گۇلنۇر ورازباي قىزىنىڭ بالالارعا ارناعان ات ابزەلدەرىنە بايلانىستى ولەڭدەرى

thumb

سۋىرىپ سالما اقىن قىزدارىمىزدىڭ ءبىرى – قىتايدان كەلگەن قانداسىمىز گۇلنۇر ورازباي قىزى! ول ءقازىر الماتى وبلىسى تالدىقورعان قالاسىندا تۇرادى. گۇلنۇر ەلىمىزگە ەسىمى بەلگىلى بالعىنبەك، تالانت سىندى تالاي ايتىسكەر اقىندارمەن ايتىسىپ، تىڭدارماندارىنىڭ ىستىق ىقىلاسىنا بولەنگەن. بۇگىندە ادەبيەتىمىزدەگى ولقىلىقتاردىڭ ءبىرى بالالار ولەڭىمەن اينالىسىپ جۇرگەن اقىننىڭ ات ابزەلدەرىنە بايلانىستى بالالارعا ارناپ جازعان ءبىر توپ ولەڭىن ۇسىنىپ وتىرمىز.

ارقان

93a43b8cb9d31aa9a6710307ee4da73f
ارقان دەگەن ەجەلدەن،
قازاقتىڭ ءبىر بۇيىمى.
بىلگىڭ كەلسە تەرەڭنەن،
ءسوزدىڭ مىناۋ ءتۇيىنى.

ءۇش ءتىل بولىپ قىل ارقان،
الاقانمەن ەسىلەر.
جۇك ارتقاندا بۇل ارقان،
تەز بايلانىپ، شەشىلەر.

تاسپالانعان تەرىدەن،
قايىس ارقان ورىلەر.
جىلقى ۇستايدى ونىمەن،
ات ۇستىندە سەرىلەر.

شىلبىر

f934b12783740592372c8a8116620128

ايلانسوقتان نوقتاعا،
تاققان ارقان شىلبىرىڭ.
كەلسە كەلمەس تاستاما،
شۋماعىمەن ءىل كۇنىم.

شىلبىرىنان جەتەلەپ.
سايگۇلىكتى سايلايمىز.
شىلبىر قىزمەت وتەمەك،
كەرمەگە اتتى بايلايمىز.

نوقتا

7dbde548cd2cd5a3747f4778a9ae8119
ۇستاپ العان جىلقىنىڭ،
جاقىنداي بەر  قاسىنا.
مال بولسادا ءبىل سىرىن،
نوقتا سالىپ باسىنا.

كەڭسىرىك پەن توبەلىك،
ساعالدىرىق تاعى بار.
ايلانسوقتى  كورەلىك،
شىعىرىقتان تاعىلار.

جۇگەن

a2b2e4d37aa9d4b370e5699cd38658a0

پارىقتاي ءبىل وزدەرىڭ،
نوقتامەنەن جۇگەندى.
ۇقسامايتىن جەرلەرىن،
ۇيرەنەيىك ءبىز ەندى.

تىزگىن، سۋلىق، اۋىزدىق،
مۇشەلەرى جۇگەننىڭ.
اۋىزدىعىن سالۋلى ۇق،
الدىندا اساۋ مىنەردىڭ.

ەرتوقىم

a9582b73b37349a8e3c379b6ad59eedf
قيىستىرىپ اعاشتان،
جاسايدى ونى شەبەرلەر.
اتقا تيمەي جاراسقان،
ەردى تەگىن دەمەڭدەر.

كۇمىس قۇيىپ قاسىنا،
اسىلدان تاس ورناتقان.
ەر- ايەلدىڭ جاسىنا،
لايىقتاپ ارناتقان.

تەرلىك، توقىم، تەبىنگى،
كوپشىك، پىستان، ايىل بار.
قانجىعالاپ ەرىڭدى،
ۇزەڭگى تاق دايىندال.

ءبارى بولسا وسىنىڭ،
ەرىڭدى ەرتتەي الاسىڭ.
مىنەر جاقتان جوسىنىڭ،
اتتىڭ ەرىن سالاسىڭ.

ومىلدىرىك

f7f8fd5a50cf59fd70cae23564527110

قازاناتقا قاي قازاق،
ومىلدىرىك تاقپاعان.
ەر كەتپەيدى تايعاناپ،
وردەن شىقسا اتتى ادام.

بۇل ابزەلدىڭ ءتۇر- ءتۇرىن،
كورسەڭ جانىڭ سۇيىنەر.
ومىلدىرىك جىلقىنىڭ،
كەۋدەسىنەن كيىلەر.

قۇيىسقان

c4b6502ce759ea8d5f1e9071d39f9a14

قول جاساعان زەردەلەپ،
ءبىر ابزەلى جۇيرىكتىڭ.
بەكىتىلەر ەرگە كەپ،
استىن وراپ قۇيرىقتىڭ.

ەردى ىلگەرى جىلجىتپاس،
قۇيىسقاننىڭ تۇرعانى.
ءبىر مۇرامىز كىر جۇقپاس،
التىن، كۇمىس قۇيمالى.

شىدەر

fa00fa010ac4341b5307461c67b08c34

شىدەر دەگەن ءبىر مۇلىك،
ات بەكىتۋ قۇرالى.
اتتى تەجەۋ جۇرگىزىپ،
اياعىندا تۇرادى.

تۇسامىس، ورە، ءۇشاياق،
اتاۋلارى شىدەردىڭ.
قالماس جىلقى كۇش اياپ،
شىدەرلەپ بەكەم جىبەرگىن.

قايىس، تەمىر، ءجىپ بولىپ،
تۇرلەرى بار تۇيىلەر.
الاقانى بۇكتەلىپ،
ءسىلبى تيەككە ىلىنەر.

قامشى

918596858f0f69d8f1a76da8309c213a

ەر جىگىتتىڭ جانىندا،
قامشىمەنەن ات بولار.
قامشى دەگەن قارۋعا،
توبىلعى، ىرعاي ساپ بولار.

ساپتان كەيىن الاقان،
قۇرىم شاشاق توگىلگەن.
سوسىن ۇشىن قاراساڭ،
جۇمىر قايىس ورىلگەن.

ۇستايتىعۇن جەرىنەن،
بۇلدىرگەنى بايلايدى.
بىلەككە وراپ كەڭىنەن،
ءتورت تۇلىكتى ايدايدى.

قامشى باسسا ساۋىرعا،
شابان بارما جەلمەگەن.
قامشى ويناتسا جاۋىنا،
ادام بارما جەڭبەگەن.

تاعا

bbe4d33282c64cc014c2bf93d4a122f0

كورىك، بالعا، ءتوسى بار،
شەبەر سوعار تاعانى.
تۇلپار نەگە توسىلار،
ءبۇتىن بولسا تابانى.

ەمشەك تاعا، جاي تاعا،
دەگەن ەكى ءتۇرى بار.
قاي مەزگىلدە قاي تاعا،
قاعىلارىن ءبىلىپ ال.

تاسىرقاسا ات دەگەن،
كوتەرە الماس دەنەسىن.
ارتىپ جۇرگەن ساق دەگەن،
تاعاسىمەن شەگەسىن.

اشاماي

81fa52f3e723c12aad98938060888248

تەك كىشكەنتاي بالاعا،
ارنالادى اشاماي.
كوشكەن ەلگە دالادا،
بولماس ونى جاساماي.

اتقا وتىرا المايتىن،
بالانى وعان مىنگىزەر.
ەكى كيگىز قالتاعا،
ەكى اياعىن كىرگىزەر.

الدى- ارتى بيىك اشا اعاش،
بالا قۇلاپ كەتپەيدى.
بولعان سوڭ بالا اسا جاس،
ساقتىققا كۇشى جەتپەيدى.

اياق قالتا جابىسىپ،
تەبىنگىگە  تىگىلەر.
قوس مىقىننان جارىسىپ،
ساقتىق بەلبەۋ جۇگىرەر.

ءوستىپ ءجۇرىپ قازاعىم،
ات جالىندا ويناعان.
ۇلان قايىر دالانىڭ،
قىزىعىنا تويماعان.

كەجىم

b84a0cc5fc65cad28a30de01d72005e9

قازاق قىزىن ۇزاتسا،
ات مىنگىزەر كەجىمدەپ.
ۇزاتقان قىز جۇراتقا،
تۇسەر سوسىنكەلىن بوپ.

كەستەلەنگەن كەجىمگە،
جىبەك شاشاق توگىلەر.
اتتىڭ ساۋىر، بەلىنە،
جاپساڭ اسەم كورىنەر.

جاس كەلىننىڭ كيىمىن،
قىل قىبىردان قورعايدى.
حالقىمنىڭ بۇل بۇيىمىن،
جوعالتۋعا بولمايدى.

 

10 پىكىر

  • كۋرمەتتى اپەكە وسى بالالارگا ارناگان ولەندەرىنىز وتە تاماشا مەن سىزدىن ار كاشان كولداۋشىنىز سىزگە اشىك اسپان تاۋسىلماس كازىنا وزاك ومىر تىلەيمىن ار كاشان بىر الا وزىنىزگە جار بولسىن كازاگىمىزدىن ەلىمىزدىن جۋرتىمىزدىن ماكتانىشىسىز

  • جارايدى ،بۇل اتاۋلاردى قازىر بالاتۇرعوي ،ۇلكەندەردە بىلمەي بارادى ،قالامىڭىز ۇشتالا بەرسىن !!!!

  • جارايدى ،بۇل اتاۋلاردى قازىر بالاتۇرعوي ،ۇلكەندەردە بىلمەي بارادى ،قالامىڭىز ۇشتالا بەرسىن !!!!

  • كەرەمەت دوسىم،دەنىڭ ساۋ جازعانىڭ تاۋ بولسىن،حالقىڭ ۇشىن الى تالاي ەسەلى ەڭبەك ەتەرىڭە مەن سەنەم،وت باسىڭا اماندىق تىلەيىمىن

  • ەشكىنىڭ قىلىنان نە قايستان ورىلگەن ارقان بولسا ،
    قايستان تۇيىلگەن نوقتا جۇگەن بولسا
    اناۋ كەجىم ەمەس جابۋ ،كەجىم ارعى اتتا جاقسى كورىنبەي تۇر

  • ەشكىنىڭ قىلىنان نە قايستان ورىلگەن ارقان بولسا ،
    قايستان تۇيىلگەن نوقتا جۇگەن بولسا
    اناۋ كەجىم ەمەس جابۋ ،كەجىم ارعى اتتا جاقسى كورىنبەي تۇر

  • ارداقتى حالقىم ايتىسكەر اقىن گۇلنۇر سىياقتى كونەرىپ بارا جاتقان قالقىمىزدىڭ سالىت داستۇرىن قورعايتىن ۇرپاق كوبەيسە ەكەن،،