ەلباسى: العىس ايتۋ كۇنىنىڭ باستى ءمانى – تاريحي جادىنى ساقتاۋ


استاناداعى بەيبىتشىلىك جانە كەلىسىم سارايىندا قازاقستان حالقى اسسامبلەياسىنىڭ العىس ايتۋ كۇنىنە ارنالعان سالتاناتتى ءىس- شارالارى ءوتتى. اتاپ ايتار بولساق، دال ءقازىر قازاق ەسترادا جۇلدىزدارىنىڭ قاتىسۋىمەن «مىڭ العىس» سالتاناتتى كونسەرتى باستالدى.
كونسەرتتىڭ اشىلۋىندا ءسوز سويلەگەن قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا پرەزيدەنت نۇرسۇلتان نازاربايەۆتىڭ العىس ايتۋ كۇنىن مەرەكەلەۋگە ارنالعان قۇتتىقتاۋ ءسوزىن وقىپ بەردى.

«بۇگىن ءبىز بارشامىزعا ورتاق مەرەكە – العىس ايتۋ كۇنىن اتاپ ءوتىپ وتىرمىز.

وسىناۋ ايتۋلى كۇنى قيىن- قىستاۋ سىناق جىلدارىندا ادامگەرشىلىك پەن يماندىلىق ۇستەمدىگىنىڭ جادىمىزدا بولۋى  قازاقستان حالقىن بىرىكتىرەدى.

مەيىرىمدىلىك، ءوزارا كومەك جانە ءبىر- بىرىنە دەگەن قۇرمەت قازاقتىڭ كيەلى توپىراعىندا كۇللى قازاقستاندىقتار كوزدىڭ قاراشىعىنداي ساقتايتىن ءارى ماقتان تۇتاتىن دوستىق پەن ءوزارا تۇسىنۋشىلىكتىڭ بىرەگەي اتموسفەراسىن قالىپتاستىرۋعا مۇمكىندىك بەردى.

ءوز وتانداستارىمىزعا جانە تۋعان ولكەگە دەگەن كىرشىكسىز العىس سەزىمى بۇل مەرەكەگە ەرەكشە تەرەڭ ماعىنا بەرەدى.

سوندىقتان العىس ايتۋ كۇنىنىڭ باستى ءمانى – تاريحي جادىنى ساقتاۋ، ۇرپاقتار ساباقتاستىعى مەن ىرگەسى بەرىك نەگىزدەگى ەل بىرلىگىن نىعايتۋ بولىپ تابىلادى.

بۇكىل قازاقستاندىقتاردى العىس ايتۋ كۇنىمەن شىن جۇرەكتەن قۇتتىقتايمىن!

سىزدەرگە باق- بەرەكە، بەيبىت ءومىر جانە تابىس تىلەيمىن!» ، دەلىنگەن پرەزيدەنت حاتىندا.