بۋرابايداعى قايىرىمدىلىق ۆەلوجارىسىندا 87 ملن. تەڭگە جينالدى

timthumb_php-500x332كوكشەتاۋ. 26 تامىز. اقمولا وبلىسى ۋچە- بۋراباي كۋرورتتى ايماعىندا Rixos Borovoe Ⅱ قايىرىمدىلىق ۆەلوشەرۋى وتكىزىلدى. يگى شارا بارىسىندا 87 ميلليون تەڭگە ءتۇستى. بۇل قاراجاتقا اقمولا وبلىسىنداعى وبلىستىق پەريناتالدى ورتالىقتىڭ جاڭا پەدياتورلىق كەشەنىنە مەديتسينالىق جابدىقتار ساتىپ الىنادى. بۇل تۋرالى egemen.kz ءتىلشىسى حابارلادى.

ۆەلوشەرۋدى بەس جۇلدىزدى Rixos Borovoe قوناق ءۇيى «اسىل ميراس» قايىرىمدىلىق قورىمەن بىرلەسە وتىرىپ، اقمولا وبلىسىنىڭ قولداۋ كورسەتۋىمەن ۇيىمداستىردى. قايىرىمدىلىق اكتسياسىنا 300 ادام قاتىستى، ولاردىڭ ىشىندە ۆەلوسپورت بويىنشا وليمپيادا ويىندارىنىڭ چەمپيونى الەكساندر ۆينوكۋروۆ، «تۋر دە فرانس 2014» جەڭىمپازى ۆينچەنتسو نيبالي مەن «Astana» ۆەلوكومانداسىنىڭ مۇشەلەرى دە بار.

جۇرت جىلى قابىلداعان شارانىڭ ۇلكەن ماقساتتاردى كوزدەيتىنى قۋانتادى. بىرىنشىدەن، كۋرورتتى ايماقتاعى ءتۋريزمدى دارىپتەۋگە نازار اۋدارىلسا، ەكىنشىدەن، ءوڭىر ءۇشىن اسا ماڭىزدى الەۋمەتتىك نىساننىڭ جۇمىسى جاندانباق. وسىدان بولسا كەرەك، اق تىلەك تۋىن اسقاقتاتقان اكتسيا بارىسىندا 12,5 ميلليون تەڭگە قارجى جينالادى دەپ كۇتىلسە، تۇپكى ناتيجە 87,7 ميلليون تەڭگەگە ءبىر- اق شارىقتادى. بۇل قارجى جاڭا ەمدەۋ كەشەنىن مەديتسينالىق جابدىقپەن تولىق قامتۋمەن قاتار، جىل سايىن 300-گە جۋىق نارەستەگە كۇتىم جاساۋعا، بۇكىل اقمولا وبلىسىنان كىشكەنتاي ناۋقاستاردى جانە ولاردىڭ انالارىن قابىلداۋعا مۇمكىندىك بەرمەك.

قايىرىمدىلىق ۆەلوشەرۋىنىڭ قاتىسۋشىلارى مەن قوناقتارى قوناق ءۇي اۋماعىندا ورنالاستىرىلعان جاردەمقارجىنى جيناۋعا ارنالعان ارنايى بوكستى پايدالانا وتىرىپ، جەكە وزدەرىنىڭ اتتارىنان جارنا قۇيىپ جاتتى. كورپوراتيۆتىك جارنانى جاساعىسى كەلگەن كومپانيالار قارجىنى ارنايى بانك شوتىنا اۋداردى. ولاردىڭ قاتارىندا ۆەرنىي كاپيتال توبى، كازتسينك، Beeline Kazakhstan, Kassa Nova, Forte Bank, تەمىر بانكى، اليانس بانكى، ەۋرازيا توبى، Altyntau Resources, Astana Property Management, BI Group, Turner، Deloitte, قازاقستاننىڭ تەننيس فەدەراتسياسى بەلسەندىلىك تانىتتى.

سونىمەن قاتار، ۆەلوشەرۋ اياقتالعان سوڭ وليمپيادا چەمپيونى الەكساندر ۆينوكۋروۆتىڭ، Astana Pro Team, Rixos Borovoe جانە Rixos Borovoe قوناق ءۇيىنىڭ، قازاقستان تەننيس فەدەراتسياسىنىڭ، Forte Bank, Kassa Nova سەكىلدى ءبىرقاتار بانكتەر مەن كوممەرتسيالىق ۇيىمداردىڭ، اتاپ ايتقاندا، Beeline Kazakhstan, Altyntau Resources, Villa Del Fiori جانە SADU استانا مەيرامحاناسىنىڭ لوتتارى قويىلعان قايىرىمدىلىق اۋكتسيونى ءوتتى. سونىڭ ىشىندە الەكساندر ۆينوكۋروۆ Vino ماركالى ۆەلوسيپەدىن جانە «تۋر دە فرانس» ۆەلوجارىسىنا كيگەن مايكاسىن اۋكتسيونعا قويدى.

شاراعا قاتىستى پىكىر ءبىلدىرۋىن سۇراعانىمىزدا وليمپيادا چەمپيونى، «Astana ProTeam» ۆەلوكومانداسىنىڭ باس مەنەدجەرى الەكساندر ۆينوكۋروۆ بىلاي دەدى: «ريكسوس بۋراباي ۆەلوشەرۋى داستۇرگە اينالۋدا. مەن بيىل دا قاتىسقانىما ريزامىن. ويتكەنى، بۇل ۆەلوسپورتتى دارىپتەۋ، سالاماتتى ءومىر سالتىن ناسيحاتتاۋ، جانە قايىرىمدىلىق شاراسى. جينالعان قور كوكشەتاۋ قالاسىنداعى پەرزەنتحانادا جۇزدەگەن ءسابيدىڭ ءومىرىن ساقتاپ قالۋعا باعىتتالادى. سوندىقتان، بۇل شارانى مەن مىندەتتى تۇردە قولدايمىن، ءتىپتى استانا ۆەلوكومانداسىنداعى ارىپتەستەرىمدى دە شاقىردىم» .

Astana ProTeam ۆەلوكومانداسىنىڭ كاپيتانى، «تۋر دە فرانس» 2014 جارىسىنىڭ جەڭىمپازى ۆينچەنتسو نيبالي: «وسى سياقتى اۋەسقويلار ۆەلوشەرۋى ەۋروپا ەلدەرىندە ءجيى وتەدى. مەن ءوز باسىم مۇنداي شارانى مەسسيندە ۇيىمداستىرامىن. وسىنداي اۋەسقويلار اكتسيالارىنان جينالعان قاراجاتتار قايىرىمدىلىققا جۇمسالادى. سوندىقتان، Rixos Borovoe ۆەلوشەرۋىنىڭ ۇيىمداستىرۋشىلارىنىڭ شاقىرۋىنا قۋاندىم. ماعان ۇناعانى – شارانىڭ قايىرىمدىلىق ماقساتى – پەريناتالدىق ورتالىققا جابدىقتار ساتىپ الۋ. سوندىقتان، الەكساندر ۆينوكۋروۆتىڭ شاقىرۋىنا ءبىر اۋىزدان كەلىستىم» ، – دەدى.

Rixos Borovoe وتەلىنىڭ باس مەنەدجەرى فيەۆزي وپسار بىلاي دەدى: «ۆەلوشەرۋ يدەياسى ءبىزدىڭ وتەل تۇجىرىمداماسىنا سايكەس كەلەدى. ياعني، مەيماندارىمىزدىڭ جايلى دەمالىپ، سالاۋاتتى ءومىر سالتىن قالىپتاستىرۋىنا جاعداي جاساۋ، سپورتتىق جانە بەلسەندى دەمالىسقا مۇمكىندىك ۇسىنۋ. وتكەن جىلعىداي، بيىلعى ۆەلوشەرۋدىڭ ماقساتى – قايىرىمدىلىق. ەلىمىزدە مۇنداي قۇندى باستامالار قانات جايا بەرەتىنىنە سەنىمدىمىن» .

اقمولا وبلىسىتىق پەريناتالدىق ورتالىعى باس دارىگەرىنىڭ ورىنباسارى ناتاليا تسىپلاكوۆانى سوزگە تارتقانىمىزدا تومەندەگىدەي ريزاشىلىق سەزىمدەرىن ءبىلدىردى: «Rixos Borovoe قايىرىمدىلىق ۆەلوشەرۋى ءبىز ءۇشىن تۇراقتى سەرىكتەس بولدى. بىلتىر قاتىسۋشىلاردان جينالعان قاراجاتتىڭ ارقاسىندا ءبىزدىڭ جان ساقتاۋ ءبولىمىمىز وتە قىمبات ءارى بىرەگەي جابدىقتار ساتىپ الدى. بيىل دا ۇيىمداستىرۋشىلار كومەك كورسەتۋگە ازىرلىكتەرىن ءبىلدىردى. راس. ءبىزدىڭ ورتالىق قوسىمشا قۇرال جابدىقتارعا ءزارۋ. بۇل جابدىقتار پەدياتريالىق كورپۋسقا قاجەت. ەگەر بۇل جابدىقتارعا قول جەتكىزسەك، ءبىز وزگە شالعاي جاتقان ايماقتاردىڭ تۇرعىندارىن دا قابىلداي الامىز. سول بالالار مەن ولاردىڭ اتا- انالارى اتىنان، سونىمەن قاتار ورتالىقتىڭ قىزمەتكەرلەرى اتىنان Rixos Borovoe ۆەلوشەرۋىن ۇيىمداستىرۋشىلارعا ۇلكەن العىسىمىزدى بىلدىرەمىز» .

باقبەرگەن امالبەك.

دەرەككوز: egemen.kz.

فوتو: kaz.presscub.kz.