قوسىمشا قادامدار قاراستىرىلادى

كۋلاگين-412.09.2014
بيىل ەل گازەتى «ەگەمەن قازاقستان» ءوزىنىڭ 95 -جىلدىعىن اتاپ وتەدى. ەل ىقىلاسى دا ەرەن. وسىنىڭ الدىندا قاراعاندى وبلىسىندا باس باسىلىمنىڭ كۇندەرى وتكىزىلگەنىن وقىرماندارىمىز بىلەدى. ەندىگى كەزەكتە ەگەمەندىكتەردى استانالىق اقمولا وبلىسى تورىنە وزدىرىپ وتىر.

اقمولا وبلىسىنىڭ اكىمى سەرگەي كۋلاگين مەن «ەگەمەن قازاقستان» رەسپۋبليكالىق گازەتى» اق پرەزيدەنتى ساۋىتبەك ابدراحمانوۆتىڭ كەزدەسۋى ءوزارا تۇسىنىستىك جاعدايىندا ءوتتى. ءوڭىر باسشىسى ەلباسى ن. نازاربايەۆتىڭ 3 قىركۇيەك كۇنگى جۇمىس ساپارىندا كوتەرىلگەن ماسەلەلەر جونىندە اڭگىمەلەپ، وبلىستىڭ الەۋمەتتىك- ەكونوميكالىق دامۋىنا قاتىستى نەگىزگى جايلاردان حاباردار ەتتى. وتكەن جىلى وڭىرلىك جيىنتىق ءونىمنىڭ كولەمى 942,2 ميلليارد تەڭگەنى قۇراسا، بيىل ونى وسىرە ءتۇسۋ جوسپارلانۋدا. ال ونەركاسىپ سالاسىنداعى ءوسۋ قارقىنى 130 ميلليارد تەڭگەگە جەتىپتى. بۇل – رەسپۋبليكامىزداعى ءتورتىنشى كورسەتكىش. وبلىستا مەملەكەتتىك باعدارلامالاردىڭ بارلىعىنا قاتىستى اتقارىلعان ناقتى ىستەر اتاپ وتەرلىكتەي. قازىرگى كۇنى ءۇيد شەڭبەرىندە 105 ميلليارد تەڭگەنىڭ 44 جوباسى جۇزەگە اسىرىلىپ، 5000 جۇمىس ورنى قۇرىلىپتى. قايتا وڭدەۋ كاسىپورىندارىندا ەڭبەك ونىمدىلىگى 15,7 پايىزعا ءوسىپ، ءاربىر ادامعا شاققاندا 10,1 مىڭ دوللاردى قۇراپ وتىر.

اكىمنىڭ اڭگىمەسىندە ەلباسىنىڭ ايرىقشا نازارىنداعى استانانىڭ ازىق- تۇلىك بەلدەۋىن قامتاماسىز ەتۋ، اگلومەراتسيالىق ۇدەرىستى ورىستەتۋ، شۋچە- بۋراباي كۋرورتتى ايماعىن دامىتۋ ماسەلەلەرى دە قامتىلدى.

س. ابدراحمانوۆ حالىق تاعدىرىنىڭ شەجىرەسىنە اينالىپ وتىرعان گازەتتىڭ ۇستانىمدارى، شىعارماشىلىق وردانىڭ ىزدەنىستەرى، ونىڭ ەلمەن بايلانىسىنىڭ تىعىزدىعى جايلى كەڭىنەن اڭگىمەلەدى. باسىلىمنىڭ قولجەتىمدىلىگىن ارتتىرۋ ماقساتىنداعى ينتەرنەت جۇيەسىنىڭ اۋقىمدىلىعىنا نازار اۋدارىلدى.

گازەت باسشىسى وبلىس اكىمىنە تىلەك رەتىندە باسىلىمنىڭ كوكشە وڭىرىندەگى مەنشىكتى ءتىلشىسى قىزمەتىن ۇزاق جىلدار بويى ابىرويمەن اتقارعان تاماشا قالامگەر، قازاقتىڭ اياۋلى اقىنى ەركەش ءيبراھيمنىڭ ەسىمىن ەستە قالدىرۋ جونىندە ناقتى قادامدار جاساۋ تۋرالى ءوتىنىمىن جەتكىزدى.

وبلىس اكىمى بۇل ۇسىنىسقا تۇسىنىستىكپەن قارايتىنىن ءبىلدىردى.

كوكشە مەن قاراوتكەل وڭىرىندە «ەگەمەن قازاقستاننىڭ» تارالىمى دا جىل ساناپ ارتىپ كەلەدى. بۇل ءۇشىن گازەت باسشىسى تاراپىنان العىس سەزىمدەرى ءبىلدىرىلدى. ماسەلەن، سوڭعى ءۇش جىلدا 3000-داي تيراج قوسىلىپ وتىر. بيىلعى جىلى 6000 دانا گازەت وقىرماندار يگىلىگىنە جاراتىلۋدا.

اكىممەن كەزدەسۋدە، بۇل ورايدا، گازەت تارالىمىن الداعى كەزدە ارتتىرا ءتۇسۋ جونىندە قوسىمشا قادامدار قاراستىرىلاتىنى ايتىلدى.

«ەگەمەن قازاقستاننىڭ» اقمولا وبلىسىنداعى كۇندەرى ەندى كوكشەتاۋ قالاسىندا، زەرەندى، بۋراباي جانە ەڭبەكشىلدەر اۋداندارىندا جالعاسادى.

باقبەرگەن امالبەك،

«ەگەمەن قازاقستان» .

اقمولا وبلىسى.