پرەزيدەنت قاراوزەك ماگيسترالدى گاز قۇبىرىن سالۋدى تاپسىردى


استانادا وتكەن پارلامەنت پالاتالارىنىڭ بىرلەسكەن وتىرىسىندا ەلباسى نۇرسۇلتان نازاربايەۆ قازاقستانداعى گازداندىرۋ ماسەلەسىنە توقتالىپ، 2 ملن 700 مىڭ ادامدى گازبەن قامتۋعا مۇمكىندىك بەرەتىن قاراوزەك ماگيسترالدى گاز قۇبىرىن سالۋدى تاپسىردى.
«قازاقستاندا جىلىنا  2 ملرد كۋب مەتر گاز وندىرىلەدى.  بۇل كورسەتكىش جىلدان جىلعا ارتىپ وتىراتىنىن بىلەمىن.  بۇگىنگى تاڭدا قازاقستانداعى گازداندىرۋ دەڭگەيى شامامەن 50 پايىزدى قۇراپ وتىر. سونىمەن قاتار 9 وبلىسقا گاز جەتكىزىلگەن. ءبىراق، سوعان قاراماستان،  ەلىمىزدىڭ ورتالىق، سولتۇستىك وبلىستارى ءالى دە گازسىز وتىر. وسى ماسەلەنى شەشۋ ءۇشىن مەن  قىزىلوردا وبلىسىنداعى قاراوزەك دەگەن جەردەن جەزقازعان، قاراعاندى، تەمىرتاۋ، استانا ارقىلى ماگيسترالدى گاز قۇبىرىن سالۋدى تاپسىرامىن.  بۇل 2 ملن 700 مىڭ ادامدى گازبەن قامتۋعا مۇمكىندىك بەرۋمەن قاتار، ارقانىڭ ەكولوگيالىق جاعدايىن جاقسارتۋعا ىقپال ەتەتىن بولادى» ، دەدى پرەزيدەنت.

ءوز سوزىندە ەلباسى باتىستاعى گاز تۇڭعىش رەت الماتىعا دەيىن جەتكىزىلگەنىن اتاپ ءوتتى. سونىمەن قاتار بۇل جوبا ارقىلى كۇزدە استانانىڭ تۇماندانىپ كەتۋ ماسەلەسىن دە شەشۋگە بولاتىنىن ايتتى.

«ەكولوگيالىق ماسەلەنى شەشۋگە مۇمكىندىك بار. ءتىپتى، استانانىڭ وزىندە زياندى قالدىقتاردىڭ اۋاعا تارالۋىن 35 مىڭ تونناعا ازايتۋعا بولادى.  ارقانىڭ سارى جەلى بارلىعىن الىپ كەتەدى دەپ ويلاعانىمىزبەن، كەيىنگى كەزدە حالىقتىڭ كوبەيۋىنە بايلانىستى قالانىڭ ۇستىندە ۇنەمى تۇمان تۇراتىن بولدى. قالا اكىمشىلىگى بۇل پروبلەمانى شەشۋ ءۇشىن جۇمىس ىستەپ جاتىر. گاز قۇبىرىنا بايلانىستى جۇمىستى 1-1,5 -جىلدىڭ ىشىندە شەشۋ كەرەك» ، دەدى ەلباسى.

ەستەرىڭىزگە سالا كەتسەك،  استانادا پارلامەنت پالاتالارىنىڭ بىرلەسكەن وتىرىسى ءوتىپ جاتىر. وندا پرەزيدەنت تومەن جالاقى الاتىندار ءۇشىن سالىقتى 10 ەسەگە ازايتۋدى تاپسىردى. سونىمەن قاتار 2019 -جىلى قوسىمشا 20 مىڭ مەملەكەتتىك ءبىلىم گرانتى بولىنەتىنىن ايتىپ، «7-20-25» يپوتەكالىق باعدارلاماسىن ۇسىندى. سونداي- اق پرەزيدەنت  شاعىن نەسيەنى 20 ملرد تەڭگەگە كوبەيتۋدى تاپسىردى.

ايتا كەتۋ كەرەك، 2 -ناۋرىزدا پارلامەنت ءماجىلىسىنىڭ ءتوراعاسى نۇرلان نىعماتۋلين پارلامەنت پالاتالارىنىڭ بىرلەسكەن وتىرىسىن شاقىرۋ تۋرالى وكىمگە قول قويعان بولاتىن. بىرلەسكەن وتىرىسقا جوعارعى سوت، ۇكىمەت مۇشەلەرى تولىق قۇرامدا، پرەزيدەنتكە تىكەلەي ەسەپ بەرەتىن جانە باعىناتىن ورگان باسشىلارى، ۇلتتىق كومپانيالار مەن مەملەكەتتىك ۇيىمدار باسشىلارى قاتىسىپ وتىر.

گۇلنۇر قۋانىشبەك قىزى،

«ەگەمەن قازاقستان»