مادەني مۇرا: سارباس اقىن

Stitched Panorama

حالقىمىزدىڭ اراسىندا ساقتالعان ءىنجۋ- مارجانداردىڭ ءبىرى – اۋىز ادەبيەتى. تاريحىمىزعا ۇڭىلسەك، قازاقتا نەشەبىر ءدۇلدۇل اقىندار بولعانى بەلگىلى. وت اۋىزدى، وراق ءتىلدى اقىندار اراسىنان ەرەكشەلەنىپ، ەسىمى ساقتالىپ قالعان ايتۋلى اقىنداردىڭ ءبىرى – سارباس اقىن.
سارباس مايكوت ۇلى جايلى مالىمەتتەر «قازاقستان» ۇلتتىق ەنتسيكلوپەدياسىنا ەنگەن (2005 -جىل، 7- توم، 555-بەت) . ونىڭ جامبىلمەن ايتىسىن «جامبىل جابايەۆ» (شىعارمالارىنىڭ تولىق جيناعى، الماتى. قازاق ۋنيۆەرسيتەتى. 2010. ءى توم، 79-114-بەتتەر) كىتابىنان جانە باسقا دا باسىلىمداردان كەزدەستىرۋگە بولادى.
سارباس مايكوت ۇلى جامبىل وبلىسىنداعى قورداي اۋدانىنىڭ دولانقارا، ءماتىبۇلاق ەلدى مەكەندەرىنىڭ ماڭايىندا 1849 -جىلى تۋىپ، 1914 -جىلى دۇنيەدەن وزعان. سارباس لاقاپ اتى. ازان شاقىرىپ قويىلعان ەسىمى – تىلەۋلى، سارى ادام بولعان سوڭ ەل ونى سارباس اتاپ كەتكەن. ۇلى ءجۇزدىڭ دۋلات بابادان تاراعان جانىس رۋىنان. جانىستىڭ قاسقاراۋى (جارلىقامىس) ، ودان وراز، ونىڭ بوكەنىنەن ساتي، ءساتيدىڭ مايكوتىنەن ءوسىپ- ونگەن ۇرپاق. شەشەلەرى ءولىپ، جەتىم قالعاننان كەيىن ناعاشىلارى تىلەۋلىنى الىپ كەتەدى. ايتۋشىلارعا سەنسەك، ول ۇلى ءجۇز اقىندارىنىڭ كوبىنىڭ ۇستازى بولعان قابان جىراۋدىڭ جيەنى، جەتىسۋ وڭىرىنە تانىمال اتاقتى كەكەباي شەشەننىڭ مەكتەبىنەن ءوتىپ، ونى وزىنە ۇستاز ساناپ، جىر- تولعاۋلار ايتۋ ءتاسىلىن ۇيرەنگەن. اقىن ءبىر ولەڭىندە ءوزىن مايكوتتىڭ 8 ۇلىنىڭ ءبىرىمىن دەپ تانىستىرادى (ول قوجامبەرلىنىڭ ۇيىندە جيىلعان بي- بولىستاردىڭ، شونجارلار مەن باي- ماناپتاردىڭ الدىندا: «مەن مايكوتتىڭ سەگىز ۇلىنىڭ ءبىرى ەدىم، مەن سەندەيدىڭ ءبəرىن دە جانشىپ تاستاپ جەر ەدىم. شاقىرتقان سوڭ مىنالار، بۇل جيىنعا كەپ ەدىم» ، دەپ جىرلاعان ەكەن) .

كوز كورگەندەردىڭ اڭگىمەسى بويىنشا، اقىننىڭ ولەڭ ايتاردا، ايتىستى باستاردا ءوز قۇلاعىن ءوزى بۇراپ، ايعايلاپ بارىپ باستايتىن ەرەكشە ادەتى بولعان. ول ادەتتى ول قابان اقىننان ۇيرەنەدى. «ناعاشىم قابان ءوز قۇلاعىن بۇراماسا اۋزىنا ولەڭ تۇسپەيدى ەكەن» ، دەيدى ەكەن سارباس. كەيىننەن سارباستىڭ سول ادەتى تۋىسى كەنەنگە كوشكەن. اقىن (ⅩⅨعاسىردىڭ ەكىنشى جارتىسى مەن ⅩⅩعاسىردىڭ باسىندا) ءوزى وسكەن وڭىردەگى اقىن- جىراۋلارمەن (مىسالى، مايلىقوجا سىندى) ىلەسىپ، قازاق اۋىلدارىن، كورشى قىرعىز ەلىن جاستايىنان ارالاپ، ەل- جۇرتپەن جاقىن تانىسىپ، جىر ايتىپ، ابدەن ىسىلىپ، تالاي كورنەكتى اقىندارمەن ايتىسىپ، جىر باسەكەسىنە تۇسكەن. ول بويىنا ۇلتىمىزدىڭ سان ءتۇرلى اسىل قاسيەتتەرىن جيناقتاعان دارىندى ايتىسكەر ءارى جىرشى بولعان.

بىزگە جەتكەن تۋىندىلارىنىڭ باسىم كوپشىلىگى – ايتىستارى. ولەڭدەرى دە از بولماعان. مىسالى ونىڭ ساسىقباي دەگەن ساراڭ بايعا ايتقان مىنا ولەڭى حالىق ەسىندە قالىپتى: «ساسىقبايدا قۇمان جوق، بەتى- قولىن جۋعان جوق. جامىلارعا كورپە جوق، قوي باستاعان سەركە جوق. ادال بالا تۋعان جوق، ساراڭ بايدا يمان جوق» ، دەپ بايدىڭ ءمىنىن كوزىنە باتىل ايتىپ سالادى. جولدىقارا دەگەن قۇرداسى ديحانشىلىقپەن اينالىسادى ەكەن. سارباسقا ءبىر قاپ تارى بەرمەك بولىپ قىرمانعا قاراي كەلە جاتادى. سوندا سارباس: «وۋ، جولدىقارا دەگەندە، جولدىقارا! ماڭدايدان اعىپ تۇرعان سوردى قارا! شىلدەنىڭ مىنا اپتاپ ىستىعىندا، كۇس- كۇس بولىپ جارىلعان قولدى قارا!» ، – دەيدى.

اقىن كوڭىلىنە كەلگەندى جالتارماي، باتىل، تىك ايتاتىن كىسى ەكەن. ءبىر ۇلكەن تويدا سارباس اتاقتى كىسىلەردى ماقتاپ، ولەڭ ايتىپ، جيىلعان جۇرتتى قىزىققا باتىرىپ جاتادى. سول جەردە اقاتاي بولىس: «تۋىسقانىم- اۋ، مەنى دە ءبىر ماقتامايسىڭ با» ، – دەپتى. سوندا دومبىراسىن قاعىپ- قاعىپ جىبەرىپ سارباس: «ماقتا دەيسىڭ اقاتاي نەڭدى ايتايىن، اكەڭ تەنتەك، شەشەڭ پۇشىق كىمدى ايتايىن. قاراباقاي بولىس بوپ شىعا كەلدىڭ، اقاتاي ءوز باسىڭدى ەندى ايتايىن.. . باي بولساڭ اركىم اۋەس توقتىعىڭنان، كەدەي ساۋىن سۇرايدى جوقتىعىنان. جاقىننان الىس ارتىق، ات بەرەدى، تۋىسقان بەرە المايدى، جات كورەدى» ، – دەيدى. جۇرت الدىندا قىسىلعان اقاتاي: «سارباس، مىنا ولەڭىڭدى قوي، سوعىمعا ءبىر بيە ال» ، – دەپتى. مىنە، وسى سارىندى بىرەن- ساران قىسقا جىرلار، ءبىرقاقپايلار ەل اۋزىندا ساقتالعان.

اقىن əر جىلدارى قاڭتارباي، ەركەباي، جامبىل، قۋاندىق، قىرعىز قالمىرزا سىندى بەلگىلى اقىندارمەن جانە ساۋمال، كۇلزيا، تۇرسىناي، ءوزيپا اتتى اقىن قىزدارمەن جولىعىپ، جىر باسەكەسىنە تۇسكەن. ءبىراق بىزگە ونىڭ جامبىلمەن، قۋاندىقپەن، قىرعىز اقىنى قالمىرزامەن ايتىستارى مەن ساۋمال، كۇلزيا، ءوزيپا، تۇرسىناي قىزدارمەن ايتىسىنىڭ جەكە ۇزىندىلەرى عانا جەتكەن. سارباستىڭ ۇستانعان ءداستۇر- ۇلگىسى، وسكەن ورتاسىنىڭ ىقپالى ايتىستارىمەن تانىسقاندا تام- تۇمداپ بايقالىپ وتىرادى. اتاقتارىنان ات ۇركەتىن اقىن- زامانداستارىمەن كەزدەسىپ، ولاردىڭ ونەرىمەن جاقىن تانىسىپ، رەتى كەلىپ جاتسا ءسوز قاعىسىپ، ونەر سايىسىنا ءتۇسۋ، سارالاپ قاراساق، ۇلكەن جەتىستىك. ءتىپتى، ازۋلى اقىنداردى ۇتىپ جاتپاسا دا جەڭىلۋدىڭ ءوزى جاس تالاپكەر ءۇشىن عانيبەت دۇنيە، ۇلكەن ساباق، ەستە قالاتىن اسىل ونەگە بولىپ سانالادى. بۇل جەردە، حالىق اراسىندا ساقتالىپ، بىزگە جەتكەن «سارباس پەن قۋاندىق» ، «سارباس پەن جامبىل» ، «سارباس پەن قالمىرزا» ايتىستارىن كەلتىرسەك تە جەتەرلىك.

سارباس مايكوت ۇلىنىڭ ەسىمىن ەلگە كەڭىرەك تانىتقان قالمىرزامەن جانە جامبىلمەن ايتىستارى. جامبىلمەن ايتىسى (كولەمى 1000 جولدان اساتىن جىر جولدارى ەل اراسىندا ساقتالىپ، 2010 -جىلى جارىق كورگەن «جامبىل جابايەۆ» كىتابىنا ەنگەن) ونىڭ تۆورچەستۆوسىندا ەرەكشە ورىن الادى. وكىنىشكە قاراي، سارباس اقىننىڭ كوپ ايتىستارى مەن ولەڭ، جىرلارى دەر كەزىندە جينالماي، ۇمىت بولعانى جايىندا زەرتتەۋ ەڭبەكتەردە ايتىلىپ ءجۇر. ءبىراق ۇلتتىق عىلىمي كىتاپحانانىڭ سيرەك قورىندا «بايقارا مولداعا» ، «جولدىقاراعا» ، «اقتايعا» ايتقان ارناۋلارى، ء«بىلىندىم تالاي ەلگە تىلىممەنەن (ولەر الدىنداعى دومبىراسىمەن قوشتاسقانى) » ، «اتاندىم ۇلى ءجۇزدىڭ سارباسى (تۋعان- تۋىستارمەن قوشتاسقانى) » ، «بايشورا، قوش- امان بول، əزيز اعام» ، «وق جىلانداي ىسقىرعان» ، «كەگىمبايدا قۇمعان جوق» ، «ەلۋ باسى، ون باسى» سەكىلدى ءبىراز ارناۋ، تولعاۋلارى جيناقتالعان.

الماتىدا 1895 -جىلى ۇلكەن ايتۋلى جيىن بولعان. وعان بارار الدىندا سارباس تا، جامبىل دا جانە دە باسقا شايىرلاردىڭ ۇلكەن ازىرلىك جاساعاندارى انىق. سەبەبى قوجامبەرلىنىڭ بۇكىل جەتىسۋعا يگى جاقسىلاردى، تانىمال ادامداردى شاقىرىپ، باستارىن قوساتىنىن، وندا ءبىراز بەلگىلى اقىندار شاقىرتىلىپ، ولەڭ- جىر ايتىلىپ، ايتىس وتەتىنىن جانە اقىنداردان كىمدەر شاقىرىلعانىن الدىن الا بىلگەندەردىڭ دايىندىقسىز كەلۋى مۇمكىن ەمەس ەدى. وعان جوعارىدا مىسالعا كەلتىرىلگەن جامبىل ايتقان ايتىستىڭ كىرىسپەسىندەگى مىنا جولدار ايقىن دالەل: «الماتى دەگەن شارىدە، جۇرت جينالىپ جاتقاندا، قىرباي، قوجامبەرلى بولىستىڭ، ساسكەدە جەتىپ ۇيىنە» . ءبىر ايتا كەتەتىن نارسە، ءبىر وڭىردە قاتارلاس- جاپسارلاس جاتقان ەلدىڭ وكىلدەرى بولعاندىقتان، سارباس پەن جامبىل بۇرىن كەزدەسپەۋى مۇمكىن ەمەس. كەزدەسكەن بولار، ءبىراق، ايتىسۋدىڭ ءساتى تۇسپەگەن سياقتى. سوندىقتان ەكى اقىننىڭ وسى كەزدەسۋىن كەزدەيسوقتىق دەپ ايتۋعا ءتىپتى بولماس. ايتىس ونەرىنىڭ ءدۇلدۇلى جامبىل سارباس اقىنمەن ايتىسىندا ەركىن كوسىلەدى. وي- قيالعا سۋارىلعان ناعىز تاپقىر سوزدەر، ايشىقتى، ناقىشتى ورالىمدار، گاۋھارداي قۇبىلعان سىرلى، نۇرلى سوزدەر تۇنگى اسپانداعى سانسىز جۇلدىزدارداي توگىلەدى- اي كەلىپ.

ءبىزدىڭ قازاقتىڭ ايتىس ونەرىندە ءبىرىن ءبىرى ىزدەپ ءجۇرىپ ايتىسۋ ءدəستۇرى ەجەلدەن قالىپتاسقان. تىم ارىگە كەتپەي- اق، ⅩⅩعاسىردىڭ العاشقى شيرەگىنە دەيىن ءبىرجاننىڭ سارانى، اجەكتىڭ ءشارىپجامالدى، تاڭجارىقتىڭ قويدىمدى، كەنەننىڭ نۇريلانى ادەيى ىزدەپ بارىپ، ايتىسقانى ءمالىم. تالاپكەر قاي اقىنمەن جىر جارىسىنا تۇسكىسى كەلسە، سول تۋرالى سىرتتاي دەرەك جيناقتاپ، دايارلانىپ جۇرەتىنى بەلگىلى. جامبىل ەستەلىكتەرىندە قۇلمامبەت، مايكوت، سارباس سىندى ارقالى اقىندارمەن كەزدەسۋدىڭ ورايىن ۇزاق كۇتكەنى ايتىلادى. شىندىعىندا، ىلگەرىدەگى اقىندار تابيعي دارىن- قابىلەتى مەن ومىردەن العان تاجىريبەسىن ۇشتاستىرا وتىرىپ، شەبەرلىگى شىڭدالىپ، ونەر شىڭىنا وسى مەن جەتتىم- اۋ دەگەن ۋاقىتتا عانا بەتپە- بەت جۇزدەسكەنىن بىلەمىز. سارباستىڭ ايتىستا ءجيى قولداناتىن ادىستەرىنىڭ ءبىرى – ەلىنىڭ، جەرىنىڭ، يگى جاقسىلارىنىڭ بايلىق، سالتاناتىن دəرىپتەي وتىرىپ، از اتالى، ءالسىز رۋلاردان شىققان اقىندارعا سەس كورسەتىپ، جالىندى، ۇتقىر سوزدەرىمەن قارسىلاسىنىڭ بەتىن قايتارۋ. جامبىلمەن ايتىسقاندا بۇل ءتəسىل ەرەكشە ورىن العان.

سارباس مايكوت ۇلى شىعارمالارى بەينەلەۋ قۇرالدارىنا مەيلىنشە باي، ولاردىڭ تانىمدىق، تاعىلىمدىق، اسەمدىك اسەرى مەن ەستەتيكالىق قىزمەتى ەرەكشە ءماندى. ول – ءداستۇرلى حالىق پوەزياسىنىڭ، حالىق دانالىعىنىڭ ءىنجۋ- مارجاندارىن ايرىقشا سەزىممەن تالعاپ- ەكشەپ ءوز تۋىندىلارىنا شەبەر قولدانا بىلگەن تاپقىر، تالانتتى ءسوز زەرگەرى. ول ونىڭ اقىندىق دارالىعى بەينەلەۋ قۇرالدارىن شاشىراتپاي، تىعىز بىرلىكتە، پوەتيكالىق تۇتاستىق قالپىندا يگەرا الاتىن زور قابىلەتىندە جاتسا كەرەك. رۋ شەجىرەسى، ەل باسىنان وتكەن قيىن- قىستاۋ كەزەڭدەر اقىن پوەزياسىنان ءاردايىم ورىن الىپ وتىرادى. تاريحي شىندىق كوركەمدىك شىندىقپەن استاسىپ، توننىڭ ىشكى باۋىنداي جىمداسىپ جاتادى. سول ارقىلى ايتىسقا تىڭ سيپات بەرىپ، تاقىرىپتى جاڭاشا تۇرلەندىرىپ، جىر مازمۇنىن جاڭعىرتادى. قازاق حالقى مەن ونىڭ ۇلان- عايىر دالاسىنىڭ ىلگەرى- بەرگى تاريحىن، مادەني- رۋحاني، الەۋمەتتىك- قوعامدىق ءومىرى تۋرالى سان- سانالى مالىمەت جيناۋ، ونى ەستە ساقتاۋدىڭ ءوزى مول تاجىريبە مەن اسقان دارىندىلىقتى قاجەت ەتەتىنى ءسوزسىز. بۇل قاسيەتتەر سارباس اقىننىڭ بويىنان تابىلادى. اقىننىڭ ارتىندا قالعان جىرلارىمەن جانە ايتىستارىمەن تانىسا وتىرىپ، ونىڭ بويىندا سول كەزدەگى ءىرى ايتىس اقىندارىنىڭ كوپشىلىگىنە تəن باتىلدىق، جىگەرلىلىك، تاپقىرلىق، توزىمدىلىك سىندى اسىل قاسيەتتەر مول بولعانىن سەزىنۋ قيىن ەمەس.

ايتىس ونەرىندە قاي قارسىلاستان بولسا دا قولما- قول جاۋاپ تالاپ ەتىلەدى، كوپ ويلاۋعا ۋاقىت تاپشى. ارينە كەيدە قىزا- قىزا كەلە وقىستان انايى، تۇرپايىلاۋ سوزدەر شىعىپ كەتۋى قالىپتى جاعداي رەتىندە قابىلدانعان. مۇنداي ساتتەر تالاي قايىم- ايتىستاردا ورىن العان. سارباستىڭ قۋاندىقپەن، جامبىلمەن، ءوزيپا، تۇرسىناي قىزدارمەن ايتىستارىندا وسىنداي ءسوز تىركەستەرى اراگىدىك كەزدەسەدى. بۇل ارەكەت تىڭداۋشىلاردىڭ كوڭىل- ويىن كوتەرىپ، وزدەرىنىڭ قاساڭ ايتىسىمەن ولاردى جالىقتىرىپ الماۋ ءۇشىن دە قولدانىلاتىن ءتاسىلدىڭ ءبىرى بولعانىن ايتا كەتكەن ءجون. ونىڭ «سارباس اقىننىڭ بايلاردى مازاقتاۋى» ، «سارباستىڭ سايلاۋ تۋرالى ايتقانى» ، «سارباستىڭ ولەڭدەگى قوشتاسۋى» جىرلارى وتكىرلىگىمەن، ورنەك ايشىقتىعىمەن ەرەكشەلەنەدى.

توسكەيدە مالى، توسەكتە باسى تۇيىسكەن، ەنشىسى بولىنبەگەن قازاق جانە قىرعىز حالىقتارى ەجەلدەن- اق ارالاس- قورالاس ءومىر سۇرگەن. ەكى ەلدىڭ كوپتەگەن اقىندارى توي- جيىندا ءوزارا ايتىسقا تۇسكەنى تاريحتان بەلگىلى. قازاق پەن قىرعىز اقىندارىنىڭ ايتىستارىنا ءتان ءبىر ەرەكشەلىك: قىسقا دا نۇسقا ءسوز جارىستىرۋ سالتى بولعان. وسىنداي قىسقا ايتىستاردىڭ ءبىرى – قازاق سارباس پەن قىرعىز قالمىرزانىڭ ايتىسى:

الماتىنىن بوورۋندا

سارى نار چوكتۇ بيلديڭ بي؟

ۋزۋن اگاچ باشىنا

اك قۋس قوندۋ بيلديڭ بي؟

جەر ورتاسىن مولشەر قىپ،

تۋزاك كۋردۋ بيلديڭ بي؟

ەەسيز جاتكان كوپ جىلكى

بيرين كارماپ مينديڭ بي؟

– دەپ كوپتى كورگەن قالمىرزا ەل باسىنداعى احۋالدى سارباسقا ۇقتىرادى. سارباس دومبىراسىن قاعىپ- قاعىپ جىبەرىپ، ارىپتەسىنە جاۋاپ بەرۋدى بىلاي باستايدى:

«الماتىنىڭ باۋىرىنا

سارى نار شوكتى دەگەنىڭ –

بالدىر- بۇلدىر سويلەگەن،

ادام ءتىلىن بىلمەگەن،

شاپانىندا جاعا جوق،

ەتىگىندە تاعا جوق،

ءوڭى سارى، كوزى كوك،

ادام بىلەر ءسوزى جوق،

قالا سالىپ كوشپەگەن،

مىنا ءبىر ورىس بولماسىن.. .

ۇزىن اعاش باسىنا

اق سۇڭقار قوندى دەگەنىڭ –

قاراعايدىڭ باسىندا

اق شىنىسى بولماسىن.

جەر ورتاسىن مولشەرلەپ،

تۇزاق قۇردى دەگەنىڭ –

دۇربىمەنەن قاراعان،

شاشىلا ايتىپ ساناعان،

ءبىر قيسىعى بولماعان،

تەلەگراف سىمدار بولماسىن» .

سارباس پەن قالمىرزانىڭ وسى ءسوز قاعىسۋىنان ايتىستىڭ مادەنيەتىن سەزىنۋ قيىن ەمەس. بۇل ءسوز سايىسىندا وتارشىلدىق ءداۋىر ومىرگە اكەلگەن جاڭالىق- وزگەرىستەر ايتىلادى.

«وك جىلانداي ىشكىرگان،

بەلينە كىلىچ كىستىرگان،

ءتورونۇن ۋلىن جانگا الىپ،

ءتوبونۇ چاپكان بيلديڭ بي؟ –

كاندىڭ ۋلىن كوشو الىپ،

كاباكتى چاپكان بيلديڭ بي؟ » ،

– دەپ جۇمباقتايدى قىرعىز اقىنى قالمىرزا.

«وق جىلانداي ىسقىرعان،

بەلىنە قىلىش قىستىرعان،

تورەنىڭ ۇلىن قوسا ەرتىپ،

توبەنى شاپقان دەگەنىڭ –

قازاقتان شىققان ناۋرىزباي،

كەنەسارى بولماسىن.

حاننىڭ ۇلىن جانعا الىپ،

قاباقتى شاپقان دەگەنىڭ –

قىرعىزدان شىققان ورمان حان،

قارابەك، جانتاي بولماسىن» ،

– دەپ ءىلىپ الىپ كەتەدى ونى سارباس. قىرعىز اقىنى كەنەسارى مەن ناۋرىزبايدى بۇلىكشىل ەتىپ كورسەتسە، سارباس وعان مۇدىرمەي بىلاي دەپ جاۋاپ قايتارادى:

«ەكى اجداھا ءبىر كەلىپ،

ىنگە كىردى دەگەنىڭ –

داستارقاننان ءدام تاتىپ،

ءبىر توسەكتە ءبىر جاتىپ،

ءبىر يىققا باس قويىپ،

ىنگە كىرگەن جىلانداي

تاتۋ بولعان بۇل كۇندە

قازاق، قىرعىز بولماسىن.. .» .

ايتىس وسىلاي سۇراق- جاۋاپ رەتىندە رەت- رەتىمەن جۇمباقتالىپ توگىلە بەرەدى. شابىتقا مىنگەن ەكى اقىن ارعى- بەرگى تاريحتان ءسوز قوزعاپ، ەكەۋىن قاۋمالاپ وتىرعان قازاق پەن قىرعىزدىڭ باتىرلارى مەن باي- ماناپتارىنىڭ ارقالارىن قوزدىرادى. ەكەۋىنىڭ ءسوز قاعىسۋىندا اقىندىق بيىك مادەنيەت ساقتالعان. كولەمى شاعىن بولعانمەن بۇل ايتىستا كوپ قىزىقتى دۇنيە ايتىلعان. سارباس پەن قالمىرزا اراسىنداعى ايتىسقا ءداستۇرلى قازاق پەن قىرعىز اراسىنداعى كوپتەگەن ءسوز سايىستارىنىڭ ءبىرى دەپ قاراۋ كەرەك. تاريحتا قىرعىز اقىندارىمەن ءبىزدىڭ ءسۇيىنباي، جامبىل، مايكوت، كەنەن جانە دە باسقا اقىندار اراسىندا جۇرەكتەرگە جول تاپقان قىزىقتى ايتىستار بولعانى بەلگىلى. سارباستى وزىنە ۇستاز ساناعان كەنەن ءبىر تويدا بىلاي دەپ ءوزىن تانىستىرادى: «تۋعالى مۇنداي جيىن كورمەپ ەدىم، مەن ءوزىم ءىنىسى ەدىم سارباستىڭ. ون ۇشتە ەل تويىنا ارالاستىم، ولەردە سارباس اقىن شاقىرىپ اپ، تاپسىردى ءوز قولىمەن دومبىراسىن.. .» .

سارباس اقىننىڭ تۆورچەستۆوسى جايلى مالىمەتتەر ماردىمسىز ەكەنىن ءبىز جوعارىدا اتاپ وتتىك. ونىڭ اقىندىق ونەرى زەرتتەۋشىسىن كۇتىپ تۇر. اقىننىڭ كوپ جىرلارى، وكىنىشكە قاراي، ساقتالماي ۇمىت بولعان. قازىرگى زەردەلى ادەبيەتتانۋشىلار مەن عىلىمي قىزمەتكەرلەر الدىندا بۇگىندەرى تالاي- تالاي كۇردەلى مىندەتتەر مەن ماقساتتار بار ەكەنىن بىلەمىز. سولاي بولا تۇرا مۇمكىنشىلىك تاۋىپ اقىندىقتىڭ ايشىقتى قۇدىرەتىن تانىتقان، زامانىنىڭ ءدۇلدۇل اقىنى سارباس مايكوت ۇلىنىڭ ەڭبەكتەرىن بارىنشا تەرەڭىرەك زەرتتەپ، ونىڭ ۇمىت بولعان پوەزياسىن جاڭعىرتىپ، تەلەگەي تەڭىز ۇلتتىق ادەبيەتىمىزگە قوسقاندارى ورىندى بولار ەدى.

ساعىندىق وردابەكوۆ،

قازاقستان جۋرناليستەر وداعىنىڭ مۇشەسى

تاراز