«امىرە» ءفيلمى كورەرمەنگە جول تارتتى


كەشە استانادا ش. ايمانوۆ اتىنداعى «قازاقفيلم» اق پەن ءاليدار وتەمۇراتوۆتىڭ Dar Play كومپانياسى بىرلەسە تۇسىرگەن «امىرە» دراماسىنىڭ تۇساۋكەسەرى ءوتتى.
مادەنيەت جانە سپورت مينيسترلىگىنىڭ قولداۋىمەن ەكرانعا جول تارتقان فيلمدە قازاقتىڭ تەنور داۋىستى ءبىرتۋار ءانشىسى امىرە قاشاۋبايەۆتىڭ ەرتە ۇزىلگەن ءان-عۇمىرىنىڭ جارقىن دا شۋاقتى ءھام شىتىرمانعا تولى قايشىلىقتى ءومىرى قاتار سۋرەتتەلەدى. اتالمىش كينوكارتينا ءانشىنىڭ 130 جىلدىق مەرەيتويىنا وراي كورەرمەنىمەن قاۋىشىپ وتىر.

جاڭا ءفيلمنىڭ تۇساۋكەسەرىنە وراي وتكىزىلگەن باسپا ءسوز ءماسليحاتىندا مادەنيەت جانە سپورت ءمينيسترى ارىستانبەك مۇحامەدي ۇلى: ء«بىز بۇگىن نازارلارىڭىزعا ەلىمىزدىڭ دارا ءانشىسى امىرە قاشاۋبايەۆ تۋرالى تۇسىرىلگەن كوركەم ءفيلمدى ۇسىنىپ وتىرمىز. فيلمدە قاشاۋبايەۆتىڭ 1925-جىلى پاريجدەگى قايتالانباس ساپارى تۋرالى ءسوز ەتىلەدى. سونداي- اق ءانشى تۋرالى ەلگە بەلگىسىز دەرەكتەر دە فيلمدە كورىنىس تاپقان. امىرە – ءبىرىنشى بولىپ ەۋروپادا قازاق ءانىن اۋەلەتكەن ءانشى. ونىڭ تۇلعاسى قازاق ونەرى مەن جالپى قازاق ءۇشىن اسا ماڭىزدى» – دەپ كينوتۋىندىنىڭ ماڭىزى مەن ارتىقشىلىعىن اتاپ ءوتتى.

ءفيلمنىڭ ەرەكشەلىگى سول – قازاقتىڭ ءبىرتۋار پەرزەنتى، كومەيىنە بۇلبۇل ۇيا سالعان كۇمىس كومەي انشىسىنە امەريكالىق كينو ماماندارىنىڭ قىزىعۋشىلىق تانىتۋى بولدى. ستسەناريىنەن باستاپ، اكتەرلىك، رەجيسسەرلىك جۇمىسىنا دەيىن حالىقارالىق مامانداردىڭ تەڭ دارەجەدە اتسالىسۋىمەن تۋعان كينوتۋىندىنىڭ ۇسىنىلۋ فورماسى مەن جەتكىزىلۋ ءتاسىلى، تاريحي دەرەكتەردىڭ سويلەتىلۋى وزگەشە. ستسەناري اۆتورى – بەندجامين ا. ۆان دەر ۆين. حالىقارالىق ءتۇسىرىلىم توبىنىڭ قۇرامىندا: امەريكالىق- رەجيسسەر دجەف ۆەسپا، وپەراتور – ماكسيم وسادچي سىندى بىلىكتى ماماندار بار. فيلم لاتۆيا، لوس- اندجەلەس قالالارىندا، سونداي- اق الماتى وبلىسىنىڭ ءۇشقوڭىر اۋىلىندا ءتۇسىرىلدى. باستى رولدەردى وتاندىق اكتەرلەر: سانجار ماديەۆ (امىرە) جانە ەركەبۇلان دايىروۆ (مۇستافا شوقاي) سومدادى. سونىمەن قاتار فيلم كورەرمەندەرى بريتاندىق اكتەر بەن الدريدج بەن اۋستراليالىق اكتريسا ەببي كورنيشتىڭ دا تاماشا جۇمىسىنا كۋا بولا الادى. كينوتۋىندىدا امىرە قاشاۋبايەۆتىڭ رەپەرتۋارىنداعى «بالقاديشا» ، «ءۇش دوس» ، «دۋدار-اي» ، «بەس قاراگەر» جانە تاعى باسقا اندەر ورىندالدى.

ءان اتاسى – امىرە قاشاۋبايەۆتىڭ 130 جىلدىق مەرەيتويىنا تۇسپا- تۇس كەلگەن فيلم جالپىۇلتتىق كورسەتىلىمگە 2018 -جىلدىڭ 5 -ساۋىرىنەن باستاپ شىعادى دەپ جوسپارلانۋدا.

نازەركە جۇماباي،
«ەگەمەن قازاقستان»