استانادا «قازاق حالقىنىڭ شىعۋ تەگى» اتتى كىتاپتىڭ تۇساۋى كەسىلدى


كەشە ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە بەلگىلى انتروپولوگ، ۇعا اكادەميگى ورازاق سماعۇلوۆ پەن قىزى ايناگۇل سماعۇلوۆا بىرلەسىپ جازعان «قازاق حالقىنىڭ شىعۋ تەگى» اتتى تۋىندىنىڭ تۇساۋكەسەر ءراسىمى ءوتتى.

اتالمىش كىتاپقا قازاق ەتنوسىنا قاتىستى ونىڭ  بەت- بەينەسى، قان جۇيەسى، ءتىس قۇرىلىسى، سەزىمى، تەرى بەدەرلەرى مەن قاڭقا سۇيەكتەرىنە ۇزاق جىل جۇرگىزىلگەن كەشەندى سالىستىرمالى زەرتتەۋدىڭ ناتيجەسى توپتاستىرىلعان. سونىڭ ناتيجەسىندە ەۋرازيانىڭ ءاپايتوس جازيراسىندا ءومىر ءسۇرىپ كەلە جاتقان قازاق حالقىنىڭ بۇزىلماي- سىزىلماي، بۇلىنبەي- جارىلماي ساقتالعان قىرىق عاسىرلىق تاريحى بارى انىقتالىپ وتىر.

مادەني شارانى ۇيىمداستىرۋشىلار تاراپىنان ءسوز العان ل. ن. گۋميليەۆ اتىنداعى ەۇۋ رەكتورى ەرلان سىدىقوۆ ءتورت مىڭ جىلدىق تاريح قورى جيناقتالعان مۇنداي قۇندى كىتاپتى جارىققا شىعارۋ ىسىنە ۋنيۆەرسيتەت مۇرىندىق بولىپ وتىرعانىن ايتىپ، جاسى توقسانعا تارتسا دا عىلىم جولىندا جانكەشتىلىك تانىتىپ، ەڭبەك ەتىپ كەلە جاتقان اكادەميكتىڭ ءىسى كەيىنگى جاستارعا ۇلگى دەگەنگە توقتالدى.

راسىندا انتروپولوگيامەن اينالىسۋ ەكىنىڭ ءبىرىنىڭ قولىنان كەلە بەرمەيدى. ويتكەنى بۇل عىلىم مەن كوممۋنيستىك يدەولوگيا اراسىندا قايشىلىق كوپ بولدى. سوندىقتان دا بولار 1977 -جىلى ورازاق سماعۇلوۆتىڭ ماڭداي تەرىن توگىپ جازعان «ەتنيچەسكايا گەنوگەوگرافيا كازاحستانا» اتتى ەڭبەگى كىتاپ بولىپ شىققاننان كەيىن قايتادان جيناپ الىنىپ، ورتەلدى.

جوعارىداعىداي قيىن ساتتەردى باسىنان وتكىزگەن اكادەميك ءوزىنىڭ عىلىم جولىندا جانكەشتىلىك تانىتۋىنا قانىش ساتبايەۆتىڭ «ورازاق قاراعىم، ءاربىر جان يەسىنىڭ بيولوگيالىق اتا- اناسى بولاتىن سەكىلدى، ءار حالىقتىڭ بيولوگيالىق اتا- اناسى بار. سەن قازاقتىڭ بيوتەگىن دالەلدە» دەگەن ءبىر اۋىز ءسوزى قۋات بەرگەنىن تەبىرەنىسپەن ەسكە الدى.

تۇساۋكەسەر راسىمىندە اكادەميك سەيىت قاسقاباسوۆ، بيولوگ- عالىم راحمەتقاجى بەرسىنباي كىتاپتىڭ قۇندىلىعى اسا جوعارى ەكەنىنە توقتالدى.

بەكەن قايرات ۇلى،

«ەگەمەن قازاقستان»