اكىمنىڭ اكەلىك قامقورلىعى


تالدىقورعان قالاسىنداعى «انالار ۇيىندە» تاعدىردىڭ ءتۇرلى سىنىنا تۇسكەن 9 انا، 11 بالا تۇرىپ جاتىر. كوبى كۇيەۋىنەن ءزابىر كورىپ اجىراسقان، بالاسىنان باس تارتقان اكەدەن اليمەنت الا الماي ورتالىقتىڭ كومەگىنە جۇگىنگەن جاندار. بارلىعى «انالار ءۇيىنىڭ» قامقورلىعىندا. ارينە انالاردىڭ اراسىندا جاعدايى وڭالىپ، جۇمىس ىستەپ، وقۋعا ىنتاسى اۋعان جىگەرلىلەرى دە بار.
سولاردىڭ قاتارىندا گۇلىم نۇركەبايەۆا ەسىمدى جاس انا بار. ول دا قۇنداقتاۋلى بالاسىن كوتەرىپ، تالدىقورعان قالاسىنداعى «انالار ءۇيىن» پانالاعان ەدى. گۇلىمنىڭ باسىنان وتكەن وقيعا جۇرتقا ساباق بولارلىقتاي. 12 جاسىندا اناسىنان ايىرىلعان جاس قىز اكەسىن مۇلدەم كورمەگەن ەكەن. كىشى ءسىڭلىسىن ەرتىپ قالاداعى «اينالايىن» بالالار ءۇيىنىڭ تابالدىرىعىن اتتايدى. وسى جەردەن تاربيە الىپ، كوللەدجدە وقىپ ماماندىق يەسى اتانعان گۇلىم باقىتتىڭ جولىنا تۇسكەندەي ەدى. ورىمدەي جىگىتپەن تانىسقاندا، ارمانىنداعى جىگىتتى جولىقتىرعانداي سەنگەن. سەزىم جەتەگىندە جۇرگەن جاستار ءسابيلى بولاتىندارىن بىلگەننەن كەيىن بارىپ، وتباسىن قۇرۋعا قادام جاسايدى. وكىنىشتىسى، جىگىتتىڭ اكە- شەشەسى جاس كەلىننىڭ جەتىم قىز ەكەنىن بەتىنە باسىپ بوساعالارىنان اتتاتپاي قويادى. اياعى اۋىر جاس قىز وسىلايشا تاعدىردىڭ تەزىندە قالا بەرگەن.. .

گۇلىم «انالار ۇيىنە» كەلگەنگە دەيىن بالاسىنا قۇجات تا جاساتا الماعان ەكەن. ءتيىستى جاردەماقى الۋدىڭ دا مۇمكىندىگى بولماعان. ءقازىر جاعدايى تۇزەلدى. قايسار مىنەزدى گۇلىم باسىنا تۇسكەن جاعدايدى جۇرتتان جاسىرماي، وبلىستىق «جەتىسۋ» تەلەارناسىنداعى «بولمىس» توك- شوۋىنا قاتىسقان بولاتىن. وسى باعدارلاما گۇلىمنىڭ تاعدىرىن تۇبەگەيلى وزگەرتكەنى انىق.

تەلەباعدارلامانى كورگەن وبلىس اكىمى اماندىق باتالوۆ گۇلىمنىڭ جاعدايىنا الاڭداۋشىلىق ءبىلدىرىپتى. «انالار ءۇيىن» پانالاعان جاس انانىڭ جايىن بىلۋگە ورىنباسارى جاقسىلىق وماردى ارنايى جۇمساعان. ماسەلەنىڭ ءمانىن ۇققان ا. باتالوۆ گۇلىمدى ارنايى قابىلداۋىنا شاقىردى. ءسابيىن كوتەرىپ كەلگەن جاس اناعا اكەلىك قۇرمەت كورسەتىپ، بالانىڭ بايعازىسىنا تالدىقورعاننان پاتەر بەرەتىنىن ايتتى.

ەندى گۇلىم نۇركەبايەۆا 6-ايعا جالعاساتىن وڭالتۋ شاراسىنان ءوتىپ، ءتيىستى ەم- دوم قابىلداعاننان كەيىن جورگەكتەگى بالاسىمەن بىرگە جاڭا پاتەردىڭ بوساعاسىنان اتتايتىن بولدى.

قالماحانبەت مۇقامەتقالي،
«ەگەمەن قازاقستان»

الماتى وبلىسى