ءتورت قۇدىرەتتىڭ توركىنى


قازاقستان رەسپۋبليكاسى مەملەكەتتىك ورتالىق مۋزەيى الماتى قالاسىنداعى گەتە ينستيتۋتىمەن بىرلەسىپ ۇيىمداستىرعان «ەكولوگيالىق سانا – تابيعاتتان ۇيرەنەمىز» اتتى حالىقارالىق ينتەراكتيۆتى كورمە اشىلدى. بىلە بىلسەڭىز بۇل كورمەدە جەر، وت، اۋا جانە سۋ سەكىلدى عاجايىپتاردىڭ جاراتىلىسىن تانۋعا مۇمكىندىك الاسىز.
«ەكولوگيالىق سانا – تابيعاتتان ۇيرەنەمىز» كورمەسى ءبىزدىڭ پلانەتامىز تۋرالى كوپتەگەن قىزىقتى نارسەلەردى باياندايدى جانە جەر، وت، اۋا جانە سۋ دەگەن ءتورت قۇدىرەتتىڭ قاسيەتتەرى مەن ەرەكشەلىكتەرىنە ارنالادى. بۇل كورمەدە تەك تاڭعاجايىپ دەرەكتەر مەن دايەكتەر عانا ەمەس، ادامنىڭ تابيعاتپەن ءوزارا ارەكەتتەسۋىنىڭ وڭ جانە تەرىس اسپەكتىلەرىن سۋرەتتەي وتىرىپ، قورشاعان ورتانى ساقتاۋعا قاتىسۋعا شاقىرادى.

ءبىرىنشى «جەر» تارماعىندا كورمەگە كەلۋشىلەر جەر بەتىندەگى حالىقتاردىڭ ورنالاسۋى، ونىڭ لاستانۋ فاكتىلەرىن، رەسۋرستارىن، كليماتتىڭ وزگەرۋىنە اسەر ەتەتىن فاكتورلاردى، تابيعي رەسۋرستاردى ساقتاۋ جانە جاڭا تەحنولوگيالاردى پايدالانۋدىڭ جولدارى تۋرالى بىلەتىن بولادى.

ەكىنشى ء«ورت» تارماعىنىڭ ەكسپوزيتسياسى بويىنشا كۇن ەنەرگياسى، جانارتاۋلار، ورتتەر، ء«پاسسيۆتى» ءۇي، بولاشاقتىڭ ءۇيى جانە گەليوتروپتى ءۇي، كۇن شۇعىلالى جولدارمەن جانە OLE روبوت- قوڭىزبەن (جول تالعامايتىن ءورت ءسوندىرۋ قوندىرعىسى) تانىسۋعا مۇمكىندىك الادى.

ءۇشىنشى «اۋا» تاراۋى – اتموسفەرا، اۋانىڭ لاستانۋى، پارنيكتىك اسەر، جەل ەلەكتر قوندىرعىلارى، ەلەكتروموبيلدەر، اەروديناميكا مەن بيونيكا جايىندا بايان ەتەدى.

ءتورتىنشى «سۋ» تاراۋىنىڭ تاقىرىپتىق فوتوسۋرەتتەرى مەن ستەندتەرى الەم بويىنشا قانشا سۋ بار؛ سۋ ساپاسىن جاقسارتۋ جولدارى؛ سۋ رەسۋرستارىن پايدالانۋ؛ جاڭا تەحنولوگيالاردى قالاي قولدانۋعا بولادى؛ سۋدىڭ لاستانۋىنىڭ قالاي الدىن الۋعا بولادى دەگەن سۇراقتارعا جاۋاپ بەرەدى.

«ەكولوگيالىق سانا – تابيعاتتان ۇيرەنەمىز» كورمەسى ەكولوگيا ماسەلەلەرىمەن اينالىساتىندارعا عانا ەمەس، سونداي- اق قورشاعان ورتا پروبلەمالارىنا بەيجاي قارامايتىن ادامدارعا، سونداي- اق، كورمە قازاق جانە ورىس، نەمىس تىلدەرىندە ۇسىنىلعاندىقتان نەمىس ءتىلىن ۇيرەنۋشىلەرگە دە قىزىقتى ءارى پايدالى بولماق.

كورمەنى تاماشالايتىن ءاربىر ادام قورشاعان ورتانى قورعاۋ ىسىنە قالاي جەكە ۇلەس قوسا الاتىندىعىن تۇسىنۋگە مۇمكىندىك اشادى دەپ بىلەمىز. ءتورت قۇدىرەت تۋرالى تانىمىڭىز دا وزگەرىپ سالا بەرەدى. تاڭعاجايىپ ءتورت قۇدىرەت… جەر… وت… اۋا… سۋ…

ساپارباي پارمانقۇل،

«ەگەمەن قازاقستان»

الماتى