الماتىدا قۇسبەگىلەردىڭ رەسپۋبليكالىق ءتۋرنيرى ءوتتى


الماتىنىڭ «قۇلاگەر» ىقشام اۋدانىنداعى يپپودرومدا قۇسبەگىلەردىڭ رەسپۋبليكالىق ءتۋرنيرى ءوتتى. «رۋحاني جاڭعىرۋ» باعدارلاماسىنىڭ شەڭبەرىندە ۇيىمداستىرىلعان ايتۋلى جارىسقا ەلىمىزدىڭ 10 ايماعىنان كەلگەن 60-قا جۋىق ساياتشى قاتىسىپ، ءۇش كۇن بويى ءوزارا مىقتىنى انىقتادى.
ۇلتتىق ونەردى ۇلىقتاعان  كەرەمەت سايىستىڭ كۋاگەرى بولۋعا  كەلگەندەردىڭ قاراسى قالىڭ بولدى. جاڭا ەرەجە بويىنشا بارلىق بۇركىتشى تەك ات ۇستىندە ءجۇرىپ ونەر كورسەتتى.   بۇركىتشىلەر العاشقى ىرىكتەۋ كەزەڭىندە  قۇستى ات ۇستىنەن قولعا قوندىرۋ، شىرعا تارتۋ سياقتى ونەرلەرىن كورسەتىپ سىنعا ءتۇستى. ال، كەلەسى كەزەڭگە وتكەن بۇركىتتەر قويان مەن تۇلكىگە شاپسا، قارشىعا مەن يتەلگىلەر قولعا شاقىرىلىپ، كوگەرشىن اۋلادى.   بۇل جەردە تەك قۇستىڭ سىنى ەمەس، قۇسبەگىنىڭ كيىم ۇلگىسىنە دە ايرىقشا ءمان بەرىلدى.

جارىس قورىتىندىسى بويىنشا، ەڭ جوعارى ۇپاي جيناعان 13-جاسار بۇركىتشى بەكسۇلتان سەيىتجان ۇزدىك دەپ تانىلىپ، باس بايگەگە تىگىلگەن 200 مىڭ تەڭگەنى ەنشىلەسە، ۇپاي سانى بويىنشا ەكىنشى ورىننان كورىنگەن الماتىلىق عابيت تاڭات 150 مىڭ تەڭگەنى قانجىعاسىنا بايلادى. ۇزدىك ۇشتىكتى تۇيىندەگەن مۇراتحان داۋلەتحان 100 مىڭ تەڭگە قارجىلاي سىيلىققا يە بولدى.   ۇيىمداستىرۋشىلاردىڭ شەشىمى بويىنشا 4, 5, 6-ورىنداردى ءوزارا بولىسكەن ارمانبەك كۇنتۋعان، باقداۋلەت باباجان، الماس سەيىتجان ەسىمدى قۇسبەگىلەرگە دە ارنايى ديپلوممەن قوسا اقشالاي سىيلىقتار تابىستالدى.

– جارىس وتە جوعارى دەڭگەيدە ءوتتى. ارينە، وڭاي بولعان جوق. ءبىرىنشى ورىندى كەز كەلگەن قىران قۇسى الا بەرمەيدى. سول ءۇشىن مەن ءوزىمنىڭ قۇسىم «حانتاڭىرگە» العىس ايتامىن. مەن بۇل قۇستى باپتاپ جۇرگەنىمە بەس جىل بولدى. ءقازىر ءوزىم ون ۇشتەمىن، الداعى ۋاقىتتا دا باسقا تۋرنيرلەردە باعىمدى سىناپ كورمەكپىن. بابالارىمىزدان قالعان اسىل مۇرانى جاس ۇرپاق ارى قاراي جالعاۋىمىز كەرەك، – دەيدى جارىس جەڭىمپازى بەكاسىل سەيىتجان.

بۇركىتتەردەن بولەك، ساياتقا قارشىعا مەن يتەلگى قۇستارى دا شىعىپ، كوگەرشىن اۋلاعان بولاتىن. بۇل باسەكەدە داۋرەن ارشاباي، اراي سەرىكبايەۆا، سۇلتان سەيىتجانبەك، مەدەت ءشالىپوۆ، بەرىكبولسىن باباجان، نۇرباقىت باكەن ەسىمدى قۇسبەگىلەر جارىس جۇلدەگەرى اتاندى. ولاردىڭ قاتارىندا ەڭ جاس قاتىسۋشى رەتىندە كوزگە تۇسكەن قوس الماتىلىق  العازيز عالىمبەك ۇلى مەن ەرسۇلتان جۇماعۇل ارنايى سىيلىققا يە بولدى.

«قىران» فەدەراتسياسىنىڭ اتقارۋشى ديرەكتورى باعدات مۇپتەكە قىزىنىڭ ايتۋىنشا، وسىدان ون جىل بۇرىن الماتى وبلىسىندا بۇركىتشىلەردىڭ العاشقى مەكتەبى قۇرىلعان تۇستا رەسپۋبليكادا بار جوعى 15-اق بۇركىت بولعان. ءقازىر بۇل ونەرمەن اۋەستەنگەندەردىڭ سانى 100 دەن اسىپ جىعىلادى. جىل سايىن قۇسبەگىلىك ونەرى كەڭگە قانات جايىپ، قىران ۇستاپ، باپتايتىنداردىڭ سانى ارتىپ كەلەدى.

ەسكە سالساق، مۇنداي جارىس الماتىدا العاش رەت 1988 -جىلى كورشىلەس قىرعىز، تۇركىمەن ەلدەرىنىڭ قاتىسۋىمەن وتكەن بولاتىن. «قىران 2018» اتتى  بۇل ءىس- شارا الماتى قالاسى دەنە شىنىقتىرۋ جانە سپورت باسقارماسى جانە «قىران» فەدەراتسياسىنىڭ قولداۋىمەن ۇيىمداستىرىلىپ وتىر.

ارمان وكتيابر،

«ەگەمەن قازاقستان»

الماتى