اياز اقىرىپ تۇر


اي ۇركەرگە قارسى قاراعالى كۇن قاباعى قاتۋلى. اق جامىلعىعا ورانعان دالانى كارىنە مىنگەن اياز قاريدى. ۇركەردىڭ ەڭ شىرقاعان كەزى. سىرما بوران كەزگەن سار دالادا سارى اياز ساقىلداپ كۇلگەندەي.. . جەر- دۇنيەنى توڭعا اينالدىرعان الاپاتىنا سۇيسىنگەن سارى اياز ساقىلداپ كۇلمەگەندە كىم كۇلەدى؟ ! «قارا جەردىڭ ولگەنى – قار استىندا قالعانى» دەگەن وسى بولار، بالكىم.
سىبىردەن كەلدى مە، تايگادا تۋا سالا الاسۇرىپ جەتتى مە، ايتەۋىر، التايدىڭ قوينى- قونىشى دا، ارقانىڭ اشىق- شاشىق قولاتى دا، سولتۇستىكتەگى قالىڭ نۋ دا بۇل شىركىنگە ايلا- امالسىز، ءتىپتى جەتىسۋدىڭ جەلكەسىنەن دە ىزعار سوعىپ، جارتى قازاقستان قاتتى ايازعا قالشىلداپ- اق تۇر. ايتقانداي، بۇل سولتۇستىك مۇزدى مۇحيتتىڭ جاعاسىندا دۇنيەگە كەلگەن اياز ەكەن. «قازگيدرومەتتىڭ» حابارلاۋىنشا، مۇز قۇرساۋلى مۇحيتتىڭ شەتىندەگى كارسك تەڭىزىندە پايدا بولعان انتيتسيكلون قاناتىن كەڭگە جايىپ، اۋقىمدى ءارى اشۋلى كۇيىندە ەلىمىزدىڭ وڭتۇستىك- شىعىسىن بەتكە الىپ، بەتتى قارىپ كەلەدى. اركتيكالىق اعىستى ءقازىردىڭ وزىندە سولتۇستىك، كۇنشىعىس ءھام ورتالىق وڭىرلەردىڭ تۇرعىندارى سەزىنىپ ۇلگەردى. الداعى ءۇش تاۋلىكتە اقىرىن جىلجىپ وڭتۇستىكتەگى جۇرتقا دا جەتپەك. اتوي سالا كەلگەن اياز تەرىسكەيدە ءتۇن بالاسىندا 40-45 گرادۋسقا دەيىن جەتسە، وڭتۇستىكتە 28-33 گرادۋسقا دەيىن تومەندەمەك. سول سەبەپتى توتەنشە جاعدايلار قىزمەتى سولتۇستىك قازاقستان، پاۆلودار، شىعىس قازاقستان، اقمولا، قاراعاندى وبلىستارىندا 26 -قاڭتارعا دەيىن قاتتى ايازعا بايلانىستى داۋىل بولۋى مۇمكىن ەكەنىن ەسكەرتىپ وتىر. الماتى وبلىسى دا ادەتتەگىدەن 18 گرادۋسقا دەيىن تومەن اۋا رايىندا ابايلاۋدى ايتىپ جاتىر. ءبىرقاتار وڭىردەگى مەكتەپتەردە ساباق توقتاتىلدى. «استانا LRT» جشس حابارلاۋىنشا، ەلوردا ماڭايىنداعى اۋىلداردا قوعامدىق كولىكتەر دە جۇرە الماي قالعانعا ۇقسايدى. ءتىپتى وسكەمەندە دالا تاعىلارى قالا كوشەلەرىنە كىرىپ كەتكەنىن حابارلاپ جاتىر.

ارينە، قىس قىستىعىن قىلماسا، جاز جازدىعىن قىلمايدى. ءار قۇبىلىستىڭ قايىرى بار. تەك «جىلىگىن شاقپاي مايىن ىشەر» قىراۋ قاباق قىستا قىرعا قونعان اعايىندى دا ويلايسىز. ايتپەسە، ساقىلداعان سارى ايازدا سارى قامىستى قىستاپ وتىرعانداي جىلى جەردە جان باققان قالالىقتارعا جەڭىل عوي. مالى باعۋلى، وتى جاعۋلى. تەك كوممۋنالدىق قىزمەتتە ءمىن بولماۋىن تىلەڭىز. « قىزىلدى قىستىڭ كۇنى شۇناق قاتقان، ايازدا تۇكىرىگىڭ تۇسپەي قاتقان، جابۋلاپ سامارقاننىڭ جىبەگىمەن، جابىلى جانۋاردى سولاي باققان» ، دەپ ءىلياس جانسۇگىروۆ جىرلاعانداي، جانۋار باعىپ وتىرعان جۇرتقا جاراتقان جىلۋ، شىدام، قۋات بەرسىن دەيمىز. ايتپەسە، قوعامدىق كولىكتەر مەن ساباقتىڭ توقتاعانى نە ءتايىرى!..

دۋمان اناش،

«ەگەمەن قازاقستان»

سۋرەتتەردى تۇسىرگەن

ەرلان ومار،

«ەگەمەن قازاقستان»