شىعىستا اۋىل بالاباقشاسى ايرىقشا ويىنشىقپەن قامتىلدى


ماقانشى ءوڭىرىنىڭ قارابۇتا اۋىلىندا «تۋعان جەرگە تۋىڭدى تىك» اتتى جەرلەستەر فورۋمى وتكەن بولاتىن. ماقسات الىستا جۇرگەن اۋىلداستاردىڭ تۋعان وڭىرلەرىمەن بايلانىسىن نىعايتىپ، ەلجاندى ازاماتتاردى اۋىلعا بولىسۋعا شاقىرۋ ەدى.
نەگىزى، بۇل ءۇردىس اۋىلدا بۇرىننان قالىپتاسا باستاسا دا، سول باعىتتى كەڭەيتە تۇسسەك دەدىك. ويتكەنى وسى ورتادان شىققان ازاماتتاردىڭ دەمەۋشىلىگىنىڭ ارقاسىندا اۋىل ورتاسىندا مەشىت، قاتىمحانا سالىنىپ، ورتالىق ساياباق جوندەلىپ، وندا سوعىس جانە ەڭبەك ارداگەرلەرى مەن انالار قۇرمەتىنە ەسكەرتكىشتەر ورناتىلدى. مىنە، تۋعان اۋىلدارىنىڭ تىلەۋىن تىلەپ كەلە جاتقان جومارت جەرلەستەر فورۋمنىڭ «اۋىلدىڭ الەۋمەتتىك- ەكونوميكالىق دامۋىنا قولىڭنان كەلگەنشە قولداۋ جاسا» دەگەن ۇندەۋىن دە وڭ قابىلدادى. ەل الدىندا بەرىلگەن ۋادەلەردىڭ الدى ورىندالا باستادى. اتاپ ايتقاندا، اۋىلداعى «نۇر شۋاق» بالاباقشاسى ەرەكشە ۇلگىدەگى ۇلتتىق ويىنشىقتارمەن قامتىلىپ، ەمحاناعا ارنالعان تەلەديدار دا جەتكىزىلدى.

زاماناۋي ۇلگىدەگى تالاپقا ساي ۇلتتىق ويىنشىقتار «جەتى ونەر» سەرىكتەستىگىنىڭ ونىمدەرى ەكەن. بالانى قويىپ، ۇلكەندەردىڭ ءوزىن قىزىقتىرعان بۇل ونىمدەر تەك ويىن قۇرالى عانا ەمەس، ساناداعى ۇلتتىق ناقىشتاردى جاڭعىرتاتىن، بالدىرعانداردى باۋىرمالدىققا باۋليتىن تاربيە قۇرالى ەكەنىنە كوزىمىز جەتىپ وتىر. ساكەن بولىس ەسىمدى كاسىپكەردىڭ اۆتورلىعىمەن دۇنيەگە كەلگەن «كەرەمەت ءۇي» ، «كەرەمەت دومبىرا» ، «ماعىنالى ويۋلار» اتتى ويىنشىقتار توپتاماسىنىڭ ءارقايسىسىنىڭ جەكە نۇسقاۋلىق كىتاپشالارى بار. نۇسقاۋلىقتاردا بالا ءتىلىن دامىتۋ باعىتىندا ويىنشىق اتاۋلارى تاقپاق ۇلگىسىندە بەرىلگەن. بۇل ويىنشىقتاردىڭ تاعى ءبىر ارتىقشىلىعى – ءبىر جانە بىرنەشە بالانىڭ ورتاق قۇراستىرۋىنا ارنالعان. مىسالى «كەرەمەت ءۇيدىڭ» 6 كەرەگەسى، 20 ۋىعى، وزگە دە بولشەكتەرىمەن بىرگە ءۇي ىشىنە جينايتىن تۇرمىستىق جابدىقتارى بار، جيىنى 20 بۇيىمنان تۇرادى. الدىمەن كيىز ءۇيدى قۇراپ، ونىڭ ىشىنە ساندىق، توسەك سەكىلدى بۇيىمداردى جيناي ءجۇرىپ، ءسابي ساناسىنا ۇلتتىق ورنەكتەردىڭ، سول توڭىرەكتە تاربيەشىنىڭ نەمەسە اجەسى ايتقان اڭگىمەلەرىن تەز ءارى تەرەڭ قابىلدايتىنى انىق.

«جەتى ونەر» ونىمدەرىنىڭ ەكى جيىنتىعىن سوۆەت شوشەكوۆ پەن سەرىك يسا ەسىمدى اۋىلىمىزدىڭ ماقتانىشىنا اينالعان كاسىپكەر ازاماتتارىمىز فورۋمدا بەرگەن ۋادەلەرى بويىنشا الماتىدان ارنايى جولداپتى. «قۋانتساڭ، بالانى قۋانت» دەگەندەي، بۇلدىرشىندەرىنىڭ قۋانىشتان بال- بۇل جانعان جۇزدەرىن كورگەن سايىن اتا- انالارى مەن تاربيەشىلەر كەرەمەت تارتۋ جاساعان اۋىلداس ازاماتتارعا العىس ايتۋدا.

سوۆەت شوشەكوۆ پەن سەرىك يسا ەسىمدى جەرلەستەرىمىز جەرلەستەر فورۋمىنا دا قۇر قول كەلمەي، اۋىلداستار كادەسىنە جاراسىن دەپ قازاقتىڭ ماڭدايالدى قالامگەرلەرىنىڭ تۋىندىلارىنان 100 كىتاپ كوتەرە كەلىپتى. بۇل كىتاپتار اۋىلىمىزداعى مادەنيەت ۇيىندەگى كىتاپحانامىزدىڭ قازىناسىن تولىقتىرا ءتۇستى.

مۇراتبەك سارقىت ۇلى،
قارابۇتا اۋىلدىق وكرۋگىنىڭ اكىمى

شىعىس قازاقستان وبلىسى،

ءۇرجار اۋدانى