ەربولدىڭ ەرلىگىنە ارنالعان فيلم


استاناداعى «قازاقستان» ورتالىق كونتسەرت زالىندا ۇلتتىق ۇلان جاۋىنگەرلەرىنىڭ ەرلىگى مەن قايسارلىعى تۋرالى تۇسىرىلگەن «التىنشى بەكەت» كوركەم ءفيلمىنىڭ تۇساۋكەسەرى ءوتتى.
فيلم جەلىسىنە ۇلتتىق ۇلاننىڭ ساربازى ەربول وتاربايەۆتىڭ 2010 -جىلعى 22 -ماۋسىمدا اقتاۋ قالاسىنداعى تۇزەتۋ مەكەمەسىندە قاراۋىل قىزمەتىن اتقارىپ تۇرعان كەزدەگى جانقيارلىق ەرلىگى ارقاۋ بولعان. ۇيىمداستىرۋشىلاردىڭ ايتۋىنشا، بۇل تۋىندى – لاڭكەستىك پەن ەكسترەميزمنىڭ، راديكالدى اعىمداردىڭ الدىن الۋعا شاقىراتىن قۇرال.

تۇساۋكەسەرگە دەپۋتاتتار، كۇشتىك قۇرىلىمداردىڭ، اكىمدىكتىڭ جانە بۇقارالىق اقپارات قۇرالدارىنىڭ وكىلدەرى، ۇلتتىق ۇلان ارداگەرلەرى، اكتەرلار قاتىستى. ۇلتتىق ۇلاننىڭ باس قولباسشىسى رۋسلان جاقسىلىقوۆ شارا الدىنداعى باسپا ءسوز ءماسليحاتىندا ەربولدىڭ ەرلىگى جاستارعا ۇلگى بولۋى ءتيىس ەكەنىن اتاپ كورسەتتى.

«ەرلىك جاساعان كەزدە ەربول وتاربايەۆ نەبارى 19 جاستا ەدى. ەربولدى ۇلگى ەتە وتىرىپ، بۇگىنگى جاس ۇرپاقتى تاربيەلەۋىمىز كەرەك. ءوز باسىم وسىناۋ ەرلىككە نازارىن اۋدارعاندارعا العىسىمدى بىلدىرەمىن. سەبەبى جاۋىنگەرلەرىمىزدىڭ باتىرلىعىن كوپ جاعدايدا ۇمىتىپ كەتەمىز. ءبىزدىڭ جىگىتتەردىڭ ەرلىگى جاس ۇرپاققا ۇلگى بولۋى كەرەك» ، دەدى ر. جاقسىلىقوۆ.

ەرلىگى فيلمگە ارقاۋ بولعان ەربول ءالى كۇنگە دەيىن سول وقيعا ەسىندە ەكەنىن ايتادى.

«مۇنداي جاعدايدى ءومىر بويى ۇمىتۋ مۇمكىن ەمەس شىعار. ۇلتتىق ۇلاننىڭ كەز كەلگەن ساربازى وسىنداي وقيعاعا كەزىككەندە ەشقاشان ارتقا شەگىنبەيدى، شەگىنگەن دە ەمەس. سول كەزدە بار ويىم سوتتالعان ازاماتتاردى توقتاتۋ بولدى. ماقساتىم  باتىر اتانۋ ەمەس بولاتىن. مىندەتىمدى اتقارىپ جۇرگەن اسكەري ءبولىمدى، روتانى، ۆزۆودتى، اكە- شەشەمدى، اۋىلىمدى جەرگە قاراتقىم كەلگەن جوق» ، دەدى باس كەيىپكەر.

كوركەم تۋىندىداعى باستى رولدەردى سانۇرجان سۇلەيمەنوۆ، جاسۇلان ومىربەك، سايات يسەمبايەۆ سەكىلدى ەلىمىزگە تانىمال اكتەرلار سومدادى. مۇحامەتقالي ساتوۆتىڭ يدەياسىمەن تۇسىرىلگەن تۋىندىنىڭ باس پروديۋسسەرى دانيار يبراگيموۆ، رەجيسسەرى سەرىكبولسىن وتەپبەرگەنوۆ. كينوكارتينانى اقپارات جانە كوممۋنيكاتسيالار مينيسترلىگىنىڭ تاپسىرىسى بويىنشا «ايۋ سينەما» كينوكومپانياسى مەن«حابار» اگەنتتىگى بىرلەسە وتىرىپ تۇسىرگەن.

ەستەرىڭىزدە بولسا، سول كەزدە جاس جاۋىنگەر تۇرمەدەن قاشپاق بولعان 21 جازاسىن وتەۋشىنىڭ جولىنا جالعىز ءوزى توسقاۋىل قويعان بولاتىن. وسى ەرلىگى ءۇشىن ە. وتاربايەۆ II دارەجەلى «ايبىن» وردەنىمەن ماراپاتتالدى. قازىرگى تاڭدا ول – ۇلتتىق ۇلاننىڭ وفيتسەرى.

اباي اسانكەلدى ۇلى،
«ەگەمەن قازاقستان»