الماتىدا بىلىكتى  كينولوگتار باس قوسقان دوڭگەلەك ۇستەل ءوتتى

الماتىداعى ايماقتىق كينولوگيالىق ورتالىقتا كەدەن سالاسى قۇرىلىمدارىنىڭ باسشىلارى سونداي- اق وتاندىق جانە شەتەلدىك عالىمداردىڭ قاتىسۋىمەن «حالىقارالىق كەدەندىك باقىلاۋ جۇيەسىندەگى زاماناۋي تەحنيكالىق قۇرالدار مەن قىزمەتتىك يتتەر» تاقىرىبىندا دوڭگەلەك ۇستەل ءوتتى. اقپاراتتىق- اعارتۋشىلىق باعىتتاعى باسقوسۋ دۇنيەجۇزىلىك كەدەن ۇيىمىنىڭ قۇرىلعان كۇنىنە وراي ۇيىمداستىرىلىپ وتىر.
دوڭگەلەك ۇستەل جۇمىسى دكۇ باس حاتشىسى كۋنيو ميكۋريانىڭ بەينە قۇتتىقتاۋىنان باستالدى. ول بارلىق قاتىسۋشىلاردى  دۇنيەجۇزىلىك كەدەنشىلەر كۇنىمەن  قۇتتىقتاپ،   قازىرگى كەزەڭدە كەدەن ورگاندارىنىڭ كۇندەلىكتى قىزمەتى بارىسىندا كينولوگيالىق قىزمەتتىڭ وزەكتىلىگى ەشقانداي كۇمان تۋدىرمايتىنىن اتاپ ءوتتى. باسقوسۋ بارىسىندا «كەدەندىك باقىلاۋدى جۇرگىزۋ كەزىندە قىزمەتتىك يتتەردى قولدانۋ» ، «كەدەندىك باقىلاۋدى جۇرگىزۋ كەزىندە زاماناۋي تەحنيكالىق قۇرالداردى پايدالانۋ جانە جاڭعىرتۋ» ، «ق ر كەدەن ورگاندارى  كينولوگيالىق قىزمەتىنىڭ دامۋىندا  دكۇ- نىڭ ءرولى مەن ءمانى: تاريحي ەكسكۋرس» ، «كەدەن قىزمەتى سالاسىندا قولدانىلاتىن ءداستۇرسىز كريميناليستيكانىڭ سالالارى» سياقتى تاقىرىپتىق ماسەلەلەرمەن قاتار مەملەكەت باسشىسىنىڭ جولداۋى مەن «رۋحاني جاڭعىرۋ» باعدارلاماسىن مەملەكەتتىك قىزمەتتە ىسكە اسىرۋ جونىندەگى وزەكتى تاقىرىپتار تالقىلاندى.

جوعارىدا اتالعان سۇراقتاردى تالقىلاۋدان بولەك قاتىسۋشىلار كينولوگيالىق ورتالىقتىڭ ماتەريالدى- تەحنيكالىق بازاسىمەن، كينولوگتاردى قىزمەتتىك يتتەرمەن دايىنداۋداعى باستى باعىتتار جانە ولاردىڭ جۇمىس ناتيجەلەرىمەن تانىستى.

ادامنىڭ دوسى سانالىپ، حالقىمىز جەتى قازىنانىڭ بىرىنە بالاعان ءتورت اياقتى جانۋاردىڭ ادامعا تيگىزەر پايداسى زور. ەلىمىزدىڭ قاۋىپسىزدىك قۇرىلىمدارى، ناقتىراق ايتساق شەكارالىق كەدەن قىزمەتى، تۇرمەدەگى كۇزەت، ايداۋىلداۋ، قوعامدىق ورىندارداعى تىنىشتىقتىڭ ساقتالۋى تاعى دا ءبىرقاتار قىزمەتتەردە قوسىمشا كۇش رەتىندە ارنايى ۇيرەتىلگەن اقىلدى يتتەردىڭ كومەگىنە جۇگىنەمىز. كينولوگيالىق ورتالىقتاعى يتتەر ناقتى سالا بويىنشا دايىندالادى. جارىلعىش زاتتاردى انىقتاۋ، ەسىرتكى زاتتارىن اشكەرەلەۋ، اقشا قۇرالىن ىزدەستىرۋ، باعالى اڭ مۇيىزدەرىن انىقتاۋ جۇمىستارى بويىنشا كىشكەنتاي كۇشىك كەزىنەن باستاپ بىلىكتى ماماندار قولىندا ۇيرەتىلەدى. ياعني، جوعارىدا ايتىلعان ناقتى قۇرالداردىڭ ءيسىن سەزۋگە ماشىقتاندىرىلادى.

«قىزمەتتىك يتتەر اينالىمى ەسىرتكى قۇرالدارى، جارىلعىش زاتتار، قارۋ، وق- ءدارى، اقشا بانكنوتتارى سياقتى زاڭسىز تاۋارلارمەن كۇرەس كەزىندە كەدەندىك باقىلاۋدى جۇرگىزۋدىڭ سەنىمدى قۇرالى. اتالعان شارا كونسترۋكتيۆتى ىنتىماقتاستىقتىڭ تاعى ءبىر بەلەسى  رەتىندە قاتىسۋشىلارعا اقپارات الماسۋعا جانە تالىمگەرلەردەن تاجىريبە الۋعا، كاسىپتىك شەبەرلىكتى شىڭداۋعا مۇمكىندىك بەرەدى» دەيدى ايماقتىق كينولوگيالىق ورتالىقتىڭ باسشىسى، پولكوۆنيك رىسبەك سماكوۆ.

ەسكە سالساق، ەلىمىز 1992 -جىلدان بەرى دۇنيەجۇزىلىك كەدەن ۇيىمىنىڭ  مۇشە مەملەكەتى رەتىندە تىركەلگەن. 2004 -جىلدىڭ قىركۇيەك ايىندا اتالعان  كينولوگيالىق ورتالىققا دۇنيەجۇزىلىك كەدەن ۇيىمىنىڭ ايماقتىق كينولوگيالىق ورتالىعى مارتەبەسى بەرىلدى.

ارمان وكتيابر،
«ەگەمەن قازاقستان»
الماتى