ۇلتتىق مۇرانى ۇلىقتاعان ميۋزيكل


وسىدان ءبىر عاسىرعا جۋىق ۋاقىت بۇرىن، ياعني 1936 -جىلى ماسكەۋدە وتكەن قازاق ونەرىنىڭ العاشقى دەكاداسى «قىز جىبەك» سپەكتاكلىمەن اشىلعان بولاتىن.
اراعا 81 جىل سالىپ «قازاقكونسەرت» مەملەكەتتىك كونسەرتتىك ۇيىمىنىڭ «استانا ميۋزيكل» تەاترى «ۇلى دالا تەاترى» جوباسى بويىنشا «قىز جىبەك» ەتنو- فولكلورلىق ميۋزيكلىن ۇسىندى. بۇل جولى ۇلكەن گاسترولدىك تۋرنە ماسكەۋ عانا ەمەس، ەۋروپانىڭ ءىرى- ءىرى بەس قالاسىن قامتىدى. 81 جىل بۇرىن كۇلاش، قانابەك، قۇرمانبەك، عارەكەڭدەر ارقىلى قالىقتاعان «قىز جىبەك» ەندى جاڭا عاسىرداعى تاۋەلسىز ۇرپاقتىڭ ۇنىمەن جاڭعىرىپ وزگەشە ورنەك تاپتى.

ەسەنسىڭ بە، ەڭسەلى ەۋروپا!

قازاق حالقىنىڭ ەڭ كونە مۇرالارىنىڭ ءبىرى بولىپ سانالاتىن «قىز جىبەك» ليرو- ەپوستىق داستانى – اڭىز ەمەس، تاريحي وقيعا، كەيىپكەرلەرى ومىردە بولعان ادامدار. جىردىڭ نەگىزگى كەيىپكەرلەرى – تولەگەن مەن جىبەك ءبىرىن- ءبىرى شىن سۇيگەن عاشىقتار بولعانىمەن، اكە باتاسىنان اتتاپ كەتكەن تولەگەننىڭ ءولىمى مەن جىبەكتىڭ قايعىلى تاعدىرى تالاي جانارعا جاس ۇيىرىلتپەي قويمايدى. جىبەك بەينەسى – سۇلۋلىق پەن اسەمدىكتىڭ نىشانى، رۋحاني ەسكەرتكىش. بۇل ساپار جۇزگە تارتا تەاتر ونەرپازدارىن عانا ەمەس، قازاق حالقىنىڭ عاسىرلار بويى قالىپتاسىپ، اتا- بابادان قاستەرلەنىپ كەلە جاتقان قاعيدالارىن، ءدىني نانىمىمەن جانە حالىق داستۇرىمەن بەكىگەن عۇرىپ- سالتىنىڭ، ءداستۇرى مەن ۇعىم- تۇسىنىكتەرىنىڭ ۇلتتىق سيپاتىن، مادەنيەتىنىڭ بيىك ورەسىن، كەڭ ءورىسىن، تاريحي- رۋحاني مۇراسىن، ياعني ۇلتتىق قۇندىلىقتارىن بىرگە الىپ كەلگەندىگىن ءبىر ءسات سەزىنگەندەي جاس ارتىستەر پاريج قالاسىنىڭ «Le Trianon» تەاترى ساحناسىندا ءبىر- ءبىرىنىڭ الاقانىنان قىسا ۇستاپ، شەڭبەر جاساپ ءۇنسىز تۇردى. بۇل ءبىر ۇلكەن جاۋاپتى سات، تاريحي كۇن! ۇلى ابايدىڭ «قاراڭعى تۇندە تاۋ قالعىپ» ءانىن «استانا ميۋزيكل» تەاترىنىڭ حورى اۋەلەتە شىرقاي باستادى. ەڭسەلى تەاتردىڭ ءزاۋلىم زالىنا قالىڭ جۇرت لاپ قويدى. «استانا ميۋزيكل» تەاترىنىڭ كوركەمدىك جەتەكشىسى اسحات ماەميروۆ ەۋروپا جۇرتشىلىعىمەن امانداسىپ، العى ءسوز سويلەۋ ءۇشىن ساحنا تورىنە كوتەرىلدى. جۇزىنەن قۋانىش ءارى تولقۋ بەلگىلەرى بايقالادى. «ءيا، جاراتۋشى يەم، ءوزىڭ جار بولا گور، مىنا بالاۋسا ۇجىم، ۇعىمتال ۇلدارىڭ مەن قىرمىزى قىزدارىڭدى قولداي گور» ، دەيمىز ىشتەي كۇبىرلەپ. قازاقستان رەسپۋبليكاسىنىڭ فرانتسياداعى ەلشىسى جان عاليەۆ مىرزانىڭ سوزىنەن كەيىن شىمىلدىق اشىلىپ، ۇلى دالا ونەرى جىبەكتەي ەسىپ، جان تەربەدى.

پاريجدەگى پرەمەرا

ەۋروپالىق تەاتر ونەرى مىڭداعان پەسالاردى تۋدىردى. بۇل تەاتردىڭ وزگەشە ءتيپى. جانە بۇل تەاتردا سيۋجەت پەن اۆتور ءاردايىم ماڭىزدى رولگە يە. ال «قىز جىبەككە» ەۋروپالىق تەاتردىڭ تاسىلدەرىن ەنگىزۋ مۇمكىن بە؟ جانە ەۋروپا جۇرتشىلىعىنا ونىڭ كەرەگى قانشا؟ عابيت مۇسىرەپوۆتىڭ ليبرەتتوسى مەن ەۆگەني برۋسيلوۆسكيدىڭ رۋحاني مۇراسىنان الىس وتاۋ تىگۋ مۇمكىن دە ەمەس. سول سەبەپتى بىلىكتى رەجيسسەر، قازاقستاننىڭ ەڭبەك سىڭىرگەن قايراتكەرى اسحات ماەميروۆ برۋسيلوۆسكي جۇيەلەگەن «قىز جىبەك» وپەراسىن ەتنو- فولكلورلىق انسامبلگە لايىقتاپ قايتا وڭدەپ، وركەستروۆكاسىن ەتنو- مۋزىكانت باۋىرجان اقتايەۆقا سەنىپ تاپسىرعان بولاتىن. ال بيلەرىن قويعان بالەتمەيستەرلەر – انۆارا سادىقوۆا مەن ۋاليتبەك سيازبەك.

شىمىلدىق اشىلعان مەزەتتە قىلقوبىزدىڭ سارىنىمەن قازاق دالاسىن كوز الدىڭا ەلەستەتەتىن «استانا سازى» ءانسامبلىنىڭ ءارتىسى ايان وماروۆتىڭ ورىنداۋ شەبەرلىگىنە ءتانتى بولماسقا شاراڭ جوق. ءانسامبلدىڭ بارلىق ورىنداۋشىلارىنىڭ ساحناعا شىعار الدىندا، ارەرستسەنادا ورنالاسقان «تىلەك اعاشى» نەمەسە «سەنىم سيمۆولى» سانالاتىن ماۋەلى بايتەرەككە شۇبەرەك بايلاۋى ساحناعا، ءوز حالقىنىڭ مادەني مۇراسىنا ادالدىعىن دالەلدەيتىن كورىنىستەي سەزىلدى. زارلى داۋىسى قوبىز سارىنىمەن ۇندەسە ورىلگەن قازاقستاننىڭ ەڭبەك سىڭىرگەن قايراتكەرى سايلاۋ قاميەۆتىڭ جىراۋلىق ونەرىنەن باستاۋ العان «قىز جىبەك» ەتنو- فولكلورلىق ميۋزيكلىنىڭ كوركەمدىك ۇلگىسى، دالا تەاترىنىڭ ەلەمەنتتەرى نەگىزىندە جانر تابيعاتىنا ساي ايشىقتى بەزەندىرىلۋى ارتىستەردىڭ شىنايى شەبەرلىگىمەن ەركىن قابىسىپ تۇردى. «استانا سازى» ءانسامبلىنىڭ سۇيەمەلدەۋىمەن ساحنادان ەسكەن تابيعي ءۇن، عاجاپ مۋزىكا جۇرتشىلىقتى ايرىقشا ءبىر ادەمى اسەرگە، عاجاپ ءبىر شاتتىققا بولەدى. اق ماتامەن اۆانستسەنانى جاۋىپ، باياۋ جىلجىپ بارا جاتقان جىراۋ مەن تۇيەلەر كوشى (قۋىرشاق تەاترىنىڭ ەلەمەنتتەرى پايدالانىلعان) عاسىرمەن بىرگە كوشىپ بارا جاتقانداي اسەر قالدىرادى.

ساحنادا – «قىز جىبەك» ، زالدا – ماري كريستين سيرەجول، لاشا چxارتيشۆيلي، داۆيد چحاۆليس سىندى بەلگىلى سىنشىلار. جاس تەاتردىڭ بەتالىسىن بايقاعىسى كەلگەن ەۋروپالىق كىرپياز كورەرمەن كوپ- اق. سوناۋ XVII عاسىردان باستاۋ العان ليرو- ەپوستىق جىر، ءبىر دەممەن، ادەمى ىرعاقپەن ءوربىپ وتىراتىن فولكلورلىق سيۋجەت اڭىزدار الەمىنەن كەرەمەتتەي سىر شەرتتى. جىبەك – تەك ءوزى سۇيگەن تولەگەنىنىڭ عانا ەمەس، حالقىنىڭ ار ۇياتى، سۇلۋلىعى مەن اقىل- پاراساتى، ادالدىقتىڭ سيمۆولى. رەجيسسەر ۇستانعان نەگىزگى تۇجىرىم وسىعان سايادى. سۇيگەنىنىڭ ارتىنان ءوز- وزىنە قول جۇمساۋى ەمەس، قازاق ايەلىنىڭ جارعا دەگەن ادالدىعىن، ۇلى سەزىمىن ولە- ولگەنشە وزگەگە ايىرباستاماي كۇن كەشەتىندىگىن قولىنداعى گۇلدى ءۇزۋى ارقىلى دالەلدەيدى. ەۋروپالىقتاردىڭ مۇنى اۋدارماسىز تۇسىنۋىنە اكتەرلىك ءانسامبلدىڭ ءمىنسىز ميميكاسى، قيمىل- قوزعالىسى ۇلكەن اسەر ەتكەنى ءسوزسىز.

ىزدەنىس يىرىمدەرى

جاس اكتريسا ينابات ريزابەكوۆانىڭ انشىلىك قابىلەتى مەن ساحناداعى تارتىمدىلىعى، تولەگەنمەن ديالوگى، ماتىنگە زەيىندىلىگى، ءار ءسوزدى جەتكىزە ءبىلۋى اكتريسانىڭ بولاشاعىنان زور ءۇمىت كۇتتىرەدى. قويىلىمداعى قايعى- قاسىرەت كورىنىستەرى دە قازاق حالقىنىڭ ءدىني- نانىم سەنىمدەرىنە نەگىزدەلگەن. ءتانىن جەرگە قالدىرىپ، جانى اق پەرىشتەلەرمەن سامعاي ۇشۋى، تولەگەننىڭ ءتانىن قۇزعىندارعا جەم قىلماي جىراۋدىڭ جوقتاۋ ارقىلى الىپ كەتۋى، ت. ب. ساتتەر اتا- بابالارىمىزدىڭ اسىل قاسيەتتەرىنەن سىر شەرتەدى. جىبەكتىڭ كورگەن ءتۇسىن «اققۋ» ءبيى ارقىلى بايلانىستىرۋ رەجيسسەر تاراپىنان لايىقتى شەشىم تاپقان. قازاق حالقىنىڭ ءتۇس جورۋ فيلوسوفياسىنان وي قوزعايدى.

تولەگەن رولىمەن جارق ەتكەن ورازالى يگىلىك تولقۋعا، تەبىرەنۋگە بەيىم ورىنداۋشى. ول ءرول تابيعاتىن ەركىن سەزىنەدى. كەۋدەسىنە وق ءتيىپ جارالانعان تولەگەننىڭ ارياسىن ورىنداپ جاتىپ، ءرول تابيعاتىنان، وقيعا اياسىنان اجىراماي جەتكىزەدى. شىرقاتا ءان سالىپ، جىبەكتىڭ سۇلۋلىعىنا تامسانا قادالعان كوزى كورەرمەندى بەيجاي قالدىرمايدى. ساحنالىق سەرىگى (راسۋل ۋسمانوۆ) ەكەۋىنىڭ جامبى اتۋ باسەكەسىندەگى رۋحتى ءبيدى ورىنداۋى جاس اكتەرلەردىڭ مۇمكىندىكتەرىن مولىنان اڭعارتتى.

راسۋل ۋسمانوۆ – ىزدەنگىش اكتەر. «رەجيسسەر باعىت- باعدار بەرسە، اكتەر ءارى قاراي ءوزى ىزدەنۋى كەرەك» دەگەن قاعيدانى بەرىك ۇستانعان راسۋل كەسكىندەگەن رولىنە ءار جولى تۇرلىشە جولمەن كەلدى. دالانىڭ ەركىن جورتقان كوك ءبورىسىن سان الۋان ويىن ورنەگىمەن وزىنشە قورعاپ شىقتى. قازاقستاننىڭ ەڭبەك سىڭىرگەن قايراتكەرى اينۇر بەرمۇحامبەتوۆا (قامقا) ، جاس اكتەرلەر دارىن شىنىبەك (بازارباي) ، ارمات اماندىقوۆ (شەگە) ، ءساندى قارشالوۆا ء(دۇريا) ، گۇلدانا ءابدىسادىق (باتسايى) تاڭشولپان نۇرتىلەۋ قىزى (قارلىعاش) ، ازامات زامزارحانوۆ (سانسىزباي) ويىن ورنەكتەرى قويىلىمنىڭ كوركەمدىك بولمىسىن ارلەي ءتۇستى.

ميۋزيكلدىڭ ءساتتى شىعۋىنا كوپشىلىك ساحناسىنىڭ (ماسسوۆكا) كومەگى زور. ورىندالعان حورلار، ۇلتتىق بي مەن كۇمبىر قاققان كۇيدەن بولەك، «ايتىس» ، «كۇرەس» ، «ورتەكە» كۇيى سىندى جەكە كورىنىستەرگە توقتالا كەتۋگە ءتيىسپىز. «قازاقكونتسەرت» مەملەكەتتىك كونتسەرتتىك ۇيىمىنىڭ ءسوليسى، ءداستۇرلى ءانشى اسقار مۇقيات پەن جاس اكتريسا ماقپال دۇيسەننىڭ داۋىسىنا ەلىتپەگەن ەۋروپالىق بولدى ما ەكەن، ءسىرا. ماماندىعى ءداستۇرلى ءانشى بولعانمەن ا. مۇقياتتىڭ اكتەرلىك قابىلەتى جوعارى. ال ماقپالدى اكتريسا دەمەسەڭىز، شىنتۋايتىندا ول ناعىز بۇلبۇل اۋەزدى ءانشى. كەڭ دياپازوندى قوس ءانشى ەركىن كوسىلىپ ەپيزودتىق كورىنىستى ەستەن كەتپەس قىز- جىگىتتىڭ ايتىسىنا اينالدىردى. بىردە جىگىتتەرمەن بىرگە اكروباتيكالىق تريۋكتەرمەن تاڭعالدىرسا، ەندى بىردە ەكى ادامنىڭ كۇرەسىن ءبىر ءوزى بەينەلەيدى. تولەگەندى قيماي شىعارىپ سالىپ تۇرعان سانسىزبايدى وينايتىن ابىلاي ءسالىمحانوۆتىڭ سان قىرلىلىعى ەۋروپالىقتاردى ەلەڭ ەتكىزدى. «استانا سازى» ءانسامبلى «ورتەكە» كۇيىن ورىنداعاندا، ءۇش ورتەكەنىڭ كۇيگە ىرعالا بيلەۋى ەتنو- فولكلورلىق ميۋزيكلدىڭ ەرەكشەلىگىن ناقتىلاعانداي. جالىنداعان جاس ونەرپازداردى كورەرمەن كوپكە دەيىن قول شاپالاقتاپ، قيماي قوشتاستى.

ساراپشىلار لەبىزى

ۇلت تەاترلارىن ءتۇپ نۇسقاسىنان تانيتىن پروفەسسور ماري كريستين سيرەجول، ونەرتانۋ دوكتورى لاشا چxارتيشۆيلي، تەاترتانۋشى داۆيد چxاۆليس قويىلىمعا بايلانىستى ءوز ويلارىن ورتاعا سالدى. داۆيد چxاۆليس: «بۇل ءسوز جوق تاماشا سپەكتاكل. ءبىز ودان قازاق حالقىنىڭ وتكەن تاريحى مەن باي مادەنيەتىن تانىپ- بىلدىك. كەيىپكەرلەردىڭ ىشكى جان تەبىرەنىسىن جەتكىزە بىلۋدە تەاتردىڭ جاس ارتىستەرى ەڭبەگىن ايرىقشا اتاپ وتكەن ءجون. ءوز باسىم مۇنداي اسەم تۋىندىنى كورگەنىمە ريزامىن. فرانتسۋز حالقىنىڭ اتىنان سىزدەرگە كوپ راحمەت!» ، دەسە، سوربوننا ۋنيۆەرسيتەتىنىڭ پروفەسسورى، بەلگىلى تەاترتانۋشى ماري كريستين سيريجول: «قازاق حالقىنىڭ وتە باي ۇلتتىق مادەنيەتىنە كۋا بولدىم. بۇل سپەكتاكل ارقىلى ءبارىمىز قازاق دالاسىنا ساپار شەگىپ قايتقانداي بولدىق. ءارتۇرلى اسپاپتاردا ورىندالعان اسەرلى اۋەندەر مەن تابيعي داۋىستا شىرقالعان اندەر جۇرەك تەبىرەنتتى» ، دەدى.

ال تەاترتانۋشى لاشا چحارتيشۆيلي: «مەن «استانا ميۋزيكل» تەاترىنىڭ بولاشاعى زور دەپ ويلايمىن. سەبەبى ولاردىڭ مۇمكىندىگى شەكسىز. ءارتۇرلى باعىتتا ونەر كورسەتە الادى. بۇل سپەكتاكل استانا تەاترلارىنىڭ دەڭگەيىن، اسىرەسە جاس ۇجىمنىڭ قارىم- قابىلەتىن كورسەتىپ بەردى. فولكلور تاقىرىبىن بۇگىنگى كۇنمەن قابىستىرىپ، وعان جاڭاشا ءۇن، ەكپىن، ىرعاق، استار، تۇسپالدار ەنگىزۋ – رەجيسسەردىڭ باتىل قيمىلىن بايقاتادى» ،   دەپ پىكىرىن تۇيىندەدى.

انشلاگپەن وتكەن ەكى ساعات پەن ەۋروپا جۇرتشىلىعىنىڭ قوشەمەتى ەستەن كەتپەيدى. «قىز جىبەك» قويىلىمى پاڭ ءپاريجدى تاڭداي قاقتىردى. ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى مەن «جاھاندىق الەمدەگى زاماناۋي قازاقستاندىق مادەنيەت» جوباسى اياسىندا ەۋروپانىڭ قالالارىندا ونەر كورسەتەتىن «استانا ميۋزيكل» تەاترىنىڭ ساپارى فرانتسيانىڭ استاناسى پاريجدەن باستالىپ، ءارى قاراي كانن، بريۋسسەل، ۆەنا، بەرليندە جالعاسىن تاپتى.

كورەرمەن كوزىمەن.. .

«استانا ميۋزيكل» تەاترى، «استانا سازى» ەتنو- فولكلورلىق ءانسامبلى كانن قالاسىنداعى «Croisettە» ، بريۋسسەلدەگى «Brussels 44 center» ، ۆەنالىق «MuTh theatr» ساحنالارىندا زور تابىسپەن ونەر كورسەتتى. شىعارماشىلىق ۇجىم قازاقستاننىڭ ۇلتتىق ونەرىنىڭ ۇزدىك ۇلگىلەرىن الەمگە تانىتتى. ء«تىل كەدەرگىلەرىنە قاراماستان، ماعان وتە قاتتى ۇنادى. مەن ەشقاشان مۇنداي كۇيدى باستان كەشكەن ەمەسپىن. ءبارى دە وتە شەبەر جانە تەرەڭ ويلاستىرىلعان. دراماتۋرگيا دا، كيىمدەر دە ۇنادى» ، دەيدى قويىلىمعا ارنايى كەلگەن حالىقارالىق كانن كينوفەستيۆالىنىڭ پرەزيدەنتى كلەر- اننە رەيكس.

– العاشقى كورىنىستەن باستاپ- اق سپەكتاكل مەنى وزىنە باۋراپ اكەتتى. تەاترداعى جۇمىسىم ەسىمە ءتۇستى. «كوزىمنىڭ قاراسىن» سپەكتاكل سوڭىندا ارتىستەرمەن بىرگە ايتتىم. كەرەمەت قۇرام ەكەن، ويىن قانداي عاجاپ! «استانا ميۋزيكل» تەاترىنا وسىنداي تاماشا تۋىندى ۇسىنعانى ءۇشىن ريزاشىلىعىم شەكسىز، – دەيدى ۆەنا قالاسى سيمفونيالىق وركەسترىنىڭ مۋزىكانتى ماريا ورينينسكايا.

– مەن تانىسىپ ۇلگەرگەن بارلىق كورەرمەن اتىنان بريۋسسەل ساحناسىندا وسىنداي تۋىندىنىڭ ساحنالانۋىنا ۇلەس قوسقان ۇيىمداستىرۋشىلارعا باسىمدى يەمىن. ۇلتتىق سالت- ءداستۇردى، ۇلتتىق بايلىققا اينالعان قۇندىلىقتى تانىستىرۋ ماڭىزدى دەپ ەسەپتەيمىن. سىزدەردىڭ ۇلكەن ەلدەرىڭىزدىڭ باي داستۇرىمەن تانىسىپ، قۋانىپ جاتىرمىز. بۇل كوز قاراشىعىنداي ساقتالۋى ءتيىس ءىنجۋ- مارجان دەپ سانايمىن، – دەپ پىكىر ءبىلدىردى مادەنيەت جانە ءبىلىم سالاسىنداعى حالىقارالىق جوبالار قاۋىمداستىعىنىڭ باسشىسى، كورەرمەن سۆەتلانا پوپوۆا.

ۆەنالىق تەاتردىڭ ديرەكتورى وتتو دجانكوۆيچ: «قىز جىبەك» سپەكتاكلى قازاقستاندىق جاس تەاتردىڭ ءسوزسىز جەتىستىگى. وعان ادام تولى زال، كورەرمەننىڭ شىنايى ىستىق ىقىلاسى تولىق دالەل. سپەكتاكل قازاق تىلىندە جۇرگەنمەن، اۋدارما كەرەك بولماي قالدى. ويتكەنى مەن جۇرەگىممەن ءتۇسىندىم. ارتىستەر مەن كوماندانىڭ كاسىبي شەبەرلىگىنە ءتانتى بولدىم» ، دەپ ويىن قورىتىندىلادى.

كەرۋەن كوشى كۇتىلگەن كۇن

ۆەنا كوگىنە كوتەرىلگەن ۇشاق كوزدى اشىپ- جۇمعانشا تەاتر ونەرىنىڭ وتانى سانالاتىن ماسكەۋ شاھارىنا جەتكىزدى. ەش الاڭسىز قوناقۇيىمىزگە كەلىپ جايعاستىق. «مودەرن» تەاترىنىڭ زالىندا ءوتىپ جاتقان دايىندىق بۇرىنعىدان وزگەشە ءوربىدى. رەجيسسەر اسحات ماەميروۆ پەن بالەتمەيستەر ۋاليتبەك سيازبەك ميزانستسەنالاردى باسقاشا باعىتقا اكەلىپ، شارتتىلىق زاڭىنا باعىندىرۋدا. ساحنادا بوس كەڭىستىك. ماۋەلى اعاش تا، قىز- كەلىنشەكتەر باسار تەكەمەتتەر دە، تۇيەلەر كوشىن بەينەلەيتىن اق ماتا دا، ورتەكەلەر دە جوق. «ورتەكەنىڭ» ورنىنا كۇي تارتىس ويلاستىرىلىپتى. «قىز جىبەك» ەتنو- فولكلورلىق ميۋزيكلىنىڭ ەڭ باستى ەرەكشەلىگى – ساپالى تىگىلگەن كوستيۋم، ياعني كيىم ۇلگىلەرى. الما سىربايەۆانىڭ سۋرەتكەرلىك شەبەرلىگىنەن تۋىنداعان كيىمدەرى ءساندى ءارى ىقشامداپ ادەمى پىشىلگەن. كوپ قىزداردىڭ ىشىنەن «گاككۋ» انىنە سالعان قىزىل كويلەكتى جىبەك وقشاۋ كورىنەدى. ال تولەگەننىڭ الدىنان شىعار ءساتى، اق ساۋكەلەسى، ۇستىندەگى ۇلبىرەگەن اق كويلەگى ماسكەۋ جۇرتشىلىعىن تامساندىردى. جاس اكتريسانىڭ ءان ورىنداۋ شەبەرلىگى دە جوعارى دەڭگەيدە. تولەگەن مەن جىبەكتىڭ ءبىر- بىرىنە دەگەن كىرشىكسىز ماحابباتى ينابات پەن ءورازالى تاندەمىنەن قاپىسىز تانىلدى.

قازاق كينوسىندا بەكەجان ءرولى ارقىلى ءاسانالى ءاشىموۆتىڭ ونەرى بيىك تۇر دەسەك، تەاتردا اسىلبولات سماعۇلوۆ باستاعان ساحناگەرلەر جاسىنداي جارقىلداعان. بەكەجان ءرولىن راسۋل ۋسمانوۆ نانىمدى جەتكىزدى. ءتىل، ميميكا، پلاستيكا – ءبارى دە بەكەجاننىڭ بەينەسىن اشۋعا جۇمىلدىرىلدى. سول سەبەپتى دە، ۋسمانوۆتىڭ بەكەجانىندا وزگەشە ىرعاق بار. اكتەر ويىنىندا وي مەن ءىس- ارەكەت تۇتاستىعى، شىنايىلىق، ۇيلەسىمدىلىك ۇستەمدىك قۇرىپ، بەكەجاننىڭ وكىنىشى، ەسىنەن ايرىلۋ ساتتەرى وتە شىنايى شىقتى. پسيحولوگيالىق كۇيزەلىسكە تۇسكەن بەكەجاننىڭ كەسكىن- بولمىسى ءدال تابىلدى. ونىڭ جىبەككە دەگەن قۇشتارلىعى مەن سۇيىسپەنشىلىگى، تولەگەندى قياناتقا قيمايتىن پايىم- پاراساتى ايقىن كورىنىپ تۇردى.

قويىلىمدا جارقىراپ كورىنەتىن تۇلعانىڭ ءبىرى – قامقا بەينەسى. ونى تۇشىمدى جەتكىزۋگە قازاقستاننىڭ ەڭبەك سىڭىرگەن قايراتكەرى اينۇر بەرمۇحامبەتوۆا كوپ ەڭبەك ءسىڭىردى. بازاربايعا: «بەر باتاڭدى بالاڭا» دەپ جالبارىناتىن ابزال انانىڭ جان داۋىسىن جەتكىزۋ ءۇشىن وراسان زور تەر توككەن اكتريسانىڭ شەبەرلىگى ەرەكشە اسەر قالدىردى.

«كۇي تارتىسى» مەن «اقىندار ايتىسى» قويىلىمداعى ەرەكشە ساحنالاردىڭ بىرىنە اينالعانى انىق. «استانا سازى» ءانسامبلىنىڭ ارتىستەرى ءبىرىن- ءبىرى جالعاي وتىرىپ، «بالبىراۋىن» ، «بالاميشكا» ، «بوگەلەك» كۇيلەرىن كۇمبىرلەتكەندە ماسكەۋ جۇرتشىلىعى قوشەمەتتەپ قول سوقتى. اسقار مۇقيات اسپانداتا شىرقاعان ۇكىلى ىبىرايدىڭ « قىزىلاسىق» ءانى كوكەيگە كوركەم سەزىم ۇيالاتتى.

.. .ال سول كۇنى ۆەنادا قويىلىمنىڭ دەكوراتسياسى مەن رەكۆيزيتتەرى تيەلگەن ۇشاق بەلگىسىز ءبىر سەبەپتەرمەن مەجەلى ۋاقىتىنان كەشىگىپ قالعان بولاتىن.

ميراس ءابىل،
«استانا ميۋزيكل» » تەاترى ادەبيەت ءبولىمىنىڭ مەڭگەرۋشىسى