السىزگە كومەكتەسكەننىڭ ساۋابى ۇلكەن


وتكەن 2017 -جىلى ءارتۇرلى الەۋمەتتىك جوبالاردى قولداۋعا ارنالعان رەسپۋبليكالىق «ۋاقىپ» اتتى كورپوراتيۆتىك قور قۇرىلعان- تىن. ونى باسقارۋعا تاجىريبەلى ازامات قايرات ايتباي تاعايىندالعان ەدى. اتالمىش قوردىڭ ماقسات- مۇددەسى جايلى باسىلىم وقىرماندارىن حاباردار ەتۋ ءۇشىن ءبىز قور توراعاسىمەن تىلدەسكەن ەدىك.
– قايرات ورىنباي ۇلى، بۇل قوردى نە ماقساتپەن قۇردىڭىزدار جانە نەمەن اينالىسادى؟

– «ۋاقىپ» قورى كوممەرتسيالىق ەمەس قايىرىمدىلىق كورسەتەتىن ۇيىم. نەگىزگى ميسسياسى – جەكە جانە زاڭدى تۇلعالار تاراپىنان جينالعان قارجىمەن قايىرىمدىلىق جاساپ، الەۋمەتتىك جوبالاردى قولداۋ. ماقساتىمىز – از قامتىلعان وتباسىلارعا ماتەريالدىق كومەك كورسەتۋ، بۇقارانىڭ ءدىني ساۋاتىن ارتتىرۋعا كومەكتەسۋ، راديكاليزم مەن ءدىني ەكسترەميزمنىڭ الدىن الۋ، ءدىني مەكەمەلەر مەن ونىڭ قىزمەتكەرلەرىن قولداۋ.

– قور وتكەن جىلدىڭ شىلدە ايىندا تىركەلىپتى. سودان بەرى قانداي جۇمىستار اتقارىلدى؟

– ەلىمىزدەگى ءدىني قىزمەتكەرلەردى قولداۋ قوردىڭ باستى باعىتى دەگەندى جاڭا ايتتىق. ويتكەنى، ءدىني قىزمەتكەرلەر بيۋدجەتتەن ايلىق المايدى. اسىرەسە، شالعاي اۋىل يمامدارى قارجىعا مۇقتاج. قور وسى ورايدا، الىس اۋىلداردا تۇراتىن 250 ءدىني قىزمەتكەرگە، تەرىس اعىممەن كۇرەسۋشى تەولوگتارعا جالپى سوماسى 31 ميلليون تەڭگەلىك الەۋمەتتىك كومەك كورسەتىپ، 90 ءدىني قىزمەتكەردى ەكسترەميزم مەن راديكاليزمگە قارسى بىلىكتىلىك ارتتىرۋ كۋرسىنا جىبەردى. بۇل جۇمىس ءالى دە جالعاسىن تابادى.

بۇنىڭ سىرتىندا قمدب جانىنداعى يمامداردىڭ ءبىلىمىن جەتىلدىرۋ يسلام ينستيتۋتىنا 16 ميلليون تەڭگە كولەمىندە كومەك كورسەتىلدى. اقتوبە قالاسىنىڭ مەشىتىنە «Hyundai Creta» جەڭىل كولىگى بەرىلدى. كەدەي وتباسىلاردان شىققان بەس ستۋدەنتكە «نۇر- مۇباراك» ۋنيۆەرسيتەتىندە ءبىلىم الۋ ءۇشىن قارجىلاي كومەك بەرىلدى.

ۇلتتىق سپورت تۇرلەرىن ناسيحاتتاۋ ماقساتىندا وتكەن جىلدىڭ قازان ايىندا جامبىل وبلىسىنىڭ قورداي اۋدانىندا قازاق كۇرەسىنەن، قاراشا ايىندا وڭتۇستىك قازاقستان وبلىسىندا توعىزقۇمالاقتان تۋرنير وتكىزدىك.

جاقىندا قازاقستان رەسپۋبليكاسى كاسىپوداقتار فەدەراتسياسىنىڭ ءتوراعاسى باقىتجان ابدىرايىموۆپەن كەزدەسىپ، فەدەراتسيا تاراپىنان ءدىن قىزمەتكەرلەرىنە ەلىمىزدەگى دەمالىس ورىندارىنا جەڭىلدىكپەن جولداما بەرۋ ماسەلەسىن شەشتىك.

كەلەسى ءبىر اتاپ وتۋگە تۇراتىن دۇنيە – قور باستاماسىمەن جاستاردىڭ ادامگەرشىلىك قابىلەتىن ارتتىرۋعا باعىتتالعان الەۋمەتتىك روليكتەر ازىرلەنىپ، «قايران ءومىر» اتتى قىسقا مەتراجدى فيلم تۇسىردىك. وسىنىڭ جالعاسى رەتىندە ءداستۇرلى يسلام قۇندىلىقتارىن جانە اتا- بابا مۇرالارىن ناسيحاتتاۋعا ارنالعان تولىق مەتراجدى ءفيلمنىڭ ءتۇسىرىلىمى ءجۇرىپ جاتىر.

ەلوردالىقتار ءۇشىن جاعىمدى جاڭالىق: وتكەن جىلى استانا قالاسى پەتروۆ كوشەسىندە ورنالاسقان «سۇلتان» ساۋدا ورتالىعىندا زەينەتكەرلەر مەن مۇقتاج جاندارعا ءسۇت پەن نان تەگىن تاراتىلعان ەدى. بۇل اكتسيا بيىل دا جالعاسىن تاۋىپ، ءار اپتانىڭ جۇما كۇنى ساعات 12:00-15:00 اراسىندا وتكىزىلۋدە.

– ءسىز ادام قۋانارلىق مالىمەتتەر ايتتىڭىز. قۇتتى بولسىن! قور ارقىلى قايىرىمدىلىق جاساۋعا نيەت ەتكەن ازاماتتار بولسا قارجىسىن قالاي اۋدارا الادى؟

– قورعا قارجىنى اۋدارۋدىڭ بىرنەشە جولى بار. اۋەلى «قازاقستان حالىق بانكى» اق- تا اشىلعان ەسەپ- شوتقا جولداي الادى. ءتيىستى رەكۆيزيتتەر قوردىڭ رەسمي سايتىندا (www.waqyp.kz) تۇر. سونىمەن قاتار قور كاسساسىنا بارلىق قوعامدىق ورىنداردا ورنالاسقان QIWI تەرمينالدارى ارقىلى اۋدارۋعا بولادى. مۇنان بولەك قوردىڭ ءموبيلدى قوسىمشاسى جاسالۋدا. وسى جۇيە ارقىلى ونلاين رەجىمدە اقشا اۋدارا الاسىز.

– وتكەن جىلدىڭ سوڭىندا قور اقتوبە قالاسىنداعى كوللەدج- مەدرەسە قۇرىلىسىنا قاتىسقانى جايلى حاباردارمىز. وسى جوبانى ىسكە اسىرۋدا قانداي جۇمىستار اتقارىلدى؟

– شىن مانىندە بۇل ەلىمىز ءۇشىن وتە قاجەت جوبا- تىن. قالا اكىمدىگى ءسىز ايتىپ وتىرعان ءبىلىم ورداسىنىڭ قۇرىلىسىنا بەس گەكتار جەر ءبولىپ، قۇرىلىسىن 2020-2021 -جىلدارعا قاراي اياقتاۋ جوسپارلانىپتى. ءبىراق كوللەدج- مەدرەسە ءبىلىم جانە عىلىم مينيسترلىگى تاراپىنان ءبىلىم بەرۋ ليتسەنزياسىن الدەقاشان العان ەكەن. ءبىزدىڭ قور ءبىلىم ورداسى اۋماعىندا ءدىني قىزمەتكەرلەر مەن مۇقتاج جاندارعا ارناپ، ءتورت پودەزدەن قۇرالعان ءۇي سالماقپىز. جۇمىس ءساتتى ءجۇرىپ جاتسا، مۇنداي جوبالاردى استانا جانە الماتى قالالارى، قىزىلوردا وبلىسىندا ىسكە اسىرۋ جوسپارلانىپ وتىر.

– قوردىڭ قارجىلىق باقىلاۋ تەتىگى قالاي ويلاستىرىلعان؟

– جۇمىس بارىسىندا قولداعى قارجىعا تۇراقتى تۇردە مونيتورينگ جۇرگىزىلىپ، قايىرىمدىلىق شارالارىنىڭ تيىمدىلىگى جانە قارجىنىڭ تيىمدىلىگى باقىلانىپ وتىرادى. بۇل جۇمىستى قوردىڭ مەنەدجەرلەرى وڭىردەگى ءدىن ىستەرى باسقارمالارى جانە ءدىني بىرلەستىك وكىلدەرىمەن بىرلەسىپ جۇرگىزەدى.

اڭگىمەلەسكەن

بەكەن قايرات ۇلى،
«ەگەمەن قازاقستان»