«قازاق تىلىندەگى 100 جاڭا وقۋلىق» جوباسىن تالقىلاۋ جۇمىستارى باستالدى


ەلباسى نۇرسۇلتان نازاربايەۆ ءوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا تاريحتى تانۋ، بولاشاقتى باعدارلاۋ كەرەكتىگىن مىندەتتەي كەلە، الداعى بىرنەشە جىلدا گۋمانيتارلىق ءبىلىمنىڭ بارلىق باعىتتارى بويىنشا الەم عالىمدارى جازعان ەڭ ۇزدىك 100 كىتاپتى قازاق تىلىنە اۋدارۋ كەرەكتىگىن، سونداي- اق جاستارعا دۇنيە جۇزىندەگى تاڭداۋلى ۇلگىلەردىڭ نەگىزىندە ءبىلىم الۋعا مۇمكىندىك جاساۋ قاجەتتىگىن ايتقان بولاتىن. پرەزيدەنت تاپسىرماسىنا سايكەس، ەلىمىزدە ۇلتتىق اۋدارما بيۋروسى قۇرىلىپ، جوعارى وقۋ ورىندارىنا ارنالعان گۋمانيتارلىق باعىتتاعى تاڭداۋلى وقۋلىقتار قازاق تىلىنە اۋدارىلا باستادى. جۋىردا عانا استانا قالاسىندا جيىن ءوتىپ، سول جولى ەلباسى نۇرسۇلتان نازاربايەۆقا «100 جاڭا وقۋلىق» باعدارلاماسى اياسىندا قازاق تىلىنە اۋدارىلعان العاشقى 18 كىتاپ تانىستىرىلعان ەدى. وسى ورايدا ەلىمىز بويىنشا قازاقستان حالقى اسسامبلەياسىنىڭ ءبىرىڭعاي كۇنى ۇيىمداستىرىلىپ، اۋقىمدى شارا اياسىندا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىن تالقىلاۋ جۇمىستارى باستالدى.
جاستاردىڭ الەمنىڭ گۋمانيتارلىق وقۋلىقتارىن قازاق تىلىندە وقۋىنا مول مۇمكىندىك اشىپ وتىرعان ەڭبەكتەردى وڭىرلەردەگى وقۋ ورىندارىنىڭ ستۋدەنتتەرىنە تانىستىرۋ ماقساتىندا ەل كولەمىندە ۇيىمداستىرىلعان «National bookdating» اكتسياسى اياسىندا تاراز قالاسىنداعى «تاراز پاراسات» كوللەدجىندە جامبىل وبلىسى اكىمى اپپاراتىنىڭ «قوعامدىق كەلىسىم» مەكەمەسىنىڭ ۇيىمداستىرۋىمەن ارنايى ءىس- شارا ءوتتى. وعان وڭىردەگى جوعارى جانە ارناۋلى ورتا وقۋ ورىندارىنىڭ وقىتۋشىلارى مەن ستۋدەنتتەرى قاتىسىپ، وقۋلىقتاردى وبلىستىق قازاقستان حالقى اسسامبلەياسى جانىنداعى عىلىمي- زەرتتەۋ توبى ءتوراعاسىنىڭ ورىنباسارى پاريدا مامەدوۆا تانىستىردى.

ءوز سوزىندە پاريدا مامەدوۆا ەلباسى تاپسىرماسى نەگىزىندە 100 وقۋلىق ءتىزىمىن جاساقتاۋ كەزىندە 800-گە تارتا كىتاپ ساراپتالىپ، تالدانعانىن، سولاردىڭ ىشىنەن تاڭدالىپ الىنعان 100 تۋىندىنىڭ اۋدارماعا جىبەرىلگەنىن ايتىپ ءوتتى. وسىناۋ ۇلكەن ەڭبەكتىڭ ناتيجەسىندە دەرەك دجونستوننىڭ «فيلوسوفيانىڭ قىسقاشا تاريحى: سوكراتتان دەرريداعا دەيىن» ، ەنتوني دجون مەن پاتريك كەننيدىڭ «باتىس فيلوسوفياسىنىڭ جاڭا تاريحى، انتيكا فيلوسوفياسى» 4 تومدىق كىتابىنىڭ 1-تومى جانە «باتىس فيلوسوفياسىنىڭ جاڭا تاريحى، ورتا عاسىر» 4 تومدىق كىتابىنىڭ 2-تومى، رەمي حەسستىڭ «فيلوسوفيانىڭ تاڭداۋلى 25 كىتابى» ، دەۆيد برينكەرحوۆتىڭ «الەۋمەت تانۋ نەگىزدەرى» ، دجوردي ريتتسەردىڭ «الەۋمەت تانۋ تەورياسى» ، ەليوت ارونسوننىڭ «كوپكە ۇمتىلعان جالعىز: الەۋمەتتىك پسيحولوگياعا كىرىسپە» ، دۋەين پ. شۋلتس پەن سيدنەي ەللەن ءشۋلتستىڭ «قازىرگى پسيحولوگيا تاريحى» ، دەۆيد مايەرستىڭ «الەۋمەتتىك پسيحولوگيا» ، گرەگوري مەنكيۋ مەن مارك پ. تەيلوردىڭ «ەكونوميكس» ، دونالد ف. كۋراتكونىڭ «كاسىپكەرلىك: تەوريا، پروتسەسس، پراكتيكا» ، ريككي ۆ. گريففينيدىڭ «مەنەدجمەنت» ، كارەن ارمسترونگتىڭ «يۋدايزم، حريستياندىق پەن يسلامداعى 4000 -جىلدىق ىزدەنىس: قۇداي تانۋ بايانى» ، ۆيكتوريا فرومكين، روبەرت رودمان جانە نينا ءحايمستىڭ ء«تىل بىلىمىنە كىرىسپە» ، سۆەتلانا تەر- ميناسوۆانىڭ ء«تىل جانە مادەنيەتارالىق كوممۋنيكاتسيا» ، الان بارناردتىڭ «انتروپولوگيا تاريحى مەن تەورياسى» ، كلاۋس شۆابتىڭ ء«تورتىنشى يندۋستريالىق ريەۆوليۋتسيا» اتتى وقۋلىقتارى جارىق كورگەن.

كىتاپتاردى تانىستىرۋ كەزىندە پ. مامەدوۆا ەلىمىزدە ءبىر ۋاقىتتا ءوتىپ وتىرعان «National bookdating» اكتسياسىنىڭ نەگىزگى ماقساتى – جاستارعا مەملەكەت تاراپىنان كورسەتىلىپ وتىرعان قامقورلىقتى كورسەتۋ ەكەندىگىن ايتىپ ءوتتى. سونىمەن قاتار بۇگىنگى تاڭدا قازاق تىلىنە اۋدارىلعان تاريح، ساياساتتانۋ، الەۋمەتتانۋ، پسيحولوگيا، ءدىنتانۋ، فيلوسوفيا جانە جۋرناليستيكا سالالارىنداعى كىتاپتاردىڭ ءارقايسىسى 10 مىڭ دانامەن باسىلىپ، الداعى ءبىر اي ىشىندە جوعارى وقۋ ورىندارى مەن كىتاپحانالارعا تاراتىلادى. سونداي- اق اتالعان قۇندى دۇنيەلەر اعىمداعى جىلدان باستاپ وقۋ باعدارلامالارىنا دا ەنگىزىلىپ، بارلىق وقۋلىقتاردىڭ ەلەكتروندى نۇسقالارى جانە سونىڭ نەگىزىندە ازىرلەنگەن بەينەدارىستەر توپتاماسى 100kitap.kz سايتى ارقىلى دا تارالاتىن بولادى. كىتاپتاردى تانىستىرۋ كەزىندە پ. مامەدوۆا ستۋدەنتتەرگە قولدا بار مۇمكىندىكتى پايدالانىپ، اتالعان كىتاپتاردى تۇگەلدەي وقىپ شىعۋعا كەڭەس بەردى. ال جيىن بارىسىندا ستۋدەنتتەر قازاق تىلىنە اۋدارىلعان جانە اۋدارىلىپ جاتقان كىتاپتارعا قاتىستى مالىمەتتەر جايىندا سۇراپ، ءتيىستى جاۋاپ الدى.

سونداي- اق تاراز قالاسىنداعى «دوستىق» ۇيىندە ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا «جاڭا گۋمانيتارلىق ءبىلىم. قازاق تىلىندەگى 100 جاڭا وقۋلىق» جوباسىن تالقىلاۋ ماقساتىندا قازاقستان حالقى اسسامبلەياسىنىڭ ءبىرىڭعاي كۇنىنە وراي جيىن ءوتتى. وعان وڭىردەگى «جاڭعىرۋ جولى» جاستار قوزعالىسىنىڭ، «اق جەلكەن» جاستار ليگاسىنىڭ وكىلدەرى، تاراز يننوۆاتسيالىق- گۋمانيتارلىق ۋنيۆەرسيتەتىنىڭ جانە «بولاشاق» كوللەدجىنىڭ ستۋدەنتتەرى، جامبىل وبلىستىق جاستار ساياساتى ماسەلەلەرى باسقارماسىنا قاراستى «جاستار رەسۋرستىق ورتالىعى» مەكەمەسىنىڭ قىزمەتكەرلەرى قاتىستى.

جيىنعا قاتىسقان جاستار اراسىندا گۋمانيتارلىق عىلىمدار شەڭبەرىندە قازاق تىلىنە اۋدارىلعان كىتاپتاردىڭ العاشقى توپتامالارى ناسيحاتتالدى. ءوز سوزىندە جامبىل وبلىسى اكىمى اپپاراتى «قوعامدىق كەلىسىم» مەكەمەسى كورمە زالىنىڭ مەڭگەرۋشىسى ۆەرا مايكوۆيچ «قازاق تىلىندەگى 100 جاڭا وقۋلىق» جوباسى بويىنشا اۋدارىلعان كىتاپتاردىڭ بۇگىنگى جاستار ءۇشىن اسا ماڭىزدىلىعىن ايتىپ ءوتتى. سونداي- اق الداعى ۋاقىتتاردا جاستاردىڭ اتالعان كىتاپتار ارقىلى الەمدىك دەڭگەيدەگى گۋمانيتارلىق باعىتتاعى عىلىمداردى تەرەڭ يگەرۋگە مۇمكىندىك الاتىنى دا ايتىلدى. شارا بارىسىندا جاستار 200 اۋدارماشى مەن 40 رەداكتور بىرلەسە ەڭبەك ەتكەن كىتاپتار تۋرالى سۇراپ، ناقتى جاۋاپتار الدى. سونىمەن قاتار جاڭا جيناقتار تۋرالى ارنايى بەينەروليك كورسەتىلىپ، جينالعان جاستار «دوستىق» ءۇيىنىڭ ساۋلەتىمەن تانىستى.

حاميت ەسامان،
«ەگەمەن قازاقستان»

جامبىل وبلىسى