شاتتىق باتان شىعارمالارى شاشقان شۋاق


ول بۇكىل دۇنيەنىڭ بولمىسىن بۋىرقانعان بوياۋلاردان كورەدى. ونەر دەيتىن شەكسىز الەمنىڭ تۇڭعيىعىنا تەرەڭ بويلاپ، تۇتاس تىرشىلىككە تاتيتىن ۇلى كارتينا جازۋعا ۇمتىلادى. اينالاسىنداعىلارعا بەينەلەۋ ونەرىنىڭ قۇدىرەتىن ايگىلى ەتىپ، بۇل ەشقانداي ولشەمگە سىيمايتىن ۋاقىتتىڭ تامىرىمەن بىرگە سوعاتىن عالامات كۇش ەكەنىن ۇعىندىرعىسى كەلەدى.
بۇل شاتتىق باتاننىڭ شاعىن شەبەرحاناسىندا وربىگەن ويلاردىڭ ءبىر ۇزىگى عانا. شاتتىق شىعارمالارىنىڭ نەگىزگى وزەگى تابيعاتتىڭ سان الۋان مىنەزدەرى، قاراپايىم اۋىل ادامدارىنىڭ تىنىس- تىرشىلىگى، قاز- قالپىنداعى ءومىردىڭ ءوز سۋرەتتەرى. ونىڭ كەنەبىندە نەمەرەسىن ارقالاعان اجە سەنىڭ اجەڭدەي، تال- تەرەكتەر مەن ۇيلەر كادىمگى ءوزىڭنىڭ تۋىپ- وسكەن اۋىلىڭداي كورىنەتىنى شىعارمانىڭ شىنايىلىعى مەن ءومىردىڭ وزىنەن الىنعان ەش قوسپاسىز، بوياماسىز بوياۋلارىندا بولار. مىڭ بوياۋدىڭ سيقىرى كەيدە جانىڭا شۇعىلا قۇيسا، بىردە كوڭىلىڭدى قۇلازىتادى. بارىمىزگە بايقالا بەرمەيتىن ءار ءساتتىڭ ادەمى كورىنىسىن قۇداي تاعالا سۋرەتشىنىڭ قىلقالامىنا ءۇيىپ- توگىپ قويعانداي اسەر قالدىرادى. مۇنداي سەزىمدەر جۇرەكتەن شىققان تۋىندىنىڭ جانى بولادى دەگەندى دالەلدەيتىندەي.

– ءبىز سۋرەت ونەرىن ۇلتتىق دەڭگەيدە باعالاۋعا ۇمتىلۋىمىز كەرەك. الىسقا بارماي- اق ءوزىمىزدىڭ سۋرەتشىلەرىمىزدىڭ بوياۋلارىنان، ولاردىڭ كومپوزيتسيالارىنان ءنار الىپ، ناعىز ونەردى تانۋعا تالپىنايىق. ءبىز ولاردى قانشالىقتى كوككە كوتەرە الساق، ءبىزدىڭ مادەنيەتىمىز دە سونشالىقتى بيىك بولادى. ءبىر كارتينانى سالدىڭ دا، ۇقساتتىڭ. ول جاي عانا ورىنداۋشىلىق. ءبىراق تۋىندىعا جان ءبىتىرۋ ءۇشىن وندا سەنىڭ شىعارماشىلىق شەشىمىڭ، بوياۋىڭ، ءتۇسىڭ بولۋى شارت. ءوزىڭنىڭ كوڭىل كۇيىڭدى سول كارتيناعا بەرە الساڭ عانا ول جاندانىپ، ناعىز ونەر تۋىندىسىنا اينالادى. كارتينالارىمدا ۇلتتىق بوياۋلارعا، قانىمىزعا ءتان قانىق تۇستەرگە باسىمدىق بەرەم. ءار شىعارمام جانىمنىڭ ءبىر بولشەگى سياقتى. ناعىز ونەردى ساۋداعا سالۋعا بولمايدى. ول سول ءداۋىردىڭ تىنىسىن بولاشاققا جەتكىزۋشى. سۋرەتپەن تىنىستايمىن، سۋرەتپەن ءومىر سۇرەم. ەڭ نەگىزگى ماقساتىم ونەر الدىنداعى تازالىقتى ساقتاۋ. كيەلى ونەردىڭ ءقادىرىن كەتىرمەۋ، تۇنىعىن لايلاماۋ، – دەيدى قازاقستان سۋرەتشىلەرى وداعىنىڭ مۇشەسى شاتتىق باتان.

شەبەرحانادان شىعاردا شاتتىق ايتقان تاعى ءبىر ءسوز ويىما ەرىكسىز ورالا بەردى: «الەمگە ايگىلى ميكەلاندجەلو شاكىرت قابىلدايتىن كەزىندە ولارعا كىم بولۋدى ارماندايسىڭ دەپ سۇراق قويادى ەكەن. بىردە وسى سۇراقتى الدىنا كەلگەن ءبىر شاكىرتكە قويعاندا بالاڭ جىگىت سىزدەي بولعىم كەلەدى دەپتى. سوندا داڭقتى سۋرەتشى سەنەن سۋرەتشى شىقپايدى دەپ قايتارىپ جىبەرىپتى. مۇنىڭ سەبەبىن سۇراعاندا، مەن كەزىندە «قۇداي» بولۋدى ارماندادىم، ءبىراق بولا المادىم. ال سەن مەن بولۋدى ارمانداساڭ سەنەن ەشتەڭە شىقپايدى دەگەن ەكەن» . بۇدان تۇيگەنىمىز، ادامنىڭ اسقار بيىگى تالانتىمەن عانا ەمەس، ارمانىنىڭ اسقاقتىعىمەن ولشەنەدى.

اسقاق ارمانىن جانىنا جالاۋ ەتىپ ونەر ولكەسىندە وزىندىك ورنەگىن سالعان شاتتىق شىعارمالارى جانىمىزعا شۋاق شاشقانداي اسەرمەن قايتتىق.
.. .شاتتىق شىعارمالارى شاشقان شۋاق.. .

ارمان وكتيابر،
«ەگەمەن قازاقستان»

الماتى