اۋەزوۆ، جانسۇگىروۆ ، سۇلەيەۆ سىندى ءۇش ارىسقا جار بولعان ءفاتيما قانداي ايەل ەدى؟

«فاتيما» تاعدىر
fatima
الماتىدا وسى اتتاس دەرەكتى ءفيلمنىڭ تۇساۋكەسەرى ءوتتى

بۇعان دەيىن قايتالانباس عۇمىر يەسى فاتيما عابيتوۆانىڭ تاعدىرى دراماتۋرگيالىق شىعارماعا ارقاۋ بولىپ، الماتىداعى ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى «فاتيما» سپەكتاكلىن ساحنالاعان ەدى. رەجيسسەر مۇرات احمانوۆ قويعان اقىن يران- عايىپتىڭ قاسىرەت- ناماسى ءقازىر دە تەاتر رەپەرتۋارىنداعى سالماقتى قويىلىمدار قاتارىندا.

فاتيما عابيتوۆانىڭ ەشكىمگە ۇقسامايتىن ءومىرى وتكەن اپتادا الماتىداعى «ارمان» كينوتەاترىندا «فاتيما» اتتى تولىقمەتراجدى دەرەكتى فيلم بولىپ، كورەرمەنگە جول تارتتى. اتالمىش دەرەكتى فيلم قازاقتىڭ ءۇش ۇلى تۇلعاسى – اعارتۋشى ءبىلال سۇلەيەۆ، اقىن ءىلياس جانسۇگىروۆ جانە جازۋشى مۇحتار اۋەزوۆتىڭ مۋزاسى جانە ومىرلىك سەرىگى بولا بىلگەن فاتيما عابيتوۆانىڭ (1903-1968ج. ج. ) كۇندەلىگى مەن حاتتارىنىڭ نەگىزىندە جاسالعان. ءفيلمدى مادەنيەت جانە سپورت مينيسترلىگىنىڭ تاپسىرىسى بويىنشا ش. ايمانوۆ اتىنداعى «قازاقفيلم» اق تۇسىرگەن.

فاتيما عابيتوۆا كۇندەلىكتى 1916 -جىلدان باستاپ جۇرگىزگەن ەكەن. كۇندەلىكتە ءوزىنىڭ ويلارى جانە مادەنيەت قايراتكەرلەرىمەن جازىسقان حاتتارى ارقىلى ⅩⅩعاسىردا ورىن العان ەلەۋلى وقيعالار: ۇلت- ازاتتىق قوزعالىسى، توڭكەرىس، ازامات سوعىسى، قازاقستانداعى ساۋاتسىزدىقتى جويۋ ناۋقانى، قازاق ادەبيەتىنىڭ دامۋى، شىعارماشىل زيالى قاۋىمنىڭ قالىپتاسۋى، 30-شى جىلدارداعى اشارشىلىق، ستاليندىك قۋعىن- سۇرگىن، 50-جىلدارداعى «جىلىمىق» كورىنىس تاپقان.

ءى. جانسۇگىروۆ اتىنداعى قوعامدىق قوردىڭ قولداۋىمەن ۇيىمداستىرىلعان دەرەكتى ءفيلمنىڭ تۇساۋكەسەرىندە ش. ايمانوۆ اتىنداعى «قازاقفيلم» اق پرەزيدەنتى جانە فيلم يدەياسىنىڭ اۆتورى باقىت قايىربەكوۆ: «فاتيما عابيتوۆا تۋرالى 2010 -جىلى ماعان ونىڭ ءىلياس جانسۇگىروۆپەن جازىسقان حاتتارىن اۋدارۋدى ۇسىنعان كەزدە بىلە باستادىم. جازعاندارىن وقي وتىرىپ، ونىڭ رۋحى بيىك، جىگەرلى ايەل ەكەنىنە تاڭ قالدىم. ءبىر قىزىعى، «فاتيما» اتتى كىتاپتى وقىپ وتىرىپ بىلگەنىم، ونىڭ جازعاندارىنىڭ جارىققا شىعۋىنا كومەكتەسكەن مەنىڭ اكەم – قازاقستاننىڭ تانىمال اقىنى عافۋ قايىربەكوۆ ەكەن. فيلم كورەرمەندەردى فاتيما عابيتوۆانىڭ تاۋقىمەتكە تولى تاعدىرىمەن تانىستىرادى. وسى ارادا كورەرمەندەر تالابى ورىندى ەكەنىن ايتقىم كەلەدى. ەلىمىز تاۋەلسىزدىك العاننان كەيىنگى جىلدارى شىعىپ جاتقان مۇنداي فيلمدەردى رەسپۋبليكالىق تەلەارنالاردان كورسەتۋ كەرەك. وسكەلەڭ ۇرپاق ءوز حالقىنىڭ تاريحىن تەك وقۋلىقتاردان ەمەس، سونىمەن قاتار، وسىنداي فيلمدەر ارقىلى دا تانىعانى دۇرىس» ، دەدى.

دەرەكتى ءفيلمنىڭ تۇساۋكەسەرىنە زيالى قاۋىم وكىلدەرى، فاتيما عابيتوۆانىڭ كوزىن كورگەن جاندار، تۋىستارى قاتىسىپ، تاماشا ەستەلىكتەر ايتىپ، جاڭا كارتينا تۋرالى كوزقاراستارىن ءبىلدىردى.

ءى. جانسۇگىروۆ اتىنداعى قوردىڭ تەڭ جەتەكشىسى، فاتيما مەن ءىلياس جانسۇگىروۆتىڭ نەمەرەسى جانار جاندوسوۆا: «فاتيما عابيتوۆا ءوز بويىندا تەرەڭ ءبىلىم مەن مادەنيەتتى ۇشتاستىرعان ادام ەدى. وسىنىڭ ارقاسىندا ول ساۋاتسىزدىقپەن كۇرەسۋگە كوپ ىقپالىن تيگىزدى. جانە كۇندەلىگىندە، حاتتارىندا، ولەڭدەرىندە سول ءداۋىردىڭ جىلناماسىن قالدىردى» ، دەدى.

ايناش ەسالي،

«ەگەمەن قازاقستان»

الماتى