كورشى تاتۋ بولسا، ەل تاتۋ

ء«بىز تاۋەلسىزدىككە قالاي ۇلەس قوسامىز؟ » ءقايبىر كۇنى وتكەن جيىندا وسى سۇراققا ءبىر اقساقال كەرەمەت جاۋاپ قاتتى. «ەڭ الدىمەن ءۇيىمىزدى، اۋلامىزدى تازا ۇستايمىز، كورشىلەرىمىزبەن تاتۋمىز جانە بالالارعا دۇرىس تاربيە بەرىپ جاتىرمىز. اۋلا تازا بولسا، اۋىل تازا بولادى، كورشىمەن تاتۋ بولساق، ەل تاتۋ بولادى، بالالارعا دۇرىس تاربيە، ءبىلىم بەرسەك، ەلىمىزدىڭ بولاشاعى جارقىن بولادى. مىنە، ءبىز كەمپىرىم ەكەۋمىز تاۋەلسىزدىككە وسىلاي ۇلەس قوسىپ ءجۇرمىز» ، دەدى الگى قاريا. تەگىندە ەل بولاشاعىنىڭ باياندى بولۋى ءۇشىن قارت ادامداردان بۇدان ارتىق قانداي قولداۋ قاجەت؟ !

شىنىندا، ەلدىڭ تىنىشتىعى، ىنتىماعى، بىرلىگى وتباسىنىڭ بەرەكەسىنەن باستالسا كەرەك. «بەرەكەنى كوكتەن تىلەمە، بىرلىگى مول كوپتەن تىلە» دەگەن وسى. بۇگىندە جامبىل وبلىسىندا 25 وبلىستىق، 47 اۋداندىق ەتنومادەني بىرلەستىك 80-نەن استام ەتنوستىڭ باسىن بىرىكتىرەدى. «ىنتىماق باردا ىرىزدىق بار» دەگەن، بارلىعى اۋليەاتا جەرىندە ۇرپاق ءوربىتىپ، تاتۋ- ءتاتتى تىرشىلىك كوشىن جالعاستىرىپ جاتىر. ەندى، مىنە، جامبىل وبلىسىنىڭ اكىمى كارىم كوكىرەكبايەۆ وسىناۋ ىنتىماعى جاراسقان ءتۇرلى ۇلت پەن ۇلىستىڭ مەرەيىن تاسىتىپ، تاراز قالاسىنىڭ ورتاسىنان دوستىق ءۇيىن سالۋدى كوزدەپ وتىر. بۇل ءۇشىن تاراز قالاسىنىڭ اكىمى نۇرجان كالەندەروۆكە ارنايى جەر ۋچاسكەسىن بولۋگە تاپسىرما بەردى.

ارينە، دوستىق تۋىن جەلبىرەتەتىن بۇل عيماراتتىڭ ءسانى مەن سالتاناتى ەرەكشە بولاتىنى ايدان انىق. ازىرگە وبلىستىق قازاقستان حالقى اسسامبلەياسى حاتشىلىعىنىڭ قىزمەتىن قامتاماسىز ەتەتىن مەملەكەتتىك مەكەمە قۇرىلىپ، وتىزدان استام جۇمىس شتاتى بەرىلدى. سونداي- اق، وبلىستىق ەتنومادەني بىرلەستىكتەردىڭ جانىنان جاستار ورتالىقتارى اشىلادى. اۋداندارداعى بىرلەستىكتەرگە گرانتتىق قولداۋلار كورسەتىلىپ، مادەنيەت ۇيلەرىنەن بولمەلەر بەرىلمەك. وسى يگىلىكتى ءىستىڭ باستاماسى رەتىندە وبلىس اكىمى جەرگىلىكتى بيۋدجەتتەن قارجى ءبولىپ، دوستىق ۇيىنە ءبىر اۆتوبۋس كولىگىن ساتىپ الىپ بەرۋدى جوسپارلاپ وتىر. لايىم، بۇل يگى ىستەر ەل بىرلىگىن ارتتىرۋعا ۇلكەن ۇلەس بولىپ قوسىلا بەرسىن.

ورالحان ءداۋىت،

«ەگەمەن قازاقستان» .

جامبىل وبلىسى.