سارعايماس ساتتەر


بۇل سۋرەتتىڭ دە ساعىم جىلداردىڭ ساندىعىندا جاتقانىنا 40 جىلداي ۋاقىت ءوتىپتى.
اق كۇرىشتىڭ اتاسى اتانعان، ەكى مارتە ەڭبەك ەرى ىبىراي جاقايەۆ پەن مويىنقۇمدىق شوپان اتا جازىلبەك قۋانىشبايەۆ اعالى- ىنىدەي بولىپ ارالاسقان ەدى. ىبەكەڭ مەن جازكەڭدەي زامانىنىڭ زاڭعار- زاڭعار بايتەرەكتەرىنىڭ سونداعى ءوزارا سىيلاستىقتارى ءبىر- ءبىرىن تولىقتىرىپ، ءداۋىردىڭ كەسكىن- كەلبەتىن كەلىستىرىپ تۇراتىن. بەس جاستاي ۇلكەندىگى بار ىبەكەڭدى 90-عا تايانعاندا كارىلىك اينالدىرىپ، سەكسەننىڭ بەسەۋىنە كەلگەن ءىنىسى ۇيدە وتىرا الماي اتقا قونىپ، ومىراۋىنداعى قوس جۇلدىزى جارقىراپ اعاسىنىڭ حال- احۋالىن سۇراپ كەلىپتى. سونداي ءبىر ساتتەردەن قالعان ساۋلەلى كادر بۇگىندە ەرەكشە ەستەلىك بولىپ، بولاشاققا ءوز بيىگىنەن ءتىل قاتىپ تۇرعانداي. سۋرەتتىڭ وڭ جاق شەتىندە تۇرعان ىبەكەڭنىڭ جولىن قۋعان شاكىرتى سوتسياليستىك ەڭبەك ەرى زاھيرا ەرجانوۆا اپاي.

قازاق تەليەۆيزياسى ەڭبەك «مارشالىنىڭ» ونەگەلى ءىسىن ءاردايىم ناسيحاتتاپ وتىردى. ءوز كەزەگىندە اقىن ءابدىلدا تاجىبايەۆتىڭ قاتىسۋىمەن ء«ۇش بايتەرەك» تەلەپوۆەسى جارىققا شىعىپ، كورەرمەندەرگە جول تارتىپ جاتتى. ىبىراي اتانىڭ 90 -جىلدىعىنا ارنالعان سالتاناتتى جيىننان حابار ۇيىمداستىرىلىپ، كۇرىش وسىرۋشىلەر مەكتەبىنەن رەپورتاج جۇرگىزىلىپ جاتقان قىزۋ ەڭبەك كەزىندە تەليەۆيزيا مۇراعاتىنا كەلىپ تۇسكەن بۇل سۋرەتتى بۇگىندە سىزدەردىڭ نازارلارىڭىزعا دا ۇسىنىپ قويۋدى ءجون سانادىق.

قاجى قورعان ۇلى،
ارداگەر- جۋرناليست