىپ، بار – دامەم.
ەلىتىپ اراي- شۋاققا كوكتەن شاشىلعان،
قي شوقىپ تۇردىم پارىقسىز قاتار قارعامەن.
اق ساۋلە نەتكەن سيقىرلى ەڭ ءارى الدامشى ەڭ،
تانىمە ەمەس ساناما مەنىڭ قولدانشى ەم.
جارىقتىڭ ءوزى – تامۇقتىڭ كوزى بۇگىندە،
ءبىر ساۋلە بولىپ كورىنەدى ەكەنسىڭ جالعان – سەن.
جارىقتا ءجۇرىپ، قاراڭعى تىرلىك كەشكەنىم،
ساۋلەگە شومدىم، ساۋلەلى شىركىن نە ىستەدىم؟
التىن نۇر مەنىڭ جانارىمدى الدىڭ جانىممەن،
.. . ساۋلەسىز سانا باسىما بىتسە وستەمىن.

قايرانى جوق كورىنىس.. .

توككەنمەنەن التىن- اراي شۇعاسىن،
سالقىندىقتىڭ بارىن، راس، ۇعاسىڭ.
تەرەزەدەن جارىق كۇننىڭ تۇلعاسىن،
كورەسىڭ دە جەڭىل- جەلپى شىعاسىڭ.
سىرتتا بايقاپ دىم جۇگىرگەن ىلعالدى،
كوڭىل- قوشىم الدەنەمەن بىلعاندى.
كوشە بويىن جاعالاعان جيدەگۇل،
اراسى جوق، پاناسى جوق تۇل – قالدى.
تاقتا جولمەن ءىلبىپ باسىپ كەلەمىن،
كەنەت ءبىر قىز جەلپ ەتكىزدى جەلەگىن.
جايتاڭ قاعىپ، جۇتىنادى قۇيىمىر.
قايرانى جوق سۇلۋلىققا نە دەدىم.. .
سولق ەتكەنى جۇرەگىم دە بۇلقىنىپ،
ۇشقىن اتتى جانارىمدا جىلت- ءۇمىت.
لاعىنداي اسىر سالعان ەلىكتىڭ،
بارا جاتىر جاستىق- داۋرەن جۇلقىنىپ.
تاياۋ تۇرعان باعدارشامنان بۇرىلدىم،
كوزدەن تاسا بولىپتى الگى بۇرىمدىم.
جەردە جاتىر سارجاپىراق شاشىلىپ،
قىساتىنداي ءبىرىن – كۇلكى، ءبىرىن – مۇڭ.. .
وقشاۋ ۇيگە ۇشىراستىم قاپتالدان،
وتىر ارۋ
باسپالداقتا
باپتانعان.
تىزە – جىرتىق،
ال كۇشىگى شىتتاي بوپ،
اعاشتا ءجۇر ارىن كۇتىپ اق تاڭنان.

بۇتاقتاعى ۇلپا

الماسىپ ميزام شۋاق ىزعارمەنەن،
بۇگىن تاڭ قارسى الدىق قوي ءبىز قارمەنەن.
جاناردان ءبىر جىلت ەتكەن نۇر كورىنبەي،
سۋىقتان جۇرەك توڭىپ، مۇزدار دەنەڭ.
كۇرەڭ كۇز جالعاسقانداي اققا ۇلاسىپ،
بويجەتكەن قار ۇستايدى شاتتىعى اسىپ.
اق الەم اق كوڭىلىن اۋەلەتكەن،
اڭسايدى ءتاتتى كۇندى، باقتى – عاشىق.
كورىنبەس كوكتەن قۇستىڭ ىلەگى دە،
پەندەلەر بۇ پانيدە بىلەدى نە؟
قۇسجولى اداستىرعان اققۋلار ءجۇر.. .
قارايمىن سۇرقاي بۇلتتىڭ سىلەمىنە.
بۇتاقتى
ءيىپ تومەن ۇلپا باسقان،
ايدىن كول نىلدەنەدى كۇن تالاسقان.
قوس اققۋ ءسال ايالداپ دەمالعان سوڭ،
كەتەدى جونىمەنەن شىمقاپ اسپان.
اق ۇلپا ەرىپ قايتا توڭدانادى،
كۇرتىك بوپ جوتا بىتكەن جوندانادى.
.. . اق قاردى اۋەي كورگەن تالدىرماش قىز،
ەسىنە الار ما ەكەن سول بالانى؟ ..

قۇس جولى

بۇل قازاندا كوكتەمنىڭ ەلەسى بار،
نۋ توعايعا كۇزگى نۇر، بەرەسىڭ ءار.
ساۋىرلەردە قۇس ۇشسا جۇپ- جۇبىمەن،
مىنا كەپتەر، قاراشى، نەگە سىڭار؟
ۋىلجىعان اق شۋاق جالتارادى،
كۇڭگىرتتەنەر كوڭىلدىڭ ءار تارابى.
قايتقان قۇستىڭ ىلەسىپ قاناتىمەن،
ءبىر مۇڭلىلاۋ، بايقاساڭ، ءان تارادى.
ىمىرت ءتۇسىپ، توڭىرەك تۇمشالانار،
اسپان بەتى كورىنەر ءبىر شاما بار.
ۇباق- شۇباق قۇسجولى – جۇلدىزدى كوش،
جىمىڭدايدى شىركىندەر، مىڭ سان ولار.
قيالىڭدى قوزعايدى، سامعاتادى،
سول جاقتا ءبىر سىر بارىن اڭداتادى.
ارمانىڭدى ايالاپ ايالدايسىڭ،
ءتاتتى سەزىم ءۇيىرىپ جانعا تاعى.. .
بوز وكپە ويعا بەرىلدىم، امال قانشا؟ ..
مىنا تاعدىر، قولداماس جاماندى ونشا،
الگى كەپتەر ءتارىزدى قالىپ قويما،
قۇس جولى تۇر،
ۇشاتىن شاماڭ بولسا!!!