ەلباسى ستۋدەنتتەرگە ارناپ 25 مىڭ ورىندىق جاتاقحانا سالۋدى تاپسىردى


استانادا پارلامەنت پالاتالارىنىڭ بىرلەسكەن وتىرىسىنا قاتىسقان ەلباسى نۇرسۇلتان نازاربايەۆ جوعارى ءبىلىم بەرۋ جۇيەسى ساپاسىنا ەرەكشە نازار اۋداردى. ءبىلىم بەرۋدى ەكونوميكالىق ءوسۋدىڭ جاڭا مودەلىنىڭ ورتالىق بۋىنىنا اينالدىرۋ تۋرالى ءسوز ەتە كەلە، وسى تۇرعىدا جاتاقحانا تاپشىلىعىن ءبىرجولا شەشۋ جايى تۋرالى ايتىپ ءوتتى.
«الەمدىك ءبىلىم بەرۋ ءجۇيسىن قۇرۋدا ستۋدەنتتەردىڭ ءومىر ءسۇرۋ جاعدايى باستى نازاردا. بۇگىندە جوو مەن كوللەدج ستۋدەنتتەرىن جاتاقحانامەن قامتۋ سۇراقتارى كوكەيدە تۇر. اتالعان ماسەلەنى شەشۋ ماقساتىندا جاتاقحانا قۇرىلىسىن ديەۆەلوپەرلىك كومپانيالار ارقىلى مەملەكەتتىك- جەكە مەنشىك سەرىكتەستىك تەتىگى نەگىزىندە ىسكە اسىرۋ كەرەك. 2022 -جىلدىڭ سوڭىنا دەيىن ستۋدەنتتەرگە ارناپ كەمىندە 25 مىڭ ورىندىق جاتاقحانا سالۋدى تاپسىرامىن. ءتيىستى سۇرانىستى ەسكەرگەننىڭ وزىندە جاتاقحانا تاپشىلىعىن ءبىرجولا شەشەتىن بولادى» ، دەدى پرەزيدەنت نۇرسۇلتان نازاربايەۆ.

ايتا كەتۋ كەرەك، بىرلەسكەن وتىرىسقا جوعارعى سوت، ۇكىمەت مۇشەلەرى تولىق قۇرامدا، پرەزيدەنتكە تىكەلەي ەسەپ بەرەتىن جانە باعىناتىن ورگان باسشىلارى، ۇلتتىق كومپانيالار مەن مەملەكەتتىك ۇيىمدار باسشىلارى قاتىسىپ وتىر.   ەسكە سالا كەتەيىك، 2 ناۋرىزدا پارلامەنت ءماجىلىسىنىڭ ءتوراعاسى نۇرلان نىعماتۋلين پارلامەنت پالاتالارىنىڭ بىرلەسكەن وتىرىسىن شاقىرۋ تۋرالى وكىمگە قول قويعان بولاتىن.

ايا ءومىرتاي،

«ەگەمەن قازاقستان»