مەملەكەت باسشىسى الماتى وبلىسىنا جاساعان جۇمىس ساپارىنىڭ ءبىرىنشى كۇنىن قورىتىندىلادى

19.08.2014 8ff74d9152aba33e1cce07b4dbde48cb-500x332
. پرەزيدەنت الماتى وبلىسىنا جاساعان ءىسساپارىندا وڭىردە اتقارىلىپ جاتقان جۇمىستارمەن كەڭىنەن تانىستى. سونداي- اق، ول الداعى ۋاقىتتا جۇزەگە اسىرىلۋى ءتيىس شارۋالاردى اتاپ كورسەتىپ، ءتيىستى تاپسىرمالار بەردى. بۇل تۋرالى حابارلادى.

مەملەكەت باسشىسى اتالعان وبلىستاعى ءىسساپارىن «جەرۇيىق- تالدىقورعان» اگرووندىرىستىك كەشەنى» جاۋاپكەرشىلىگى شەكتەۋلى سەرىكتەستىگىنىڭ جۇمىسىمەن تانىسۋدان باستادى. سەرىكتەستىكتى ارالاۋ بارىسىندا پرەزيدەنتكە وڭىردەگى اۋىل شارۋاشىلىعى سالاسىنىڭ دامۋى جانە الداعى ۋاقىتقا بەلگىلەنگەن جوسپارلار جونىندە باياندالدى. سونىمەن قاتار، ن. نازاربايەۆ اۋىلشارۋاشىلىعى ەڭبەككەرلەرىمەن جۇزدەستى. بۇل كەزدەسۋدە پرەزيدەنت ماقساتسىز پايدالانىلىپ جاتقان جەر ۋچاسكەلەرىن انىقتاۋ ءۇشىن ريەۆيزيا جۇرگىزۋ قاجەتتىگىنە نازار اۋداردى. وسىعان وراي ول: «جەردى شىن مانىندە اۋىل شارۋاشىلىعى ماقساتىندا پايدالانۋعا، وسىرىلگەن ونىمنەن پايدا تابۋعا مۇددەلىلەرگە بەرگەن ءجون» ، – دەدى.

ءوز كەزەگىندە اگرارشىلار سالانى دامىتۋعا بار كۇش- جىگەرلەرىن جۇمساۋعا ۋادە بەردى.

بۇدان كەيىن پرەزيدەنت تالدىقورعان قالاسىنىڭ وڭتۇستىك- باتىس تۇرعىن ءۇي الابىندا بولدى. مۇندا مەملەكەت باسشىسىنا وبلىستاعى قۇرىلىس سالاسىنىڭ دامۋى مەن «قولجەتىمدى باسپانا-2020» مەملەكەتتىك باعدارلاماسىنىڭ جۇزەگە اسۋ بارىسى، جالپى الاڭى 206 گەكتار وڭتۇستىك- باتىس تۇرعىن ءۇي اۋدانىنىڭ ناقتىلى جوسپارىنىڭ جوباسى تانىستىرىلدى.

نىساندى ارالاۋ بارىسىندا ن. نازاربايەۆ مەردىگەر قۇرىلىس كومپانيالارىنىڭ باسشىلارىمەن جانە قۇرىلىسشىلارمەن اڭگىمەلەستى.

ودان ارى مەملەكەت باسشىسى جاڭادان ىسكە قوسىلعان، يتاليالىق جابدىقتارمەن جابدىقتالعان، «50-دەن استام ءونىم شىعارۋعا لايىقتالعان «JLC ءسۇت» جاۋاپكەرشىلىگى شەكتەۋلى سەرىكتەستىگىنىڭ ءوندىرىس تەحنولوگياسىمەن تانىستى، سونداي- اق، كاسىپورىن ۇجىمىمەن اڭگىمەلەسىپ، ولارعا تابىس تىلەدى.

تاعى ءبىر توقتالا كەتەر ءجايت، ن. نازاربايەۆ جۇمىس ساپارى بارىسىندا الماتى وبلىسىنىڭ اكىمى اڭسار مۇساحانوۆقا ءبىرقاتار تاپسىرمالار بەردى. اتاپ ايتقاندا، ءوڭىر باسشىسىنا ەگىس القاپتارىن تەكسەرۋ، پايدالانىلماي جاتقان جەرلەردى قايتارىپ الۋ جانە قانت قىزىلشاسىنىڭ القابىن ۇلعايتۋ ءىسى جۇكتەلدى. بۇدان بولەك ول «اق بۇلاق» ، «ەڭبەكپەن قامتۋدىڭ جول كارتاسى 2020» باعدارلامالارىنىڭ جۇزەگە اسۋىنا جانە 100 پايىز ورىندالۋى ءتيىس يننوۆاتسيالىق جوبالارعا ەرەكشە ءمان بەرۋدى قاداپ ايتتى.

پرەزيدەنت جۇمىس ساپارى بارىسىندا الماتى وبلىسىنىڭ جۇرتشىلىق وكىلدەرىمەن جانە كاسىپكەرلەرىمەن كەزدەستى. جيىندا مەملەكەت باسشىسى وبلىستىڭ كەيبىر اۋداندارىندا «بيزنەستىڭ جول كارتاسى -2020» باعدارلاماسى اياسىندا كومەك العان كاسىپكەرلەردىڭ سانى از ەكەندىگىنە نازار اۋداردى.

سونداي- اق ول اۋىل شارۋاشىلىعى مينيسترىنە سالا بويىنشا سۇرانىسقا تالداۋ جۇرگىزۋدى، باسىمدىعى بار باعىتتاردى انىقتاۋدى جانە سالانى دامىتۋ جونىندەگى شارالاردى ازىرلەۋدى جانە يمپورتتىڭ دەنىن قۇرايتىن تاۋار تۇرلەرىن انىقتاپ، ونى قىسقارتۋ ءۇشىن جۇمىس جۇرگىزۋدى تاپسىردى. بۇعان قوسا، مەملەكەت باسشىسى ءوڭىردى دامىتۋ ءۇشىن بارلىق قاجەتتى كومەك جاسالىپ جاتقانىن ايتا كەلە، جەرگىلىكتى بيلىك ورگاندارىنىڭ تۇرعىنداردى جۇمىسپەن قامتۋ، باسپانا قۇرىلىسى، دەنساۋلىق ساقتاۋ مەن ءبىلىم بەرۋ سالاسىن دامىتۋ ماسەلەلەرىنە نازار اۋدارۋى قاجەتتىگىنە توقتالدى.

كەزدەسۋ قورىتىندىسى بويىنشا، پرەزيدەنت ۇكىمەتكە الداعى جوسپارلاردى انىقتاۋدى، پرەزيدەنت اكىمشىلىگىنە بارلىق ماسەلەلەردى ءوز باقىلاۋىنا الۋدى جۇكتەدى.

جولدىباي بازار.

دەرەككوز: akorda.kz.

فوتو: zhetysu-gov.kz, «قازاقپارات» .