ەسكىلىكتىڭ ەستەلىگى ەدى.. .


قازاقتان شىققان تۇڭعىش سپورت كوممەنتاتورى سۇلتانعالي قاراتاي ۇلى 82 جاسقا قاراعان شاعىندا فانيدەن باقيعا اتتاندى. سۇلتانعالي قاراتاي ۇلى 1936 -جىلى 23 -ماۋسىم كۇنى اقتوبە وبلىسىندا دۇنيەگە كەلگەن. ەلىمىزدەگى كوپتەگەن باسىلىمداردا ەڭبەك ەتتى.
70-جىلدارى قازاق تەليەۆيدەنيەسىندە جانە قازاق راديوسىندا كوممەنتاتور بولىپ جۇمىس ىستەدى. انا تىلىمىزدە بارلىق سپورت تۇرلەرىنەن رەپورتاج جۇرگىزدى. الماتىنىڭ ورتالىق ستاديونىنان تىكەلەي ەفيردە العاش رەت قازاقشا رەپورتاج جۇرگىزىپ، ەسىمى قازاق سپورتى تاريحىندا قالدى. سپورتتى جان- تانىمەن سۇيەتىن، قازاق ءتىلىن ايرىقشا قۇرمەتتەيتىن اعا بۋىن وكىلى ەدى. انا ءتىلىمىز ءۇشىن شىج- بىج بولىپ جۇرگەنىن تالاي رەت كوردىك. نەگىزى، سۇلتانعالي اعا ءتىل مامانى بولاتىن. لينگۆيستيكانى وتە جاقسى مەڭگەرگەن ەدى. ءبىر عانا «بەت» ءسوزىنىڭ 24 ءسينونيمى بار دەپ، قازاق ءتىلىنىڭ وتە باي ەكەندىگىن ناقتى دەرەكتەرمەن دالەلدەپ وتىراتىن. سونىڭ ارقاسىندا قازاق كوممەنتاتورلىعى مەن سپورت جۋرناليستيكاسىنا كوپتەگەن تىڭ تەرميندەر ەنگىزگەن. سۇلتانعالي قاراتاي ۇلىنىڭ سپورت جۋرناليستيكاسىنداعى ەڭبەگى – ۇشان- تەڭىز.

سونىمەن قاتار، سازگەرلىگى دە بار. ولەڭ دە شىعاراتىن. ءومىرىنىڭ سوڭعى كەزىندە عانا پاتريوتتىق تۇرعىداعى ءان- جىرلارىن كوپشىلىكە ۇسىنىپ ءجۇردى. قولىنا ءبىر ءىس السا، سونى سوڭىنا دەيىن جەتكىزۋگە تىرىساتىن. وتە تياناقتى، كىرشىكسىز ادام ەدى. ۇلكەندى، اعا بۋىندى قۇرمەتتەپ، قاتتى سىيلايتىن. جاستارعا «اعا بۋىندى قادىرلەڭدەر، الدىنان وتپەڭدەر» دەپ وسيەتىن ايتىپ وتىراتىن. وتە قاراپايىم، اقكوڭىل، اقجارقىن ادام ەدى. ەلدىڭ بارىمەن كۇلىپ سويلەسۋگە تىرىساتىن. ءازىل- قالجىڭى قانداي ەدى؟ ! جاستارعا اقىلىن ايتىپ وتىراتىن. قوش، اعا! تۇرلاۋسىز مىناۋ ومىردەن سۇلتانعالي اعامىز دا وزىپتى. جانىڭىز ءجانناتتا بولسىن! ءسىزدىڭ ەسىمىڭىز قازاق سپورتى تاريحىندا ماڭگىلىككە ساقتالىپ قالادى. وقىرماندارىمىزدىڭ اتىنان تۋما- تۋىستارىنا، جاقىندارىنا جانە وتباسىنا قايعىرىپ، كوڭىل ايتامىز.