ءۇش قىز كوردىم باۋىرىندا جوسالىنىڭ.. .


ايگىلى «قىز جىبەك» جىرىنىڭ:
«قوسوبانىڭ كولىندە،
قوسا كەتتى دەگەيسىڭ،
ماڭدايىنان قىزىل قان،
جوسا كەتتى دەگەيسىڭ» ، دەگەن جولدارى ارقىلى كوپ قازاقتىڭ قۇلاعىندا قالعان، «قان جوسا» دەيتىن تىركەس ارقىلى ءالى دە قولدانىستا كەلە جاتقان «جوسا» سوزىنە اتاقتى ەستايدىڭ «ەركەم» دەيتىن انىندەگى ء«ۇش قىز كوردىم باۋىرىندا جوسالىنىڭ.. .» دەپ جولدارى ارقىلى سوعا كەتۋدىڭ ءساتى ءتۇسىپ تۇرعانداي.

جوسالى – جەردىڭ اتى. الايدا بۇل اتاۋ قازاق ومىرىندە كوپ قولدانىلعان، كەيىن كەلە قاجەتتىلىكتىڭ ازايۋىنا بايلانىستى ۇمىت بولىپ كەتكەن زاتتىڭ اتاۋىنا بايلانىستى اتالعانىنا كۇمان جوق.

قازاق بۇرىن قولىندا بوياۋ، سىر بولماي تۇرعان كەزدە ۋىق، كەرەگە، شاڭىراعىن جوسالاعان. جوسا – تابيعاتتا بولاتىن تابيعي بوياۋ. كادىمگى كەسەك توپىراق سەكىلدى، ءبىراق توپىراققا قاراعاندا كەرىش قىزىل ءتۇستى زات. جوساسى بار جوتا، سايلار كوپ بولا بەرمەيدى، جازعىتۇرىم تەز اڭعارىلادى. جەردىڭ ميى ەزىلىپ، ەندى عانا كوكتەمنىڭ كەبەقۇرعاق كەزى باستالعاندا قىپ- قىزىل بولىپ كوزگە تۇسەدى. سول جەردەن ونى كۇرەكپەن قازىپ اكەلىپ سۋعا ەزىپ ۋىق، كەرەگەنى جوسالايدى. ول ءبىر جاعى كيىز ءۇيدىڭ ءسانىن كەلتىرسە، ەكىنشى جاعىنان ۋىق، كەرەگە، شاڭىراق، كۇلدىرەۋىشتەر اۋماي، قيسايماي قالپىن ساقتاپ تۇرادى.

جوسالى دەپ جەردىڭ اتىنىڭ اتالۋى جوسا شىققان جەر بولعان سوڭ قويىلىپ وتىر. جوسالى دەگەن جەرلەر قازاقستاندا دا، وزگە شەتەلدەگى قازاقتار مەكەن ەتكەن جەرلەردىڭ بارىندە بار. ويتكەنى تەگىندە تۇگەل قازاق كەرەگە، ۋىعىنا وسى جوسانى پايدالانعان. ءتۇسىنىڭ قىزىل بولۋى سەبەپتى ونى ۇنەمى «اۋزى- مۇرنى قان جوسا بولدى» دەپ قانمەن بايلانىستىرىپ ايتامىز.

ۇلاربەك نۇرعالىم ۇلى،
«ەگەمەن قازاقستان»