پرەزيدەنتتىككە ۇمىتكەرلەر ۇسىنۋ مەرزىمى اياقتالدى

15-03-15-CIK-1-500x37516.03.2015
16 مارت. كەشە كەشكە ورتالىق سايلاۋ كوميسسياسىندا قازاقستان پرەزيدەنتتىگىنە ۇمىتكەر ۇسىنۋ كەزەڭى اياقتالدى. بۇل تۋرالى ورتالىق سايلاۋ كوميسسياسىنىڭ دەرەگىنە سۇيەنگەن egemen.kz ءتىلشىسى حابارلادى.
بارلىعى سايلاۋعا قاتىسۋعا 27 ۇمىتكەر تىلەك ءبىلدىردى. داۋىسقا تۇسۋشىلەردىڭ اراسىندا قازىرگى ءىس باسىنداعى پرەزيدەنت نۇرسۇلتان نازاربايەۆ بار. ول ازىرگە ورتالىق سايلاۋ كوميسسياسىندا تىركەۋدەن وتكەن جالعىز كانديدات بولىپ وتىر. بۇدان باسقا، كوميسسيانىڭ مەملەكەت باسشىسى بولۋعا تىلەك بىلدىرگەن ۇمىتكەرلەرى تىزىمىندە بىرنەشە ادام بار. اتاپ ايتقاندا، قازاقستان كوممۋنيستىك پارتياسىنىڭ وكىلى تۇرعىن سىزدىقوۆ، وزدەرىن وزدەرى ۇسىنعان قوعامدىق قوردىڭ جەتەكشىسى ليمان قويشيەۆا، جۇمىسسىز قايرات تورەگەلديەۆ، كاسىپوداقتار فەدەراتسياسىنىڭ ءتوراعاسى ءابىلعازى قۇسايىنوۆ مەملەكەتتىك ءتىل بويىنشا سىناقتان ءوتىپ، پروتسەدۋرانى جالعاستىرىپ جاتىر. ەندى قوعامدىق بەلسەندى امانتاي قاجى اسىلبەك، جۋرنال رەداكتورى جارىلقاپ قالىباي، «تابيعات» قوعامىنىڭ باسشىسى مەلس ەلەۋسىزوۆ، قازاق سپورت جانە تۋريزم اكادەمياسى رەكتورىنىڭ كەڭەسشىسى حاسەن قوجاحمەت، جۇمىسسىز مۇرات تەلىبەكوۆ، حالىقتىق جەمقورلىققا قارسى كوميتەتتىڭ ءتوراعاسى جاقسىباي بازىلبايەۆ، زەينەتكەر ءبىرجان دىلماعامبەت قازاق تىلىنەن ەمتيحان تاپسىرۋلارى ءتيىس. پرەزيدەنت بولۋعا تىلەك بىلدىرگەندەر قاتارىندا 8 ادام مەملەكەتتىك ءتىل ەمتيحانىنان وتە المادى. ولاردى جەكە كاسىپكەر اسقار سىرعابايەۆ، جۇمىسسىز سافيوللا الداجانوۆ، قوعامدىق بەلسەندى ەسەنبەك وكتەشبايەۆ، ماي قۇيۋ ستانساسىنىڭ قوجايىنى قانات جۇمان، اسكەري قىزمەتكەر ەرجان سەرعازين، «كەنەسارى» قورىنىڭ ءتوراعاسى ءۋاليحان قايساروۆ، كاسىپكەر باقتيار ەستەمەسوۆ، «ەكولوگيالىق تۇراقتىلىق» قوعامدىق بىرلەستىگى باسقارماسىنىڭ ءتوراعاسى سەرىك مۇقاش قۇرايدى.
كوميسسيا جاستارى 40-قا تولماعاندارىنا بايلانىستى جۇرگىزۋشى سۋحراب مىرزاشيەۆ پەن قۇرىلىسشى- ينجەنەر باقىت ابدىكارىموۆتى تىركەۋدەن باس تارتتى.
ال جۇمىسسىز زەينەتكەر ياكوبجان جۇنىسبەكوۆ، «جاس قانات-2006» جشس ديرەكتورى قايرات مايىشيەۆ جانە ايگۇل وتەپوۆا مەملەكەتتىك ءتىل بويىنشا ەمتيحان تاپسىرۋ ءۇشىن بەلگىلەنگەن ۋاقىتتا لينگۆيستيكالىق كوميسسيا الدىنا كەلمەي قالدى.
ءوزىنىڭ كانديداتۋراسىن ۋنيۆەرسيتەت وقىتۋشىسى مۇحامەدراحيم قۇرسابايەۆ قايتىپ الدى. پرەزيدەنتتىككە كانديداتتاردى تىركەۋ 25 ناۋرىزدا اياقتالادى. قازاقستاندا كەزەكتەن تىس سايلاۋ 2015 -جىلعى 26 ساۋىردە وتەدى.
مۇرات ايتقوجا.
اقپارات كوزى: https://egemen.kz/2015/03/16/53078