دالاداعى «اكۋلا»

بەزيمەني-1127.08.2014
وسىدان ءتورت جىل بۇرىن CAPro جاۋاپكەرشىلىگى شەكتەۋلى سەرىكتەستىگى باسپاحاناسىنان «قازاقستان: كوك جۇزىنەن كورىنىس» اتتى فوتوالبومنىڭ جارىق كورگەنى بار. ەلىمىزدىڭ 14 وبلىسىنداعى كوزدىڭ جاۋىن الارلىق تاڭعاجايىپ تابيعات كورىنىستەرى جيناقتالعان بۇل ۇجىمدىق ەڭبەك ەقىۇ- نىڭ استانادا وتەتىن ءسامميتى قوناقتارىنا بەرىلەتىن كادەسىي رەتىندە شىعارىلعان ەدى. ءتۇرلى- ءتۇستى فوتوالبومنىڭ ىشىندە كوزىمىزگە ەرەكشە تۇسكەنى سايىن دالا توسىندەگى اكۋلا بەينەسىندەگى كول بولدى. «بۇرىن- سوڭدى كورمەگەن، گازەت- جۋرنال مەن تەلەديداردا جاريالانباعان سۋرەت قوي بۇل» ، دەگەن سول ساتتە ونىمەن تاڭدانا تانىسقان ارىپتەستەرىمىز.

سودان باستاپ: «تابيعاتتىڭ وسى قايتالانباس تۋىندىسى ەلىمىزدىڭ قاي جەرىندە؟ ونى قالاي تاۋىپ، كورۋگە بولادى؟ » دەگەن سۇراق سانامىزدا تۇردى دا قويدى. فوتوالبومداعى سىلتەمەدە ونىڭ ورتالىق قازاقستان وڭىرىندە ەكەندىگى ءبىر- اق سويلەممەن ايتىلعان دا قويعان. باسقا ەشقانداي مالىمەت جوق. وسىنى كوكەيگە مىقتاپ تۇيگەن ءبىز ارا- تۇرا استانادان الماتىعا اتتانعاندا تەمىرتاۋدان بالقاشقا دەيىنگى ارالىقتاعى ۇشاق يلليۋميناتورىنان جەرگە ءۇڭىلۋدى ادەتكە اينالدىرعانىمىز بار. ءبىراق…

ءسويتىپ جۇرگەندە ءبىر كەزدەيسوق وقيعا بولدى. وسى جازدا «ەگەمەن قازاقستاننىڭ» قاراعاندى وبلىسىنداعى كۇندەرى باستالىپ، ءوڭىر ورتالىعىنان قارقارالىعا بەت الدىق. جول ورتادان اۋا بەرگەندە سول جاقتاعى الىس ويپاتتان وزىمىزگە كوپتەن بەرى تانىس سۋرەتتە بەينەلەنگەن كول سۇلباسى جالت ەتە تۇسپەسى بار ما؟ «سول ما، سول ەمەس پە؟ » دەيمىز ويلانىپ. ال ادام تولى «رافيك» بولسا العا زاۋلاپ بارادى توقتاماي. كوڭىلدەگى ەكىۇداي سەزىم جەتەگىمەن: «بۇل قاي جەر؟ » دەدىك مەنشىكتى ءتىلشىمىز ايقىن نەسىپبايعا. «بەتالىس كولى، – دەدى ول. – وندا «اسەل» شارۋا قوجالىعى ورنالاسقان. قارقارالى اۋدانىنداعى مامىرايەۆ سەلولىق وكرۋگىنە قارايتىن جەر» .

وسى مەزەتتە كولىگىمىز كەزەكتى ءبىر دوڭەسكە يەك ارتقان- تىن. سول بيىگىرەك جەردەن ءبىز الىستا بۇلدىراپ قالىپ بارا جاتقان كولگە تاعى ءبىر قاراپ ۇلگەردىك. سول… سونىڭ ءوزى سياقتى. كولدىڭ قاپتالىنداعى قوس سۋ توسپاسى سۋرەتتەگى اكۋلانىڭ ەكى قاناتى سەكىلدى كورىنىستى كوزگە اكەلىپ تۇر.

قاتەلەسسەك، عافۋ وتىنەمىز. قاتەلەسپەسەك، فوتوالبومدا بەينەلەنگەن ورتالىق قازاقستانداعى سۋرەتتىڭ وسى بولعانى دا. جالپى، قاراعاندى وبلىسىندا مىناداي اكۋلا كولدى كورگەن ادامدار بار ما ەكەن؟ بىلەتىندەر بولسا، رەداكتسياعا حابارلاسىپ، انىقتاۋعا ۇلەس قوسۋدى وتىنەمىز.

جانبولات اۋپباەۆ،

«ەگەمەن قازاقستان» .

قاراعاندى وبلىسى.