ءادىل احمەتوۆ، اكتەر: جان تۇكپىرىڭە ساقتاپ جۇرەتىن تيپاجدار بولادى


ادەتتە داڭقتى اكتەرلەر تراگەديادان كومەدياعا، درامادان ۆوديەۆيلگە ەركىن اۋىسا بەرەدى. قاي جانردا بولماسىن، ولار سومداماعان كەيىپكەر كەمدە- كەم. شىعارماشىلىقتا شىڭدالعانداردىڭ ونەردەگى اۋقىمىن كەڭىتە، بەدەلىن نىعايتا تۇسەتىن دۇنيە – سان الۋان مىنەزگە امبەباپتىق. كينو جانە دراما اكتەرى ءادىل احمەتوۆتى دە وسى ساناتقا قوسۋعا بولادى. ساحنالىق كەيىپكەر بولمىسىن قاز- قالپىندا بەرۋگە ۇمتىلىسىندا جانر تالعامايتىن اكتەردىڭ وتكىر مىنەزىن كورەسىز. كەزەكتى قويىلىم الدىندا مۇقيات دايىندالۋدى، ونەرىنە وزگەشەلىك ۇستەپ وتىرۋدى بەرىك ۇستانعان ادىلمەن اڭگىمەلەسكەن ەدىك.
– ءادىل ەرالى ۇلى، جۋىردا «قازاقستاننىڭ ەڭبەك سىڭىرگەن قايراتكەرى» اتاعىنا، مادەنيەت سالاسىنداعى پرەزيدەنت ستيپەندياسىنا يە بولدىڭىز. ماراپاتىڭىزبەن قۇتتىقتايمىز!

– راحمەت! بۇل وسى ۋاقىتقا دەيىنگى ەڭبەكتى قورتىندىلاعان جىل بولدى. جىل باسىندا «كينويندۋستريا بەدەلدىسى» اتالىمى بويىنشا «حالىق سۇيىكتىسى» ۇلتتىق جۇلدەسى تابىستالدى. ودان كەيىن تۇركى الەمى تەاترلارىنىڭ «تەاتر كوكتەمى – 2017» حالىقارالىق فەستيۆالىندە «اساۋعا تۇساۋ» كومەدياسى گران- پريگە يە بولىپ، پەترۋچيو ءرولى ءۇشىن «قويىلىمداعى ۇتىمدى بەينە» اتالىمى بويىنشا جۇلدەگەر اتاندىم. ونەر ادامدارىنان قۇرالعان «الاتاۋ» فۋتبول كومانداسى بار. بيىل ماسكەۋدە جەتىنشى رەت وتكەن «ارت- فۋتبول» حالىقارالىق فەستيۆالىنە قاتىسىپ، الەم چەمپيونى اتاندىق. 16 فۋتبول كومانداسى قاتىسقان الاڭدا تارتىمدى تارتىس بولدى. ويىندا رۋمىندارعا باسپەن گول سالىپ ەدىم، «ەلدوس احمەتوۆ فۋتبولدان قازاقستان ۇلتتىق قۇراماسىندا وينايدى» دەپ مەنى فۋتبولشى ەلدوسپەن شاتاستىرىپ، داۋ شىعاردى. وسىلاي ۇلكەندى- كىشىلى ماراپاتتارعا قۋانىپ ۇلگەرە الماي جاتقاندا، جىل اياعىندا «قازاقستاننىڭ ەڭبەك سىڭىرگەن قايراتكەرى» اتاعىن بەردى. تابىستى جىل بولدى. اعايىمىز «ادام تالماي ەڭبەكتەنە بەرسە، ءبىر كۇنى وتەۋى قايتادى» دەپ ۇنەمى ايتۋشى ەدى.

– ۇزەڭگىلەس زامانداستارىڭىز ءسىز جايىندا اڭگىمە بولا قالسا، الدىمەن ادامگەرشىلىگىڭىز تۋرالى ايتادى.. .

– ءقازىر زاماننىڭ قيلى تۇسى. بىرەۋلەردى اناسى عانا جەتكىزىپ وتىرسا، بىرەۋلەردى اكەسى تاربيەلەپ وتىر. اللانىڭ بەرگەن سىيى بولار، ۇلكەن اۋلەتتە، اتام مەن اجەمنىڭ ەرتەگىسىنە، اكەم مەن شەشەمنىڭ مەيىرىنە قانىپ ءوستىم. الماتىنىڭ شەتىندەگى «قالقامان» كەنتىندە تۇردىق. مال ۇستادىق، شاعىن شارۋاشىلىعىمىز بولدى. قورا تازالاۋ، مالدى جايعاۋ سىندى شارۋانى جاتسىنعان جوقپىز. ەكىنشى سىنىپتا ءسۇت ساتا باستادىم. جازدىگۇنى قاۋىن- قاربىز دا ساتاتىنبىز. كەيىن دۇكەن اشىپ الدىق. اۋىلدان كەلىپ وقۋعا تاپسىراتىندار، قالاعا الدەنەدەي شارۋامەن كەلەتىندەردىڭ بارلىعى ءبىزدىڭ ۇيگە تۇسەتىن. ۇيدەن قوناق ارىلمايتىن. ۇلكەن كىسىلەردىڭ قاسىندا جۇرگەن سوڭ كوپ تىڭدايسىڭ، كوپ قىدىراسىڭ. اكە- شەشەمىز قاتاڭ شەكتەۋ قويمادى، ەركىنسىتىپ تە جىبەرمەدى. وسىلايشا، اۋىل مەن قالانىڭ تىرشىلىگىن قاتار كورىپ ءوستىم. كوپشىل بولۋىما وسى دۇنيەلەر دە اسەر ەتكەن بولار. اتا- انام – دارىگەرلەر. اكەم جۋرناليست بولعىسى كەلگەن ەكەن. الايدا اتامىز ءبىر اۋلەتكە ءبىر دارىگەر كەرەك دەپ، مەديتسينا سالاسىنا وقۋعا تۇسىرگەن. انام مەن اكەم كۋرستاس، الماتىدا مەديتسينا ۋنيۆەرسيتەتىندە وقىپ جۇرگەندە تانىسىپتى. ەكەۋى دە كىتاپتان باس المايدى، جان- جاقتى، ونەردى جاقسى كورەدى. ەگەر دارىگەر بولماعاندا ءتاپ- ءتاۋىر اكتەر مەن اكتريسا شىعار ەدى. اكەم اكتەرلەردىڭ ءومىربايانىن، تەاتر مەن كينو ونەرىندەگى ۇلى تۇلعالاردىڭ شىعارماشىلىعى مەن ءومىر جولى تۋرالى شەشىلە اڭگىمەلەسەدى. ءتىپتى ساحنالىق عىلىمنىڭ نەگىزىن سالعان ستانيسلاۆسكيدەن باستاپ ءازىربايجان مامبەتوۆكە دەيىن ايتىپ وتىرادى.

– بەلگىلى تەاتر سىنشىسى اشىربەك سىعايدىڭ «ءانشى- اكتەردىڭ دەنى تويدا ءجۇر. ماساڭ ورتادا جىلتىڭداپ جۇرگەن ءارتىس ساحنادا دا سۇرىنەدى. بىزدە توي جاعالاماي، ءوزىن- ءوزى ساقتايتىن جىگىتتەر از… ءادىل احمەتوۆ – سول ازدىڭ وكىلى» دەگەنى بار. ءوزىڭىزدى تويدان قالاي ساقتاپ قالدىڭىز؟

– كەي ونەر ادامدارى توي باسقارعىسى كەلگەننەن جۇرگەن جوق. كوبىنە الەۋمەتتىك جاعدايىن تۇزەپ العىسى كەلەدى. كەيبىرى ءبىرجولا بەرىلىپ تە كەتىپ جاتادى. سولاي بولا تۇرسا دا، ەكىنىڭ ءبىرىنىڭ قولىنان توي باسقارۋ كەلە بەرمەيدى. تارازى باسىن تەڭ ۇستاۋ كەرەك دەپ ويلايمىن. ءار نارسەنىڭ شەگى بولعانى دۇرىس. استاناعا العاش كەلگەن جىلدارى تويعا مۋزىكانت بولىپ شىعىپ ءجۇردىم.

– شىعارماشىلىق ءومىربايانىڭىزدا ورنى بار تۇلعانىڭ ءبىرى – نۇرقانات جاقىپباي. شاكىرتىنىڭ بويىنا ساحناعا دەگەن ادالدىقتان بولەك، ادام بولۋدى ۇيرەتكەن ۇستاز ۇلاعاتى تۋرالى نە ايتاسىز؟

– ول ءومىرىمىزدىڭ باعىتىن تۇبەگەيلى وزگەرتتى. ستۋدەنت كەزىمىزدە قاتال ۇستاز بولدى. ۇيلەنەمىز دەۋدىڭ ءوزى اعايعا قارالى حابار جەتكىزگەندەي ەدى. سابىر، ەڭبەكقورلىق، تەرەڭدىك قاسيەتتەرى ءار ءىس- قيمىلىنان بايقالىپ تۇراتىن. تانىم تارازىسى مەن بايىپتى كوزقاراسىمەن- اق بىزگە ۇلگى بولدى. داندايسىماۋدى، قاراپايىمدىلىق پەن كىشىپەيىلدىلىكتى كورىپ وستىك. قانداي بيىكتەردەن كورىنىپ جاتساق تا تالاپشىل ۇستاز ءتالىمىنىڭ ارقاسى. «ءبىز نۇرقانات اعايدىڭ 15- كۋرسىندا وقيمىز» دەپ ازىلدەيمىز كەيدە. ويتكەنى ءومىرىمىزدىڭ جارتىسى نۇرقانات اعايمەن ءوتىپ جاتىر.

– بىردە نۇرقانات اعايمەن اڭگىمەلەسكەنىمدە، «ءبىر- بىرىنەن الشاق ءىرىلى- ۇساقتى ساحنالىق رولدەردى الەۋمەتكە ۇعىنىقتى جەتكىزۋ، ءار كەيىپكەردىڭ قىر- سىرىنا ءۇڭىلۋ ءادىلدىڭ باستى قاسيەتى. قاھارماننىڭ ىشكى پسيحولوگياسىن بەرۋ جولىندا ۇنەمى ىزدەنىستە جۇرەدى» دەگەن ەدى. اكتەرلىك ىزدەنىستەرىڭىز تۋرالى ايتىپ بەرىڭىزشى.

– تالانت – تابيعات پەرزەنتى. اۋەلى اتا- انانىڭ سۇتىمەن داريدى. ۇستاز ەڭبەگىنەن كەيىنگى تاربيەلەيتىن دۇنيە – قورشاعان ورتا. ءبىرىڭعاي ەڭبەكقور قىز- جىگىتتەر شۇرقىراعان ءۇيىرلى جىلقى سياقتى قاتار شاۋىپ كەلەمىز. ءبىر- بىرىمىزدەن ورتا جولدا سۇرىنبەۋدى ۇيرەندىك. ىزدەنىس دەپ نەنى ايتامىز؟ ماسەلەن، اكتەردىڭ مۇراتى وبرازدى ەستە قالارلىقتاي نانىمدى ويناۋ، كەيىپكەر تابيعاتىن كورسەتۋ. وسى مىندەتتى ورىنداۋ ءۇشىن جان- جاقتى زەرتتەيسىز. زەرتتەۋگە تاريح تا، فيلوسوفيا دا، پسيحولوگيا دا كىرەدى. ءبىر شىڭعىس حان بەينەسىن (ساحنالاۋ اۆتورى جانىش قۇلمامبەتوۆ، قويۋشى رەجيسسەرى قازاقستاننىڭ ەڭبەك سىڭىرگەن قايراتكەرى نۇرقانات جاقىپباي) سومداۋعا وراي ۇلى ءامىرشى تۋرالى ىرگەلى ەڭبەكتەردى وقىدىم. قاعاننىڭ فيلوسوفيالىق پايىمدارىنان وي قورىتتىم، بايلام جاسادىم. سالاۋاتتى ءدراماتيزمدى كەيىپتەۋ ءۇشىن اتا- باباسىن، ءجۇرىپ وتكەن ءىزىن زەرتتەۋ ازدىق ەتەدى، تولايىم تاريحتى تۇگەل قوپاراسىز.

– ياعني، ءسىز ىزدەنىس دەپ وسىنى ايتاسىز. دەمەك ءار رولگە وسىلاي دايىندالاسىز عوي.

– قولدان كەلگەنشە. كەيدە ماحاببات درامالارىندا، الەۋمەتتىك- پسيحولوگيالىق، كومەديا جانرلارىندا ىشكى سەزىنۋ مەن ىشكى باعالاۋ الدىڭعى ورىنعا شىعادى. مىسالى، سماعۇل («ديليافرۋزدىڭ ءتورت كۇيەۋى» ، كومەديا) نەمەسە ايبول («العاشقى ماحاببات» ، كومەديا) دەگەن جىگىتتى الايىق. ولاردىڭ بولمىسىمەن الدىڭىزدا جاتقان پەسسانى وقي وتىرىپ تانىساسىز. ادام مىنەز- قۇلقىنىڭ تۇتاستىعى مەن سان قىرلىلىعىن اشا ءتۇسۋ ءۇشىن ول ادامدى ومىردەن ىزدەۋگە كوشەسىز. سول ادامدى شايعا، فۋتبول ويناۋعا شاقىراسىز. قالاي كۇلەدى؟ قالاي رەنجيدى؟ ءبارىن باقىلاي وتىرىپ، ەموتسياسىنا قانا تۇسەسىز. كەيدە جان تۇكپىرىڭە سارى مايداي ساقتاپ جۇرەتىن ەرەكشە تيپاجدار بولادى. بۇل دا ىزدەنىستىڭ ءبىر ءتۇرى.

– كەيدە تانىمال اكتەرلەردىڭ ءوزى قايتالاۋدان اسا الماي جاتادى. ءسىز سومداعان ساحنالىق كەيىپكەرلەر قايتالانباۋىمەن، ومىرگە، قوعامعا دەگەن سالماقتى كوزقاراس پەن جاساندىلىقتان ادا مىنەز- قۇلىقپەن دارالانادى. جانر تابيعاتىن بولە- جارماي، كەز كەلگەن ساحنالىق وبراز ەرەكشەلىكتەرىن تاپ باسۋعا نە قاجەت؟

– تۇپكىلىكتى جاقسى، ءيا جامان ادام بولمايدى. ءبىرىنىڭ جاقسىلىعى باسىم، ەندى بىرىندە كەمشىن. ۇستازدارىمىز «ادام ءوزىن سىرتتاي كورەتىن جاعدايعا جەتۋ كەرەك» دەيدى. مىسالى، موناحتار وزدەرىن ابدەن زەرتتەگەنى سول، سوققى ءتيدى دەپ ويشا سەزىنگەن كەزدە دەنەسىنىڭ ويعا العان تۇسى لەزدە كوگەرىپ شىعا كەلەدى. بۇل – شەبەرلىك شىڭى. شىن كىرىسسە، كەز كەلگەن ادام ەڭ زۇلىم ادامعا اينالادى، ەڭ مەيىرىمدى دە بولا الادى. ەڭ كۇلدىرگى دە، ەڭ ءبىر تراگيك تە بولا دا الادى. سويلەپ تۇرعانىڭدى، داۋىسىڭدى، قيمىلىڭدى سىرتتاي باعالاي الۋ كەرەك.

– ءوزىڭىز سىرتتاي قاراعاندا قانداي ءادىلدى كورەسىز؟

– مەنىڭ ايتىپ وتىرعانىم – ساحناداعى ءادىل. ساحناداعى اكتەر ءوزىن كورۋى كەرەك، ەستي ءبىلۋى كەرەك. ومىردە قانداي ەكەنىمدى سىرت كوز بىلەدى. اشىربەك سىعايدىڭ «ارتيست ەڭبەگى – ۇدايى جوق ىزدەگەن كىسى ءتارىزدى» دەگەن ءسوزى بار. ءبىز وسى تاراپتا تىرمىسامىز.

– قاتارلاستارىڭىزدان كىمنىڭ ونەرىن جوعارى باعالار ەدىڭىز؟

– ءقازىر ەلىمىزدە مىقتى اكتەرلار وتە كوپ. داۋرەن سەرعازين، جانداۋلەت باتايەۆ، باقىت حاجىبايەۆ، اينۇر راحيپوۆالاردىڭ ونەرىن مويىندايمىن. ازامات ساتىبالدى – وتە ەڭبەكقور اكتەر. بەرىك ايتجانوۆ، ەرجان جارىلقاسىنوۆتىڭ ونەرىنە ەرەكشە ءتانتىمىن. «كەك» فيلمىنە تۇسكەندە ەرىك جولجاقسىنوۆتىڭ ونەرىنە قاتتى قىزىققانمىن.

– جالپى اكتەرلىق سەحتىڭ جۇرت كورە بەرمەيتىن بۇرالاڭ تۇسى كوپ. سونداي ساتتە كاسىپتى تاستاۋ تۋرالى وي كەلمەي مە؟

– 2006 -جىلى وقۋ بىتىرگەن سوڭ، الماتىدا تازابەكوۆ تەاترىندا جۇمىس ىستەي باستادىق. ودان كەيىن داۋرەن سەرعازين ەكەۋىمىز «قىمىزحانا» باعدارلاماسىنا تۇستىك. تەلەارنالاردا باعدارلامالاردىڭ از كەزى. كەشكە مەيرامحانادا جۇرگىزۋشىمىز. ءسويتىپ جۇرگەندە جاستار تەاترى قۇرىلىپ، استاناعا كەتەتىن بولدىق. جاتاقحانادا ءبىر بولمەدە 6-7 ادام تۇرامىز، جالاقىمىز – 19 مىڭ تەڭگە. ءبىر اي، ەكى اي، جارتى جىل ءوتتى. جاعداي تۇزەلەر ەمەس. جالاقى ايلىق تاماققا دا جەتپەيدى. كەشكە تەلەديدار كورەمىز. الماتىداعى قاتارلاستارىمىز باعدارلامالار مەن كونسەرتتەردەن كورىنىپ جاتتى. ءبىر- بىرىمىزگە ۇندەمەي قاراپ قويامىز. ءبىر كۇنى استاناعا «سەزام» تەاترى كەلدى. ەكى ساعات قۋىرشاقتىڭ كوستيۋمىن كيسەڭىز 10 مىڭ تەڭگە بەرەدى ەكەن. «مەن بارامىن» دەپ تالاسىپ، سپەكتاكل قوياتىن ساحناعا كەلدىك. «كۋكلى نا ستسەنۋ» دەيدى، ساحناعا تۇرا جۇگىرەمىز. الىپ قۋىرشاقتىڭ ورتان بەلىنەن سىعالاپ، اينالاعا قارايمىز. سىرتتاي قۋىرشاقپىز، ىشتەي ءتۇرلى وي مازالايدى. «ونەر اكادەمياسىن ءبىتىرىپ، استاناعا كەلگەندە جەتكەن جەرىمىز وسى ما» دەپ وكىندىك. سول كەزدە بىرەۋلەر تاستا دەسە كەتىپ تە قالار ما ەدىم. نۇرقانات اعاي الماتىعا ءجيى قاتىنايتىن. اعاي كەلگەندە «الماتىعا كەتەمىز» دەپ ايتۋعا دايىندالىپ وتىرامىز. سونى سەزە مە، كەلەدى دە بىردەن اڭگىمەگە كوشەدى. «ەندى مىناداي سپەكتاكل قويامىز» دەپ بىزگە سويلەۋگە مۇرشا بەرمەي، باستىرمالاتا جونەلەدى. بىرتىندەپ قويىلىمدارىمىز جۇلدەلى ورىندار الدى، پاتەر بەرىلە باستادى.

– 2017 -جىلى ەلىمىزدە 36 كوركەم فيلم ءتۇسىرىلدى. كينوسىنشىلار ونىڭ سوڭعى شيرەك عاسىرداعى كينو تاريحىندا بولماعان كورسەتكىش ەكەنىن ايتتى. الايدا كوپ فيلمدە توبە كورسەتپەي ءجۇرسىز. فيلمگە تالعاپ تۇسەسىز بە؟

– ارينە، قارايمىن. اقان ساتايەۆتىڭ، جاسۇلان پوشايەۆتىڭ  فيلمدەرىنە ويلانباي تۇسەسىز. بۇرىن كينوعا تۇسسەك بولدى دەپ تۇسە بەرەتىن ەدىك. ءتۇر بىرەۋ- اق، ءار جەردەن جىلتىڭداي بەرسەڭىز حالىقتى مەزى ەتەسىز. مەنىڭ ۇستانىمىم – وسى. «اناعا اپارار جول» كارتيناسىنان سوڭ ءبىراز ۇسىنىستاردان باس تارتۋعا تۋرا كەلدى. حالىقتى جالىقتىرىپ العىم كەلمەدى. جالپى، كينو تۇسىرۋشىلەرگە تاقىرىپ كوپ. مىسالى، التىن وردانىڭ كەزىندە شىڭعىس اۋلەتىنەن تاراعان قانشاما حان- سۇلتاندار ءوتتى. ەڭ قۋاتتى بيلەۋشى جوشى قانداي؟ التىن وردانى قۇرعان باتۋدىڭ اڭىزعا اينالعان جورىقتارى شە؟ بەرتىندەگى كەنەسارى مەن تەزەك تورەلەردىڭ ءارقايسىسى ءبىر- ءبىر كينو. ءالى ەكراندالماعان تاريحي، ومىرشەڭ رول سومداعىم كەلەدى.

– تاريحي رولدەردى سومداۋ ارمانىم دەيسىز، ەندەشە «قازاق حاندىعى. الماس قىلىش» (رەج. ر. ءابدىراش) فيلمىنەن نەگە شەت قالدىڭىز؟ ناعىز ارمانىڭىز ورىندالاتىن جوبانىڭ بىرەۋى وسى ەمەس پە ەدى؟

– «قازاق حاندىعى. الماس قىلىش» جوباسى باستالىپ جاتقان ۋاقىتتا «اناعا اپارار» جول ءفيلمىنىڭ ءتۇسىرىلىم جۇمىستارى قىزىپ جاتقان ءسات ەدى. ء بىزدى دە شاقىردى، كاستينگكە باردىق. جاستار مەن ۇلكەندەر قۇرامى جەكە تاڭدالدى. ءبىزدىڭ توپتاعى بەرىك ايتجانوۆ جانىبەك حاننىڭ، ەرىك جولجاقسىنوۆ كەرەي حاننىڭ، مەن بۇرىندىق حاننىڭ رولىنە بەكىتىلدىم. جاس ەرەكشەلىگىمىز سايكەس كەلمەگەن بولۋى كەرەك، كاستينگتەن وتپەدىك. اراسىندا ەپيزودتىق رولدەرگە شاقىردى، وعان بارمادىم. ءار نارسە ءوز رەتىمەن عوي، بۇيىرعانى بولا جاتار.

– اكتەرلەرگە، تەاترعا قاتىستى قانداي قاساڭ تۇسىنىكتەردى جوققا شىعارار ەدىڭىز؟

– جاسىراتىنى جوق، ەل اراسىندا اكتەرلار جەڭىل ءجۇرىستى، ىشىمدىككە ءبىر تابان جاقىن دەلىنەدى. ونى جوققا شىعارا الامىن. ماسكۇنەم اكتەر كورگەن ەمەسپىن. تەاتر ساحناسىنا قانشاما كۇش- جىگەر كەتەدى. شىنىن ايتقاندا، ومىردە باسقا وبرازدىڭ جەتەگىندە جۇرۋگە كۇش تە، ۋاقىت تا جوق ەكەن. ونەر وردالارىنىڭ ىشىندەگى ەڭ تازاسى – تەاتر.

– جەتىستىككە جەتۋ جولىندا كەلبەت پەن تالانتتىڭ ارا قاتىناسى تۋرالى نە ايتار ەدىڭىز؟

– اكتەر نەمەسە اكتريسا تالانتتى ءارى كەلبەتتى كەلسە، نۇر ۇستىنە نۇر. ال تابيعات كەلبەت بەرمەسە، تالانت ەكى ەسە مىقتى بولۋى ءتيىس. بەتى جىلتىراپ، تالانتى اقساپ تۇرسا الىسقا بارا قويۋى نەعايبىل.

– سىزدە قايسىسى باسىم دەپ ويلايسىز؟

– ستۋدەنت كەزىمدە قودار، ءامىرشى سياقتى قاتىگەز، جاعىمسىز رولدەردى سومدايتىنمىن. «ءادىل فاكتۋراسىنا قاراي حانداردىڭ، گەرويلاردىڭ ءرولىن سومدايدى» دەگەن اڭگىمەنىڭ شەتى شىعا باستاعاننان كەيىن، ليريكالىق، كومەديالىق وبرازدارعا كوشە باستادىم. كومەديانى دا جاتىرقامايمىن، وزىمە ۇنايدى.

– الداعى جوسپارىڭىز قانداي؟

– تىنىمسىز ەڭبەكتەنە بەرەمىز. الەم چەمپيونى اتانعان بوكسشىنىڭ  سپورتقا كەلۋ تاريحىن مىسال ەتەيىكشى. سىنىپتاسىنا ءالى جەتپەي جۇرگەن بالا بوكس كۋرسىنا جازىلادى. ودان ارى جارىسقا ىلىگىپ كەتەدى. جارىستان جۇلدەلى ورالىپ، اۋدانعا، ودان ءارى وبلىسقا، وبلىستان رەسپۋبليكالىق دەڭگەيگە وتەدى. ءبىر قاراسا، الەم چەمپيونى اتانعان. سونىڭ بارىنە تۇرتكى بولعان دۇنيە – سىنىپتاسىنان جەڭىلىپ قالۋى. ول الەم چەمپيونى بولسام دەپ ويلاعان جوق. مەنىڭ دە ونەرگە قادام باسۋ تاريحىم وسىعان ۇقساستاۋ. مەكتەپ بىتىرگەن سوڭ اعام ونەر اكادەمياسىنا ەرتىپ باردى. ارالاتىپ ءجۇر. «تەاترالنىيدىڭ قىزدارى ادەمى بولادى. ەگەر وسى جاققا ءتۇسىپ كەتسەڭ تەاترالنىيدىڭ قىزدارىمەن ءبىر ۆەچەرينكادا وتىرامىز» دەپ قويادى. اعام ايتقانداي، «شىركىن، وسىدان وقۋعا ءتۇسىپ كەتىپ، ادەمى قىزداردى وتىرىستارعا الىپ بارسام. ءسويتىپ اعالارىم تاڭ قالسا ارمانىم جوق» دەپ ويلادىم. سولاي مەن دە وقۋعا ءتۇستىم، اعالارىما دا ءبىر- ءبىر تەاترالنىيدىڭ قىزدارى بۇيىردى عوي. وقۋعا تۇسەتىن كەزدە اتاقتى بولسام دەگەن وي ون ۇيىقتاسام تۇسىمە كىرمەگەن. ءقازىر ۇلكەن جوباعا قاتىسىپ جاتىرمىن. ساقال مەن مۇرتتى سول ءۇشىن ەركىنە جىبەردىم (كۇلىپ) . «ويباي، ءتۇرى نە بولىپ كەتكەن» دەپ كەيدە ادامدار تۇسىنبەي جاتادى. ونەر ادامدارىنىڭ شاشى ءوسىپ كەتسە، تاقىرلاپ تاستاپ جاتسا تاڭ قالماڭىزدار. جوبا ىڭعايىنا قاراي جۇرەمىز، ءوزىمىز قالاعان وبرازبەن جۇرۋگە ۋاقىت بولا بەرمەيدى.

– اڭگىمەڭىزگە راحمەت!

اڭگىمەلەسكەن ايا ءومىرتاي،

«ەگەمەن قازاقستان»