جامبىل اۋىلىندا جامبىل جابايەۆتىڭ تۋعان كۇنى اتاپ ءوتىلدى


بۇل كۇنى جامبىل اۋىلىنا مەيمانداردىڭ شاقىرۋسىز جينالاتىنى بار. الماتىدان ارنايى كەلگەن اقىندار ساحناعا شىعىپ تا، سىرتتاعى اقىن ەسكەرتكىشىنىڭ الدىندا تۇرىپ تا ولەڭ وقىدى. جىر تۇنعان اۋىلدىڭ جالىندى ۇرپاعى جىر ءمۇشايراسىن ءىلىپ الىپ كەتتى. توي قىزدى.
الاتاۋدا قالىڭ قاردىڭ كوبەسى سوگىلمەگەنمەن، ەتەكتەگى اۋىلدا كۇن كۇلىمدەپ كوكتەم شىقتى. بەلگىلى اقىن- پۋبليتسيست ورىسباي ءابدىلدا ۇلى «جاكەمنىڭ قۇدىرەتى شىعار، مەن ەس بىلگەلى ونىڭ تۋعان كۇنى ءوز اۋىلىندا ءبىر كۇن اتاۋسىز وتكەن ەمەس، – دەيدى. – مەملەكەتەتتىڭ وتكىزەتىن مەرەيتويلارى ءوز الدىنا ءجاي ۋاقىتتا دا، سوناۋ دۇرىلدەگەن كوممۋنيستىك كەڭەس زامانىنىڭ وزىندە دە اقىن اتامىزدىڭ دۇنيەگە كەلگەن كۇنى زيراتىنىڭ باسىندا قۇران وقىپ، ەسكەرتكىشىنىڭ الدىندا جىر وقيتىن ەدىك. سول ءۇشىن بەلگىلى سپورتشى ءىزباسار ورازباقوۆ باستاعان ءبىر توپ ستۋدەنت الاتاۋدى جاعالاپ الماتىدان اۋىلعا شاڭعىمەن جەتەتىنبىز. ول كۇندەر قايدا، شىركىن.. .»

جازۋشى جۇماباي شاشتاي ۇلى جينالعان قاۋىم الدىندا جامبىل فەنومەنىنىڭ مىڭجىلدىقتار تاريحىمەن ولشەنەتىنىن ەكشەپ ايتسا، اكادەميك- جازۋشى ۋاليحان قاليجانوۆ پەن جامبىلتانۋشى عالىم- جازۋشى ناعاشىبەك قاپالبەك ۇلى حح- شى عاسىر گومەرىنىڭ سانالى ءومىرى مەن قوعام الدىنداعى ولشەۋسىز قايراتكەرلىك قىزمەتى تۋرالى تاعىلىمدى بايانداما جاسادى. اقىن ۇلىقبەك ەسداۋلەت تەبىرەنە جىر وقىدى:

شارتاراپقا تانىتقان سۇيىكتى ەلىن،

قايران قىران، جۇلدىزعا جۋىق پا ەدىڭ؟

الاتاۋىم تۇرعاندا جەرىم بيىك،

جامبىل باردا – قازاعىم بيىك مەنىڭ!

ادامزاتتىڭ اسپانىن بيىكتەتكەن ۇلى جامبىلدىڭ ءححى- ءشى عاسىردىڭ تابالدىرىعىنان اتتاعان ولشەۋسىز قازىناسى ەلباسىنىڭ بۇگىنگى «رۋحاني جاڭعىرۋ: بولاشاققا باعدار» باعدارلاماسىنىڭ باستى باعىتىنىڭ ءبىرى ەكەنى، مەملەكەتتىك ۇلت بولمىسىن تۇلەتۋ يدەياسىنا دا تولىق ساي كەلەتىنى حاقىندا تولعامدى وي- پىكىرلەر ايتىلدى.

ال قىزىل بوپ الاۋلاعان مەرەكەلىك ساحناعا گۇل- جايناعان ونەر شەبەرلەرى ءان مەن جىردان شاشۋ شاشتى، كۇمبىرلەتىپ كۇي تارتتى. كورەرمەن ريزا كوڭىلمەن قول سوقتى. ۇلى بابامىزدىڭ ارۋاعانا ارنالىپ قۇران باعىشتالدى، مال سويىلىپ، اس بەرىلدى.

تالعات ءسۇيىنباي،

«ەگەمەن قازاقستان»

الماتى وبلىسى،

جامبىل اۋدانى

سۋرەتتەردى تۇسىرگەن نۇرمانبەت قيزات ۇلى