عارىشتان تۇسكەن قىز


بۇعان دەيىن دە الماتىلىق دانەليا تولەشوۆا ۋكراينادا وتكەن «گولوس. دىتي» شوۋىندا تابىسقا جەتىپ، بايقاۋدىڭ اقتىق سىنىنا جولداما العانىن بايانداعانبىز.
وعان قوسا تولەشوۆاعا «گولوس. دىتي» شوۋىنىڭ ءانشىنى كورمەي باعالاۋ كەزەڭىندە قازىلار القاسىنىڭ بارلىق مۇشەسى بىردەي بۇرىلۋعا ساناۋلى سەكۋندتار عانا جەتكىلىكتى بولعانىن دا جازدىق.
ۋكراينالىق شوۋدىڭ ءتورتىنشى ماۋسىمىنا ديما موناتيك، «ۆرەميا ي ستەكلو» توبى مەن ناتاليا موگيليەۆسكايا سىندى تانىمال انشىلەر تالىمگەر بولسا، الماتىلىق ءانشى ەڭ كوپ قارالعان ورىنداۋشىلار ىشىندە كوش باستاپ، YouTube جۇلدىزىنا اينالىپ شىعا كەلدى. ساحنادا عارىشتان تۇسكەن ادام سياقتى بەينە قالىپتاستىرعان بالدىرعان كورەرمەندەردىڭ ولشەۋسىز قوشەمەتىنە بولەندى.
شوۋدىڭ تاعدىرشەشتى ساتتەرىندە قازاقستاندىق جاس تالانت 5 ءان ورىندادى. ونىڭ ىشىندە «گولوس. دىتي» شوۋىنىڭ ءانۇرانى مەن ديما موناتيك ارنايى وسى بايقاۋدىڭ اقتىق سىنى ءۇشىن جازعان «Spectrum» Florence, «اقىلدى اعاشتارى» دا ايتىلدى. سوڭعى ساتتە ول Monatik, نينو باسيلايامەن بىرگە «وكەان ەلزى» توبىنىڭ «نە تۆويا ۆوينا» ءانىن شىرقاپ قانا قويماي، جينالعانداردىڭ كوزىنە جاس العىزدى، كوپتى تەبىرەنتتى.
بايقاۋدىڭ ونە بويىندا ءانشى بالاقاي تىڭدارماندارىن ەرەكشە داۋسىمەن، پەرىشتەدەي شىنايىلىعىمەن باۋراپ العانىن مويىنداۋ كەرەك. دانەليانىڭ ورىنداۋىنداعى «نە تۆويا ۆوينا» ءانى زالدىڭ جارتىسىن جىلاتتى.
«دانەليا ەرەكشە، عارىشتان كەلگەن سياقتى. ساعان قول تيگىزىپ كورگىم كەلەدى. سەن عاجاپسىڭ! ۋكراينا پرەزيدەنتىنەن سەن ءۇشىن ازاماتتىق بەرۋىن سۇرار ەدىم» ، دەيتىن ناتاليا موگيليەۆسكايانىڭ ءسوزىنىڭ جانى بار.
قازاقستاندىق تالانتقا تالىمگەر بولعانىن ديما موناتيك تە مارتەبە سانادى. «مەنىڭ كوماندامدا وسىنداي بالالار بولعانىن ماقتانىش تۇتامىن. دانەليا وسى ماۋسىمنىڭ ولجاسى بولدى. الەمدىك دەڭگەيدەگى ارتىستەر قانداي بولادى دەسە، مەنىڭ كوز الدىما دانەليا كەلەدى» ، دەدى ديما موناتيك.
وسىلايشا ءانشى بالاپاننىڭ كەزەكتى ارمانى ورىندالدى. باستاپقىدا ول «گولوس. دىتي» شوۋىنا قاتىسۋدىڭ ءوزىن مارتەبە ساناسا، ونەر جارىسى قىزا كەلە جەڭىس ءۇشىن كۇرەستى جانە ءوزىنىڭ لايىقتى باعاسىن الدى. تانىلدى، تالاي دوستار تاپتى. تىڭدارماننىڭ دا قازىلار القاسىنىڭ دە، تالىمگەرلەرىنىڭ دە سۇيكىمدىسى بولدى.
ايتقانداي، YouTube ارقىلى الماتىنىڭ 11 جاستاعى دارىنىن 6 ميلليوننان استام ادام تاماشالادى. اقتىق سىندا تولەشوۆا يانا گورنايا، الەكساندر مينەنوك، ەليزاۆەتا ياكوۆەنكو، كاتەرينا مانۋزينا، نينو باسيلايا سياقتى دارىندىلارمەن باق تالاستىردى.

ايناش ەسالي،
«ەگەمەن قازاقستان»
الماتى