قازاق-تۇرىك ليتسەيلەرى جۇمىسىن جالعاستىرا بەرەدى

30-07-16-razakh_turk_litsei

قازاقستان بىلىم جانە عىلىم مينيسترلىگى ەلىمىزدەگى قازاق-تۇرىك ليتسەيلەرىنىڭ (قتل) ىس-ارەكەتىنە قاتىستى وزىنىڭ رەسمي پوزيتسياسىن بىلدىردى.

مينيسترلىكتىڭ باسپاسوز قىزمەتىنىڭ مالىمدەۋىنشە، رەسپۋبليكاداعى بارلىق 27 مەملەكەتتىك قازاق-تۇرىك ليتسەيى بۇرىنعىشا جۇمىسىن جالعاستىرا بەرەتىن بولادى، وندا وقيتىن وقۋشىلاردىڭ اتا-انالارىنا بالالارى ۇشىن جاڭا مەكتەپتەر ىزدەستىرۋدىڭ قاجەتى بولمايدى.

«قازاقستانداعى قازاق-تۇرىك ليتسەيلەرىنىڭ تۇركياعا ەشقانداي قاتىسى جوق، ولارداعى وقۋ ساياساتى قازاقستاندىق جانە حالىقارالىق بىلىم بەرۋ ستاندارتتارى نەگىزىندە جاسالدى. قازاق-تۇرىك ليتسەيلەرىنىڭ ارەكەتىنە باقىلاۋ جاسايتىن حالىقارالىق KATEV قوعامدىق قورى قازاقستان مەن تۇركيانىڭ پرەزيدەنتتەرى نۇرسۇلتان نازارباەۆ پەن تۇرعىت وزالدىڭ قولداۋلارى ارقاسىندا ەكى ەلدىڭ بىلىم بەرۋ جۇيەسىندەگى ەكىجاقتى كەلىسىم نەگىزىندە قۇرىلدى.  وسى جىلداردا قازاق-تۇرىك ليتسەيلەرى وقۋشىلاردىڭ جوعارى ۇلگەرىمىن قامتاماسىز ەتىپ، ەلىمىزدىڭ وقۋ ورىندارى اراسىنداعى فلاگمانعا اينالدى»، – دەلىنگەن باسپاسوز قىزمەتىنىڭ حابارلاماسىندا.

سوڭعى ۇش جىلدىڭ ىشىندە قازاق-تۇرىك ليتسەيتسلەرىنىڭ وقۋشىلارى 5327 مەدالگە قول جەتكىزدى، ولاردىڭ 986-سى برازيليا، اقش، رەسەي، وڭتۇستىك كورەيا، قىتاي، رۋمىنيا، كانادا، گرەكيا، گرۋزيا، گەرمانيا، جاپونيا ەلدەرىندە وتكەن حالىقارالىق وليمپيادالاردا جەڭىپ الىندى. قتل-دا 1 124 وقىتۋشى جۇمىس ىستەيدى، ولاردىڭ 1 030-ى قازاقستاننىڭ (91،7%)، 94-ى تۇركيا ازاماتتارى (8،3%) بولىپ تابىلادى.

بىلىم جانە عىلىم مينيسترلىگىنىڭ انىقتاماسىندا سونداي-اق قازاق-تۇرىك ليتسەيلەرى قازاق تىلىندە بىلىم الاتىن دارىندى بالالاردىڭ وبلىستىق ليتسەي-ينتەرناتتارى بولىپ تابىلاىتىن اتاپ كورسەتىلگەن. بيىلعى جىلى قازاق-تۇرىك ليتسەيلەرىن 1634 بالا بىتىردى. ولاردىڭ ورتا باعالارى 102،3 بالدى قۇرادى. 2016 جىلعى ۇبت قورىتىندىسىندا 27 قازاق-تۇرىك ليتسەيى تۇگەل رەسپۋبليكاداعى 100 ۇزدىك مەكتەپتىڭ قۇرامىنان ورىن الدى.

قازاق-تۇرىك ليتسەيلەرىندەگى تاربيە جۇمىسى قازاقستان رەسپۋبليكاسىنىڭ ۇزدىكسىز بىلىم بەرۋ تۇجىرىمداماسىنا، «ماڭگىلىك ەل» جالپىۇلتتىق يدەياسىنا، قازاقستان پرەزيدەنتىنىڭ «قازاقستان-2050» جولداۋىنا سايكەس جۇزەگە اسىرىلادى.

«قازاق-تۇرىك ليتسەيلەرىنىڭ وتاندىق بىلىم بەرۋ سالاسىندا وزىندىك ورنى بار جانە ولاردىڭ قىزمەتىن باسقا ەلدىڭ ساياسي احۋالىنا قاتىستى بايلانىستىرۋدىڭ قاجەتى جوق. سىرتتان ولارعا قىسىم جاساۋعا ەشكىم دە قۇقىلى ەمەس، ولار – قازاقستان مەكتەپتەرى مەن قازاقستان ازاماتتارى، – دەلىنگەن مينيسترلىكتىڭ مالىمدەمەسىندە.  – بىز رەسمي تۇردە مالىمدەيمىز، قتل مەن «KATEV» قورىندا وزگە ەلدەردىڭ جەكە تۇلعالارىمەن، ۇيىمدارىمەن جانە ۇكىمەتتەرىمەن ەشقانداي بايلانىس جوق».

 مۇرات ايتقوجا