كوركەم سوزگە جۇيرىك از


ۋنيۆەرسيتەت قابىرعاسىندا اۋدارما ءىسى ماماندىعىمەن ءبىلىم الىپ جاتقان ستۋدەنتتەر قالىپتى جۇيە بولماعاننان كەيىن، جالپى پروزا، پوەزيا، دراما جانرلارىن اۋدارۋ ساباقتارى مەن سينحروندى، تەحنيكالىق اۋدارما پاندەرىن دە وقيدى.

كوركەم اۋدارما ساباعىندا نەگىزىنەن دارىستەردەن گورى، ستۋدەنتتىڭ ءوز بەتىمەن جۇمىس ىستەۋىنە كوڭىل بولەمىز. العاشىندا شاعىن ماتىندەرمەن جۇمىس ىستەيدى. كوركەم اۋدارما قيىن. وعان اۋدارما ساتىلارىنا توسەلىپ بارىپ، كەلەدى. كەيدە ءوز قالاۋىمىزبەن، كەيدە وزدەرى شاعىن اڭگىمەلەردىڭ اۋدارماسىن جاساپ اكەلەدى. مارك تۆەننىڭ، گەنريدىڭ شاعىن اڭگىمەلەرى اۋدارماعا العاشقى قادام جاساۋعا وتە ىڭعايلى. ناتيجەسى جامان ەمەس، جالعىز ءتارجىمالاپ قويماي، اۋدارمانى تالداۋمەن اينالىسادى. سوڭعى كەزەڭدە قازاق ەلىندە اۋدىرىلعان شىعارمالاردى سالىستىرىپ، تالقىلاپ ءجۇرمىز. اۋدارما قالاي جاسالدى، ارتىقشىلىعى، كەمشىلىگى نەدە دەگەن سۇراقتارعا ىزدەنۋشىلەر جاۋاپ تابۋعا تىرىسادى. بۇنىڭ ءوزى اۋدارماشىنىڭ كوزقاراسىن، سوزگە قارىم- قاتىناسىن قالىپتاستىراتىن پروتسەسس. ستۋدەنتتەردىڭ اۋدارعان اڭگىمەلەرى «جۇلدىز» جۋرنالىندا، «قازاق ادەبيەتىن» گازەتىندە جارىق كوردى. گۇلشات ءتۇسىپوۆا دەگەن تۇلەگىمىز وسكار ۋايلد پەن ەدگار پونىڭ اڭگىمەلەرىن اۋدارعان، «اۋدارما» باسپاسىنان كىتاپ بولىپ شىقتى. ءوزىمىز «بايشەشەك» دەگەن ستۋدەنتتەردىڭ اۋدارما كىتابىن شىعاردىق. وعان ەڭ جاقسى دەگەن اۋدارمالاردى ەنگىزدىك. بۇل – ستۋدەنتتەردى ىنتالاندىرۋ.

ستۋدەنتتەردىڭ ءبارى بىردەي كوركەم اۋدارماعا بەيىم بولا بەرمەيدى. وزدەرى ىرىكتەلىپ شىعادى. اۋدارما جاساعاندا ءۇش ءتىلدى پايدالانامىز. سالىستىرامىز. ءقازىر شىعارمالاردى اعىلشىن تىلىنە اۋدارۋ كەرەك. ورىسشاعا اۋدارماي، بىردەن اعىلشىن تىلىنە. ويتكەنى ۋاقىت تالابى سولاي.
اۋدارمانى رەداكتسيالاۋ دەگەن ساباق بار. ءقازىر كوپ كىتاپتار كەمشىلىكپەن شىعىپ جاتىر. رەداكتورى جوق. ءبىزدىڭ باسپالاردا قالاي ەكەنىن بىلمەيمىن، ءبىراق شەتەلدەردە اۋدارما رەداكتورى دەگەن قالىپتاسقان ماماندىق بار. الدىمەن كىتاپتى شىعارماي تۇرىپ، اۋدارمانىڭ ساپالى، ساپاسىز ەكەنىن انىقتايدى. ءبىز شەتەلدىڭ ءبىر جازۋشىسىن اۋدارساق، اۋداردىق دەپ ۇلكەن ماقتانىشپەن ايتامىز. ءبىراق تاجىربيەلى ماماندار سىناسا، تالقانى شىعادى. ويتكەنى اۋدارما سىنى، اۋدارما تالقىسى جوق. ءقازىر ستۋدەنتەردى وقىتقاندا وسى تالداۋعا، سىنعا كوڭىل ءبولىپ وتىرمىز.

بۇرىن وقۋ قۇرالى از بولاتىن، ءقازىر كوبەيىپ كەلەدى. العاشىندا بار- جوعى ەكى- ءۇش- اق كىتاپ بار ەدى. ءقازىر اۋدارما تەورياسىنان ون شاقتى وقۋلىق بار. الەم ادەبيەتى جانە كوركەم اۋدارما، اۋدارما پراكتيكاسى، ءارتۇرلى اۋدارمانىڭ تۇرلەرىنە بايلانىستى كىتاپتار جەتكىلىكتى. جاڭعارا دادەبايەۆ، تەمىرعالي ەسەمبەك سياقتى عالىمدارىمىزدىڭ ەڭبەكتەرى بار. ءبىراق ءالى دە كوپ وقۋلىقتار جازىلا بەرۋ كەرەك.

ءانۋار تاراق،  
ءال- فارابي اتىنداعى 
قازۇۋ- دىڭ پروفەسسورى