انانى امان الىپ قالدى


قاراعاندىلىق ءتارتىپ ساقشىلارى اياعى اۋىر انانىڭ ءومىرىن ساقتاپ قالدى. پوليتسيا قىزمەتكەرلەرى قىراعىلىق جانە ابجىلدىك تانىتپاعاندا، بۇل وقيعانىڭ قايعىلى جاعدايمەن اياقتالۋى ابدەن مۇمكىن ەدى.
سول كۇنى قۇرامىندا وبلىستىق جول- پاترۋلدىك پوليتسيا باتالونىنىڭ ۆزۆود كومانديرى، پوليتسيا كاپيتانى داۋرەن ابدىشيەۆ، اعا لەيتەنانت ماقسات سەرىكبايەۆ جانە ستارشينا ماقسات سمايلوۆ بار ەكيپاج ادەتتەگىدەي قىزمەتتىك مىندەتتەرىن اتقارۋعا كىرىسكەن بولاتىن. ولار «قاراعاندى- پاۆلودار» تاس جولىن بەتكە الىپ، قاراعاندىدان شىعا بەرگەندە، قالا شەتىندەگى كوشەلەردىڭ قيىلىسىندا كەنەتتەن توقتاي قالعان اۆتوكولىكتى بايقاپ قالادى. وقيعا بولعان جەرگە جىلدام جەتىپ كەلگەندەرىندە كولىكتى جۇرگىزىپ كەلە جاتقان ايەلدىڭ ورىندىقتىڭ ارقالىعىن شالقاسىنان ءتۇسىرىپ، قيمىلسىز جاتقانىن كورەدى. كولىكتىڭ ىشىندە، سونداي- اق، تاعى ءبىر ايەل مەن كىشكەنتاي بالا بولعان.

پوليتسيا قىزمەتكەرلەرىنە ويلانىپ جاتۋعا ۋاقىت از ەدى. جەدەل قيمىلداعان ولار ەسىنەن تانعان ايەلدى ءوز كولىكتەرىنە كوتەرىپ اكەلىپ جاتقىزىپ، جاقىن ماڭداعى اۋرۋحاناعا قۇستاي ۇشادى. سويتسە، كولىك جۇرگىزۋشى ايەل ديابەتپەن اۋىراتىن بولىپ شىقتى، ونىڭ ۇستىنە، قۇرساعىندا سەگىز اپتالىق شارانا بولعان.

ءبىر قىزىعى، الگى ايەلدىڭ جاقىندارى پوليتسيا اۆتوكولىگىنىڭ قاپتالداعى ءنومىرىن ەستە ساقتاپ قالعان دا، ىزىنشە قاراعاندى وبلىستىق ءىىد جەرگىلىكتى پوليتسيا قىزمەتىنىڭ باسشىسى جالعاسباي جاقايەۆتىڭ اتىنا قىسىلتاياڭدا كومەك قولىن سوزعان ءتارتىپ ساقشىلارىن ماراپاتتاۋدى ءوتىنىپ حات جولداپتى. ال ءوز مىندەتتەرىنە ادال پوليتسيا قىزمەتكەرلەرى كىشىپەيىلدىك تانىتىپ، بۇل ىستەگەن جاقسىلىقتارىن بارىنشا جاسىرۋعا تىرىسقان.

قايرات ءابىلدا،
«ەگەمەن قازاقستان»
قاراعاندى