الماتىدا حالىقارالىق ونەر كورمەسى وتەدى

iss

قازاقستان رەسپۋبليكاسى مەملەكەتتىك ورتالىق مۋزەيى جانە «باقىت» ساندىك- قولدانبالى ونەر ورتالىعى بىرلەسە وتىرىپ، 2003 -جىلدان بەرى ءداستۇرلى تۇردە وتكىزەتىن ساندىك – قولدانبالى ونەر كورمەسىنە جىل سايىن 150 دەن استام قولونەرشى قاتىسادى.

ورتالىق ازيا حالىقتارىنىڭ ساندىك- قولدانبالى ونەر كورمە- جارمەڭكەسى جىلىنا ءتورت مارتە وتكىزىلەدى. ءداستۇرلى ءىس- شاراعا اينالعان كورمە – جارمەڭكەدە ساندىك- قولدانبالى ونەردى باعالايتىن تۇتىنۋشىلار كادەسىيلاردى، كيىز جانە جىبەك بۇيىمداردى، كىلەمدەر مەن زەرگەرلىك زاتتاردى، قىش، بەينەلەۋ ونەرى تۋىندىلارىن، باسقا دا سان الۋان قولونەر بۇيىمدارىن تەك قانا تاماشالاپ قويماي، ساتىپ الا الادى.

«الما قالاسى – الماتى» كورمەسىنە كەلۋشىلەرگە «الما» بەينەلەنگەن بازارلىقتار مەن كادەسىي ونىمدەرىنىڭ مول توپتاماسى ۇسىنىلادى. الما الەمدەگى ءبىلىم، ءۇمىت، دانالىق، ماحاببات، وتباسىلىق باقىت، انا مەن بالا، ۇزاق عۇمىر نىشاندارىنان ەڭ تانىمال سيمۆولداردىڭ ءبىرى. ساندىك- قولدانبالى ونەر شەبەرلەرى بۇل نىشانداردى وزدەرىنىڭ تۋىندىلارىندا – كارتينا، زەرگەرلىك بۇيىم، پانو، گوبەلەن، كيىز جانە تەرى بۇيىمدارىندا، باتيك سياقتى ونىمدەرىندە بەينەلەگەن. الما بەينەلەنگەن كادەسىيدى كەز كەلگەن جاستاعى جانعا سىي ەتىپ تارتۋعا بولادى. الما بەينەلەنگەن كادەسىيلار مولشىلىق پەن ساتتىلىكتى نىشاندايدى.

ورتالىق ازيا قولونەر كورمە- جارمەڭكەسىنە كەلۋشىلەر ءۇشىن قىزىقتى باعدارلامالار ۇيىمداستىرىلعان: حاس شەبەرلەردىڭ بۇيىمدارىمەن تانىسۋ، قىشتان بۇيىمدار جاساۋ بويىنشا شەبەرلىك- ساباعىن وتكىزۋ، ءارتۇرلى شىعارماشىلىق ۇجىمداردىڭ كونتسەرتتىك باعدارلاماسى، ساندىك- قولدانبالى ونەر شەبەرلەرىنىڭ قاتىسۋىمەن لوتەرەيالىق ۇتىس ويىندارى ويناتىلادى. باۋ- باقشا وسىرۋشىلەر عاجايىپ الما جارمەڭكەسىن ۇسىنادى. مۋزەيدىڭ كينوزالىندا الماتى قالاسى تاريحىنا ارنالعان مۋزەي قورىنداعى فوتوماتەريالدار كورسەتىلەدى.

كورمە- جارمەڭكەگە كىرۋدەگى بيلەتتىڭ سەريا ءنومىرى ۇتىس لوتەرەيا ويىندارىنىڭ ءنومىرى بولىپ تابىلادى.

ايگۇل احانباي قىزى،

«ەگەمەن قازاقستان»

الماتى