ۇلتتىق ونەر ۇلاعاتى

fest-2
قازاقستاننىڭ تۇڭعىش پرەزيدەنتى ن. نازاربايەۆ اتىنداعى ورتالىق ساياباقتا وبلىستىق مادەنيەت، مۇراعاتتار جانە قۇجاتتاما باسقارماسىنىڭ قولداۋىمەن وبلىستىق تاريحي- ولكەتانۋ مۋزەيى ء«داستۇرلى مۇرا جاڭعىرىعى» اتتى تاريحي- تانىمدىق ەتنوگرافيالىق وبلىستىق فەستيۆال ۇيىمداستىردى. ەتنوگرافيالىق فەستيۆالدى وتكىزۋگە ع. جۇبانوۆا اتىنداعى وبلىستىق فيلارمونيا مەن وبلىستىق حالىق شىعارماشىلىعى ءۇيى دە اتسالىستى.

وبلىستىق تاريحي- ولكەتانۋ مۋزەيىنىڭ ءبولىم مەڭگەرۋشىسى الماگۇل سارىبايدىڭ ايتۋىنشا، ۇلتتىق ەتنوگرافيالىق فەستيۆالعا 31 شەبەر قاتىسقان. وندا قولونەر شەبەرلەرىمەن بىرگە، شيورمەك، كىلەم توقۋدان شەبەرلىك كلاستارى وتكىزىلدى. بايعانيندىك كىلەم توقۋشى تۇرسىنبيكە نۇرعاليەۆا ءوز بىلگەنىن جاستارعا ۇيرەتۋگە بەيىل ەكەنىن ايتتى. مۇعالجارلىق تىگىنشى گۇلجانات ساحيەۆا اناسى ساكۋرا وتەنوۆا ەكەۋى كەزىندە اجەسى رايحان تۇتىنعان كيىز ءۇيدى جاساۋلاپ ۇستاپ وتىرعانىن، وسى كورمەگە ارنايى الىپ كەلگەنىن جەتكىزدى.

ال اعاشتان ءتۇيىن تۇيگەن مارتوكتىك شەبەر ەدىلباي ورازىمبەتوۆ ءوزى جاساعان جانە اۋداندىق بالالار تەحنيكالىق شىعارماشىلىعى ورتالىعىنىڭ وقۋشىلارى قولىنان شىققان 50-گە جۋىق اعاش بۇيىمدارىن كورمەگە قويعان.

فەستيۆالعا كەلۋشىلەرگە قازاقتىڭ كيىز ءۇيىن تانىستىرعان وبلىستىق تاريحي- ولكەتانۋ مۋزەيىنىڭ قىزمەتكەرى بەكارىستان مىرزابايەۆ كەزىندە عۇلاما عالىم الكەي مارعۇلاننىڭ قازاقتىڭ كيىز ۇيىنە قاتىستى 300 گە جۋىق اتاۋ بار ەكەنىن ايتىپ كەتكەنىن، سونىڭ ازىرگە 200 گە جۋىعى عانا بەلگىلى ەكەنىن اڭگىمە وزەگىنە اينالدىردى. ول وسى اتاۋلاردى جىلىكتەپ ايتىپ، قازاقتىڭ كيىز ءۇيى جايلى مول ماعلۇمات بەردى. كيىز ءۇي جانىندا ايتەكە بي اۋدانىنان كەلگەن اسىلبەك قاۋدانوۆ جينالعان جۇرتشىلىققا قۇماي تازىلاردىڭ قاسيەتىن ايتىپ، ونىمەن اڭ اۋلاۋدىڭ قىر- سىرىنا قانىقتىردى. شالقارلىق ءانشى- جىراۋ الىبەك ءساريننىڭ باعزى زامانداردىڭ سال- ءسەرىلەرىنشە ات ۇستىندە وتىرىپ تەرمە ايتۋى دا فەستيۆالدىڭ ءسانى مەن سالتاناتىن ارتتىردى.

فەستيۆال اياسىندا جينالعاندارعا «ۇلى دالانىڭ ءان- جىر، كۇي كەرۋەنى» اتتى ەتنوفولكلورلىق كونتسەرتتىك باعدارلاما ۇسىنىلدى.

ساتىبالدى ءساۋىرباي،

«ەگەمەن قازاقستان»