استانا اكىمدىگى «اكىمگە سۇراق قوي» اتتى اكسيانى قولعا الدى


استانادا «اكىمگە سۇراق قوي» اتتى اكسيا باستالدى، دەپ حابارلايدى قالا اكىمدىگى.
28-اقپان كۇنى استانا اكىمى اسەت يسەكەشيەۆ قالا تۇرعىندارىنا ەسەپ بەرۋ ءۇشىن كەزدەسەدى.   كەزدەسۋدە تۇرعىندار اكىمگە وزدەرىن الاڭداتقان سۇراقتاردى قويىپ، جاۋابىن الا الادى.

«ەسەپ بەرۋ كەزدەسۋىنە بارلىق تۇرعىن قاتىسا المايتىندىقتان «اكىمگە سۇراق قوي» اتتى اكسيانى قولعا الىپ وتىرمىز. اكسيا بارىسىندا قالاعان جۇيە بويىنشا سۇراق قويىپ، جاۋابىن الا الاسىز» ، دەلىنگەن حابارلامادا.

بۇگىننەن باستاپ قالانىڭ ءاربىر تۇرعىنى ءوز سۇراعىن مىناداي تاسىلدەرمەن قالدىرا الادى:

– استانا قالاسى اكىمدىكتىڭ سايتى ارقىلى «اكىمگە ءوتىنىش» ايدارىنا؛

– استانا قالاسى اكىمدىگىنىڭ «قالالىق مونيتورينگ جانە جەدەل ارەكەت ەتۋ ورتالىعى» مەملەكەتتىك كوممۋنالدىق كاسىپورنىنىڭ 109 نومەرىنە قوڭىراۋ شالۋ جانە 109@astana.kz ەلەكتروندى پوشتاعا حات جازۋ ارقىلى نەمەسە Facebook, Telegram؛

– Smart Astana موبيلدىك قوسىمشاسى ارقىلى.   بارلىق سۇراقتار قالالىق مونيتورينگ جەدەل دەن قويۋ ورتالىعى وڭدەپ جاۋاپ بەرۋ ءۇشىن ءتيىستى مەملەكەتتىك ورگاندارعا باعىتتالادى. اكسيا 10- اقپانعا دەيىن جالعاسادى.