حات قورجىن


زەينەتتەگى مەكتەپ ديرەكتورى نەگە كوپ؟

سىنىپ جوعارىلاعان سايىن وقۋ باعدارلامالارى دا كۇردەلىلەنە تۇسەتىنى انىق. ال ورتا مەكتەپتەن كەيىنگى وقۋدى تەك دارىندىلارى عانا جالعاستىراتىن ۋاقىت كەلە مە دەپ ويلايمىن. بولاشاقتى ويلاساق ونى باسقاراتىن ادامداردى دا دۇرىس تاڭداۋعا باسا ءمان بەرۋىمىز كەرەك.

بۇل كۇندە الماتى وبلىسىندا عانا ەمەس، جامبىل، وڭتۇستىك قازاقستان وبلىستارىندا دا ورتا مەكتەپتەردى الدەقاشان زەينەتكەرلىككە شىققان، جەتپىستىڭ ار جاق، بەر جاعىنداعى ادامدار باسقارىپ وتىر. ولاردىڭ ىشىندە ناعىز جاناشىر پەداگوگتارى دا بار شىعار؟ .. ءبىراق ادامنىڭ قابىلەتى دە شەكتەۋلى ەمەس پە؟ ويتكەنى سيرەك بولسا دا، زەينەتكەرلىككە شىققان كەيبىر مۇعالىمدەردىڭ جۇيكەسى سىر بەرە باستايتىنىنا كۋا بولىپ ءجۇرمىز. ءوز باسىم، زەينەتكە شىققاننان كەيىن ەر ادامدار ءۇش جىل مەكتەپ ديرەكتورى بولىپ، 66 جاسقا دەيىن قىزمەت ىستەسىن. ودان ارعىسى ارتىقتاۋ دەپ ويلايمىن.

ويتكەنى بۇل كۇندە جەمقورلىق جونىنەن ءبىلىم سالاسى دا ءجيى سىنالۋدا. وسىنداي وي ايتىلعان سايىن جەتپىستىڭ ار جاق، بەر جاعىنداعى مەكتەپ ديرەكتورلارىن كورگەن كەزدە اۋداندىق وقۋ ءبولىمىنىڭ نەمەسە وبلىستىق ءبىلىم باسقارماسىنىڭ باسشىلارى ء«بىر نارسە الۋ ءۇشىن ۇستاپ ءجۇر- اۋ وسىلاردى!» دەپ ويلاۋعا ءماجبۇر بولامىز. زەينەتكە الدەقاشان شىقسا دا ولار جىلى ورنىنان كەتكىسى كەلمەيدى.

ەلىمىزدە ولاردىڭ ورنىن باساتىن جاستار قاي اۋىلدا، قاي جەردە بولسىن بار. مەكتەپ مەملەكەتتىك مەكەمەگە جاتاتىن قازىنالىق كاسىپورىن. ەندەشە مەملەكەتتىك تۇرعىدان رەتتەلىپ وتىرسا ەش ارتىق بولمايدى. سىزدەر قالاي ويلايسىزدار، اعايىن؟ ..

مارات قاشقىنباەۆ
الماتى وبلىسى

.. .ريزاشىلىعىن جەتكىزەدى

سۋ تاسقىنىنان قورقىنىش جوق

«سۋ – ءتىلسىز جاۋ» دەمەكشى، اۋىلىمىز مول كەلگەن سۋدان كوپتەن بەرى قيىندىق كورىپ كەلە جاتقان بولاتىن. ءتىپتى تۇرعىن ۇيلەرىمىزدى سۋ الىپ كەتە مە دەپ قاتتى قاۋىپتەنەتىنبىز. شۋدىڭ سۋى كەي جىلدارى كوپ كەلىپ، مازامىزدى الاتىن. ءقازىر ول ءقاۋىپ سەيىلدى. سوزاق اۋدانىنىڭ اكىمى س. پولاتوۆتىڭ ىقپالىمەن «ستەپنوي- رۋ» كەن ورنىنىڭ باسشىلىعى اۋىلىمىزعا كولىكتەن كومەك بەرىپ، ون كۇن بويىنا اۋىلدىڭ ىرگەسىندەگى دامبانى كوتەرۋگە قولعابىس بەردى.

ەندى سۋ تاسقىنىنا تولىق قارسى تۇرا الامىز دەپ ويلايمىز. اۋىل اكىمىنىڭ مىندەتىن اتقارۋشى ءاسيما مىرزابەكوۆا يگى ءىستىڭ باسى- قاسىندا ءجۇردى. تراكتور جۇرگىزۋشىسى عالىمجان شوقانوۆ ون كۇن بويى دامبانى بيىكتەتۋ جۇمىسىمەن اينالىستى. تاپسىرمانى وتە تىڭعىلىقتى جۇرگىزگەنىنە اۋىل تۇرعىندارى ريزا بولدىق. اۋدان اكىمىنە، كەن باسقارماسىنىڭ باسشىلىعىنا العىسىمىز شەكسىز.
اۋىل توڭىرەگىنە قانداي سۋ كەلسە دە ەندىگى جەردە قورقىنىش جوق. ۇيقىمىز تىنىش بولاتىن بولدى.

تورەگەلدى جاپاباي ۇلى،
اۋىلدىق ارداگەرلەر كەڭەسىنىڭ ءتوراعاسى

وڭتۇستىك قازاقستان وبلىسى

.. .ۇلگى تۇتادى

اجەلەر بەسىككە سالۋدى ۇيرەتەدى

حالقىمىزدىڭ ەجەلگى سالت- داستۇرلەرىنىڭ ءبىرى – بالانى بەسىككە بولەۋ. الايدا ونىڭ قالاي ىستەلەتىنىن كەيبىر بۇگىنگى جاس انالار بىلە بەرمەيدى. مۇنداي ولقىلىقتىڭ ورنىن تولتىرۋ ءۇشىن اقتوبە قالالىق مەشىتىنىڭ جانىنان قۇرىلعان اجەلەر مەكتەبىنىڭ مۇشەلەرى وسى شاپاعاتى مەن پايداسى مول ءىستى قولعا الدى. ءبىرىنشى كەزەكتە ولار بەسىككە سالۋ ءسابيدىڭ دەنساۋلىعى مەن تازالىعىنا كوپ پايداسىن تيگىزەتىنى جونىندە ايتىپ بەرۋدى ادەتكە اينالدىرعان. سونداي- اق بوبەكتىڭ بوي ءبىتىمىنىڭ تىك، ءتۇزۋ ءوسۋى ءارى مازاسىزدانباي تىنىش ۇيىقتاۋى ءۇشىن دە بەسىكتىڭ سەپتىگى مول.

مەكتەپتە ءسابيدىڭ ەڭ العاش كيگەن يتكويلەگى، ازان شاقىرىپ ات قويۋدىڭ نەگە كەرەكتىگى، بالانى قىرقىنان شىعارۋدىڭ پايداسى جونىندە دە تۇسىنىكتەر بەرىلەدى. ايتالىق ءسابيدىڭ ەڭ العاش ۇستىنە كيگىزىلگەن كيىمنىڭ يتكويلەك اتالۋى ونىڭ قۋاتتى، قايراتتى بولىپ ءوسسىن دەگەن يگى تىلەكتىڭ تۋىنداعانىن ەستىگەندە تىڭداۋشىلار تاڭدانىپ قالدى. بۇعان قوسا حالقىمىزدىڭ ۇعىم- تۇسىنىگىندە نارەستەنىڭ يتكويلەگىن ءسابي سۇيە الماي جۇرگەن قىز- كەلىنشەكتەرگە ىرىمداپ بەرۋ ءداستۇرى بار ەكەنى دە ايتىلىپ ءجۇر.

تالشىن قوجاعمەتوۆا،
اقتوبە قالالىق ايەلدەردىڭ ساۋات اشۋ
ورتالىعىنىڭ جەتەكشىسى

.. .ماقتان ەتەدى

ونەگە بولارلىق ورەن

وردا بۇزار جاسقا جەتكەن باقىتجان تاشەنوۆتىڭ كۇرەسكە تولى عۇمىرى ونەگە دەسەك تە بولادى. جاسىنداي جارقىراعان باقىتجان نەبارى 14 جاسىندا جەكە كونتسەرتتىك كەشىن بەرىپ، جۇلدىزى جانعان بالا ەدى. الايدا 15 جاسىندا قان اۋرۋىنا شالدىعىپ، بوزبالا شاعىن لەيكەميامەن كۇرەسۋمەن وتكىزدى. اۋىر دەرتپەن ارپالىسىپ ءجۇرىپ، ورتا مەكتەپتى دە ويداعىداي اياقتاعان باقىتجان حيميا تەراپيانىڭ بارلىق ساتىسىنان ءوتتى.

ءبىراق ساۋلەلى ەمنىڭ سالدارىنان ونىڭ جامباس سۇيەكتەرى ءمۇجىلىپ، ەندو- پروتەزدەۋ وتاسى جاسالدى. ونىڭ ۇستىنە ىشكى مۇشەلەرى – باۋىر، بۇيرەك، اسقازانى دا سىر بەرىپ، ينفۋزيالىق تەراپيادان ءوتتى. جانىن جەگىدەي جەگەن اۋرۋعا مويىماعان جىگىت جوعارى وقۋ ورنىنا ءتۇسىپ، زاڭگەر ماماندىعىن الىپ شىقتى. تاپقان- تايانعانىن ۇلىنىڭ ەم- دومىنا جۇمساپ جۇرگەن اتا- اناسىنا سالماق سالماۋ ءۇشىن باقىتجان تويلاردا ءان شىرقاپ، اقشا جيناپ، وقۋ اقىسىن دا ءوزى وتەگەن ەكەن.

«ازاماتتارعا ارنالعان ۇكىمەتتىڭ» قاراعاندى وبلىسى بويىنشا فيليالىندا 2012 -جىلدان بەرى ابىرويمەن قىزمەت ەتىپ كەلە جاتقان باقىتجان ءقازىر ءبولىم باسشىسىنىڭ ورىنباسارى عانا ەمەس، ۇجىمنىڭ ۇلگى تۇتار ازاماتى، دەپارتامەنتتەگى مۇمكىندىگى شەكتەۋلى قىزمەتكەرلەردىڭ كوشباسشىسى. «حالىققا قىزمەت كورسەتۋ ورتالىعىنا ورنالاسقاننان بەرى مەنىڭ ءومىرىمنىڭ ەڭ جاۋاپتى كەزەڭى باستالدى. سەبەبى ءوزىمنىڭ ەلىمە پايدا تيگىزەر جۇمىسقا ورنالاستىم، مەنىڭ ەڭ باستى ماقساتىم مەملەكەتىمە پايدامدى تيگىزۋ. بۇل جەردە قىزمەت الۋشىلاردىڭ «راحمەت» دەگەن ءبىر ءسوزى مەنى جىگەرلەندىرىپ، ومىرگە دەگەن سۇيىسپەنشىلىگىمدى ارتتىرا تۇسەدى» ، – دەيدى ول.

اسەل ميزام قىزى
استانا

.. .باتاسىن بەرەدى
كارىگە قۇرمەت – بالاعا مىندەت

قامقورلىق پەن قايىرىمدىلىق ادام بالاسىنىڭ بويىنداعى ىزگى قاسيەتتەر. «كارىگە قۇرمەت – بالاعا مىندەت» دەيدى، حالقىمىز. شەتپە جاستار ورتالىعىنىڭ باستاماسىمەن قولعا الىنعان «جاقسىلىق جاسايىق» قايىرىمدىلىق شاراسى اۋدان ورتالىعىندا ءساتتى جۇزەگە اسىپ كەلەدى. وتكەندە شەتپەلىك جاستار تىل جانە ەڭبەك ارداگەرى تامارا ەمزەيەۆانىڭ ۇيىنە باعىت الدى. تامارا اجەي وسى كۇنگە دەيىن مۇگەدەك جولداسىن ءبىر ءوزى باعىپ، اسىراپ كەلدى. جۋىردا جولداسى سەرىكبول ەمزەيەۆ قايتىس بولدى. شەتپەلىك بەلسەندى جاستار تامارا اجەيدىڭ ءۇيى مەن قورا اينالاسىن كۇل قوقىستان تازالاپ، جاقسىلىقتارىن ايامادى. جاستارعا ءدان ريزا بولعان قارت اجەي العىسىن ءبىلدىردى.

تەك شەتپە سەلوسى اۋماعىندا عانا ەمەس، سونىمەن قاتار قوسبۇلاق، وندى، ۇشتاعان، جىڭعىلدى اۋىلدارىنىڭ جاستارى دا بەلسەندىلىك تانىتۋدا.

اللابەرگەن قونارباەۆ
ماڭعىستاۋ وبلىسى