ەلباسىنىڭ الداعى جۇمىس كەستەسى جاريالاندى


مەملەكەت باسشىسىنىڭ قاتىسۋىمەن وتەتىن سىرتقى ساياسي وقيعالارعا قاتىستى كوپتەگەن ساۋالدىڭ كەلىپ تۇسۋىنە بايلانىستى پرەزيدەنتتىڭ ءباسپاسوز حاتشىسى ايدوس ۇكىباي نۇرسۇلتان نازاربايەۆتىڭ الداعى جۇمىس كەستەسى تۋرالى ايتتى.
«مەملەكەت باسشىسى بيىلعى 13- ناۋرىزدا كورەيا رەسپۋبليكاسى ۇلتتىق اسسامبلەياسىنىڭ سپيكەرى چون سە گيۋنمەن كەزدەسەدى.

14-ناۋرىزدا نۇرسۇلتان نازاربايەۆتىڭ شاقىرۋىمەن تاجىكستان رەسپۋبليكاسىنىڭ پرەزيدەنتى ەمومالي راحمون قازاقستانعا رەسمي ساپارمەن كەلەدى. ساپار اياسىندا مەملەكەتتەر باسشىلارى كۇن تارتىبىندەگى ەكىجاقتى، وڭىرلىك جانە حالىقارالىق وزەكتى ماسەلەلەردى تالقىلايدى.

15-ناۋرىزدا قازاقستان پرەزيدەنتى ورتالىق ازيا ەلدەرى، سونىڭ ىشىندە قازاقستان رەسپۋبليكاسى، قىرعىز رەسپۋبليكاسى، تاجىكستان رەسپۋبليكاسى، تۇرىكمەنستان جانە وزبەكستان رەسپۋبليكاسى باسشىلارىنىڭ جۇمىس (كونسۋلتاتيۆتىك) كەزدەسۋىنە قاتىسادى. بۇل بەس جاقتى كەلىسسوزدەردىڭ ورتالىق ازيانىڭ بارلىق ەلى ءۇشىن ورتاق مەرەكە – ناۋرىز مەيرامى قارساڭىندا ءوتۋىنىڭ ماڭىزى زور.

تۇرىكمەنستاندا جوعارى دەڭگەيدەگى ءىس- شارالاردىڭ الدىن الا جوسپارلانۋىنا بايلانىستى بۇل ەلدەن مەدجليس ءتورايىمى ا. ت. نۋربەردىيەۆا حانىم قاتىسادى.

سول كۇنى ن. نازاربايەۆ پەن ش. ميرزيويەۆتىڭ قاتىسۋىمەن قازاقستانداعى وزبەكستان جىلىنىڭ سالتاناتتى اشىلۋ ءراسىمى وتەدى. سونداي- اق، ەكى ەل كوشباسشىلارى ونەر قايراتكەرلەرىنىڭ گالا- كونتسەرتىنە قاتىسادى.

16 -ناۋرىزدا مەملەكەت باسشىسى سيريا جونىندەگى استانا پروتسەسىنە كەپىل بولاتىن مينيسترلىك دەڭگەيىندەگى ءبىرىنشى كەزدەسۋگە قاتىسۋشىلار – رەسەي، تۇركيا جانە يران سىرتقى ىستەر مينيسترلەرىمەن جۇزدەسەدى» .